ފިލިޕީންސްގެ މެދުތެރެއާއި އުތުރުގައި އުފެދިފައިވާ ޓްރޮޕިކަލް ތޫފާން "ޓްރާމީ" ގައި 76 މީހުން މަރުވެ ގިނަ އަދަދެއްގެ ބައެއްގެ ގެދޮރު ގެއްލިއްޖެ އެވެ.
ފިލިޕީންސްގެ ޕްރޮވިންސެއްގެ ޕޮލިސް ޗީފް ހުކުރު ދުވަހު ވިދާޅުވީ، ވެރިރަށް މެނީލާގެ ދެކުނުގައި އޮންނަ އަވަށަކުން ބިންގަނޑު ކަނޑައިގެން ދިއުމުގެ ސަބަބުން 47 މީހުން މަރުވެފައިވާ ކަމަށެވެ.
ޓްރާމީ ޓައިފޫންއަކަށް ބަދަލުނުވި ނަމަވެސް، މި ޓްރޮޕިކަލް ތޫފާނުގައި އާދަޔާޚިލާފަށް ބޯކޮށް ވާރޭ ވެހުމުގެ ސަބަބުން ގިން ސަރަހައްދު ތަކެއްގައި ވަނީ ފެން ބޮޑު ވެފައެވެ.
ފެންބޮޑުވުމުގެ ސަބަބުން 2.6 މިލިއަނަށްވުރެ ގިނަ މީހުން ހާލުގައި ޖެހިފައިވާއިރު، ގާތްގަނޑަކަށް 320،000 މީހުން ވަނީ އިވެކުއޭޝަން ސެންޓަރުތަކަށް ނުވަތަ ގާތްތިމާގެ މީހުން ދިރިއުޅޭ ގެތަކަށް ހިޖުރަކޮށްފައެވެ.
ހުކުރު ދުވަހާ ހަމައަށް 7،510 ފަސިންޖަރުން އެއާޕޯޓުތަކުގައި ތާށިވެފައި ތިބިއިރު 36 ފްލައިޓެއް ވަނީ ކެންސަލްކޮށްފަ އެވެ.
ޕެސިފިކް ކަނޑާއި ދެކުނު ޗައިނާ ކަނޑުގެ ދެމެދުގައި އޮންނަ ދެކުނު އިރުމަތީ އޭޝިއާގެ އާކިޕެލަގޯއެއް ކަމަށްވާ ފިލިޕީންސަށް ކޮންމެ އަހަރަކު ވެސް ގާތްގަނޑަކަށް 20 ވަރަކަށް ތޫފާން އަރަ އެވެ.
މިދިޔަ ސެޕްޓެމްބަރު މަހު ފިލިޕީންސް އަށް އެރި ޓްރޮޕިކަލް ތޫފާން "ޔާގީ" ގައި ވެސް 11 މީހުން ވަނީ މަރުވެފަ އެވެ.
