ރާއްޖޭގެ ވިޔަފާރި ބަނދަރު ތިލަފުށްޓަށް ބަދަލުކުރުމުގެ ބިޔަ މަޝްރޫޢަކީ، 2040 ވަނަ އަހަރާ ހަމައަށް ރާއްޖެއަކީ ތަރައްޤީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަސައްވުރު ޙަޤީޤަތަކަށް ހެދުމަށް އެޅޭ އެންމެ ވަރުގަދަ އެއް ބިންގާ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ ރައީސުލްޖުމްހޫރިއްޔާގެ އަރިހުގައި ތިލަފުށީގެ ޕޯޓް މަޝްރޫޢުގެ މަސައްކަތްތައް ބައްލަވާލެއްވުމަށް އެ ރަށަށް ކުރެއްވި ޒިޔާރަތުގައެވެ.
މި މަޝްރޫޢު ނުހިނގާ އެތައް އަހަރެއް ވޭތުވެދިޔުމަކީ މުޅި ޤައުމުގެ ވިޔަފާރިއާއި އިޤްތިޞާދީ ކުރިއެރުމަށް އެޅުނު ބޮޑު ހުރަހެއްކަން ފާހަގަކުރައްވަމުން ވަޒީރު ސަޢީދު ވިދާޅުވީ، މި ސަރުކާރުގެ އަމާޒަކީ އަންނަ އަހަރުގެ ނޮވެމްބަރު މަހުގެ ނިޔަލަށް މަޝްރޫޢުގެ ފުރަތަމަ ފިޔަވަހި ނިންމައި، 2028 ވަނަ އަހަރުގެ ނޮވެމްބަރަށް މުޅި މަޝްރޫޢު އެއްކޮށް ނިންމާލުން ކަމަށެވެ. އަދި ރާއްޖޭގެ ޕްރައިވެޓް ސެކްޓަރުގައި، ހާއްސަކޮށް ޓޫރިޒަމް ދާއިރާއާ ގުޅުންހުރި ކޮންސްޓްރަކްޝަންގެ 11 ބިލިއަން ޑޮލަރުގެ އިންވެސްޓްމަންޓް މިހާރުވެސް ހިނގަމުންދާއިރު، މި މަޝްރޫޢުގެ ސަބަބުން ވިޔަފާރިވެރިންނާއި އިންވެސްޓަރުންނަށް މުދާ ލިބުމުގައި ދިމާވާ ދަތިތަކަށް ދާއިމީ ޙައްލެއް ލިބިގެންދާނެއެވެ.
މި މަޝްރޫޢުގެ ސަބަބުން އާންމު ރައްޔިތުންގެ ދިރިއުޅުމުގެ ޚަރަދުތަކަށް ބޮޑު ލުޔެއް ލިބޭނެކަން ވަޒީރު ފާހަގަކުރެއްވިއެވެ. އެގޮތުން ކާބޯތަކެއްޗާއި ތަރުކާރީ އަދި މޭވާ ފަދަ ތަކެތި ކްލިއާކުރުމަށް މާލޭ ޕޯޓުގައި މިހާރު 7 ނުވަތަ 8 ދުވަސް ހޭދަވި ނަމަވެސް، ތިލަފުށީ ބަނދަރުގެ ޚިދުމަތް ފެށުމުން ބޯޓުފަހަރުން މުދާ ބާލާތާ 24 ގަޑިއިރުގެ ތެރޭގައި ކްލިއާކުރެވި، ތާޒާކަންމަތީ ފިހާރަތަކަށް މުދާ ފޯރުކޮށްދެވޭނެއެވެ.
މި މަޝްރޫޢު ނިމިގެންދާއިރު ބައިނަލްއަޤުވާމީ ފެންވަރުގެ ކީވޯލްތަކާއި ޒަމާނީ ބަނދަރެއްގެ އިތުރުން ސްޓޯރޭޖް ވެއާހައުސްތައް ޤާއިމުވެގެންދާނެއެވެ. އަދި މާލޭ ބާޒާރުމަތީގައި ހުރި އަތޮޅު ފިހާރަތަކާއި ގުދަންތައް ފަދަ ވިޔަފާރީގެ މުހިންމު ހުރިހާ އޮޕަރޭޝަންތަކެއް ތިލަފުށްޓަށް ބަދަލުވެގެންދާނެއެވެ. މީގެއިތުރުން، ބްރިޖް މެދުވެރިކޮށް އެއްގަމު މަގުން ކާގޯ އުފުލުމާއި، ހުޅުމާލެއަށް އިންބައުންޑް މުދާ ފޮނުވުމުގެ އިތުރުން ވެލާނާ އިންޓަނޭޝަނަލް އެއާޕޯޓަށް ސީ-ޓު-އެއާ ކާގޯގެ ޚިދުމަތް ދިނުމަށް ފުރިހަމައަށް މަގުފަހިވެގެންދާނެއެވެ.
