ޗައިނާގެ އިރުމަތީ ސްކޫލެއްގެ ބޭރުގައި ސްކޫލު ބަހެއް ކޮންޓްރޯލުން ނައްޓައިގެންގޮސް އެކްސިޑެންޓްވެ 11 މީހުން މަރުވެއްޖެ އެވެ.
މި ހާދިސަ ހިނގާފައިވަނީ ޗައިނާގެ ޝަންޑޮންގް ޕްރޮވިންސްގެ ޓައިއާން ސިޓީގައެވެ. މި ހާދިސާގައި މަރުވި 11މީހުންގެ ތެރޭގައި 5 ސްކޫލު ދަރިވަރުން ވެސް ހިމެނެއެވެ.
ސީސީޓީވީން ދައްކާ ގޮތުގައި ބަސް ކޮންޓްރޯލުން ނައްޓައިގެން ގޮސް އެކްސިޑެންޓުވީ ގިނަ އަދަދެއްގެ ބެލެނިވެރިންނާއި ސްކޫލު ދަރިވަރުންތަކެއް އެއްވެ ތިބި ހިސާބަކަށެވެ.
ބަސް ދުއްވަން އިން ޑްރައިވަރު ފުލުހުންގެ ބެލުމުގެ ދަށަށް ގެންގޮސްފައިވާ އިރު ފުލުހުން މިހާރު އަންނަނީ ހާދިސާ ހިނގަން މެދުވެރިވި ގޮތް ތަހުގީގު ކުރަމުންނެވެ.
ނުރައްކާތެރި ޓްރެފިކް އެކްސިޑެންޓްތައް އެގައުމުގައި ގިނައިން ހިނގަނީ ރައްކާތެރިކަމުގެ މިންގަނޑުތަކަށް އިހުމާލު ވުމާއި ދުއްވަން ކަނޑައަޅާފައިވާ ސްޕީޑަށް ވުރެ ބާރަށް ދުއްވުމުގެ ސަބަބުންނެވެ.
މިދިޔަ ޖުލައި މަހު ވެސް، ޗައިނާގެ ސިޓީއެއް ކަމުގައިވާ ޗަންގްޝާގައި ދުއްވާފައި ދިޔަ ކާރެއް މަގުމަތިން ހިނގާފައި ދިޔަ މީހުންތަކެއްގެ ގައިގައި ޖެހި ނުރައްކާތެރި އެކްސިޑެންޓެއް ހިނގާފައި ވެއެވެ. މި ހާދިސާގައި އަށް މީހުން ފުރާނަ ދޫކޮށް، ފަސް މީހަކު ޒަހަމްވެފައިވާ ކަމަށް ފުލުހުން މައުލޫމާތު ދިނެވެ.
