އެމެރިކާގެ ރައީސް ޑޮނަލްޑް ޓްރަމްޕް، ވޮޝިންގޓަނުން ޓެހްރާނާއެކު ގާއިމުކޮށްފައިވާ އެއްބަސްވުން ހުކުރު ދުވަހުގެ ކުރިން އާންމުކުރައްވަން ނިންމަފާނެ ކަމަށް، އެމެރިކާގެ ނައިބު ރައީސް ޖޭޑީ ވޭންސް ހޯމަ ދުވަހު ފޮކްސް ނިއުސްއަށް ވިދާޅުވެއްޖެއެވެ.
އެމެރިކާ އާއި އީރާނުގެ ވެރިން އިލެކްޓްރޯނިކްކޮށް ސޮއިކުރައްވާފައިވާ މި އެއްބަސްވުމުގައި، ހުކުރު ދުވަހު ދެ ފަރާތުން ބައްދަލުކޮށް ރަސްމީކޮށް ސޮއިކުރާނެ ކަމަށް ބެލެވެއެވެ.
ހޯމަ ދުވަހު ޓްރަމްޕް ވިދާޅުވީ އީރާނާއެކު އެއްބަސްވުމެއްގައި ސޮއިކުރެވިފައިވާ ކަމަށާއި، ހުކުރު ދުވަހު ބާއްވާ ރަސްމީ ސޮއިކުރުމަށްފަހު އެއްބަސްވުމުގެ ލިޔުންތައް އާންމުކުރާނެ ކަމަށެވެ. އަދި މިއާއެކު ހޮރްމޫޒް ކަނޑުއޮޅި ވެސް މުޅިން ހުޅުވާލެވޭނެ ކަމަށް އޭނާ އިތުރަށް ވިދާޅުވިއެވެ.
މި ހަފުތާގައި ބޭއްވުމަށް ހަމަޖެހިފައިވާ ޖީ7ގެ ބައްދަލުވުމުގެ ކުރިން، ފަރަންސޭސިވިލާތުގެ ރައީސް އެމަނުއެލް މެކްރޮންއާއެކު ވާހަކަދައްކަވަމުން ޓްރަމްޕް ވިދާޅުވީ، ޖެނީވާގައި ހުކުރު ދުވަހު ބާއްވާ ރަސްމިއްޔާތަށް އޭނާ ވަޑައިގަންނަވާނެކަން އަދި ޔަގީންނުވާ ކަމަށާއި، ނަމަވެސް ނައިބު ރައީސް ވޭންސް އެތަނަށް ވަޑައިގަންނަވާނެ ކަމަށެވެ.
ފަރަންސޭސިވިލާތުގެ އީވިއާންއަށް ވަޑައިގަތުމަށްފަހު ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އެއްބަސްވުމުގައި މިހާރު ވަނީ ސޮއިކޮށް ނިމިފައިކަމަށާއި، މިހާރުވެސް ހޮރްމޫޒް ކަނޑުއޮޅި ބައެއް ބައިތައް ހުޅުވާލެވިފައިކަމުގައި އަދި ހުކުރު ދުވަހު އެތަން މުޅިން ހުޅުވާލެވޭނެކަމަށް ހާމަކުރިއެވެ.
ހޯމަ ދުވަހުގެ ކުރީކޮޅު ވޭންސް ވިދާޅުވީ، މި އެއްބަސްވުމުގައި އާދިއްތަ ދުވަހު ޑިޖިޓަލްކޮށް ސޮއިކޮށްފައިވާ ކަމަށާއި، ނަމަވެސް އެއްވެސް ފައިސާއެއް އީރާނަށް ދޫކޮށްފައި ނުވާނެ ކަމަށެވެ.
މި އެއްބަސްވުމުގެ އެމްއޯޔޫ ލިޔުންތައް އާންމުކުރާނީ ކޮން އިރަކުންތޯ ސުވާލުކުރުމުން ޓްރަމްޕް ވިދާޅުވީ: "ވަރަށް އަވަހަށް. އަޅުގަނޑު ދަންނަވާނީ ހުކުރު ދުވަހަށްފަހު ކޮންމެވެސް ވަގުތެއްގައޭ... އަޅުގަނޑު ހީކުރަނީ ވަރަށް ކައިރި މުސްތަގުބަލެއްގައި އެކަން ވާނެ ކަމަށް."
ޓްރަމްޕް ވިދާޅުވި ގޮތުގައި އީރާނަށް ދީފައިވާ ދަތިކުރުމުގެ ފިޔަވަޅުތަކަށް ލުއިދިނުން ބިނާވެގެންވަނީ އެބޭފުޅުންގެ އަމަލުތައް ބަހައްޓާ ގޮތެއްގެ މައްޗަށެވެ. އެބޭފުޅުން ކުރަންޖެހޭ ކަންކަން ފުރިހަމައަށް ކުރަން ފެށުމުން، އޭގެ ނަތީޖާ ފެންނަން ފަށާނެކަމުގައެވެ.
މީގެއިތުރުން، އޭބީސީ ނިއުސްގެ "ގުޑް މޯނިންގ އެމެރިކާ" ޕްރޮގްރާމުގައި ވާހަކަދައްކަވަމުން ވޭންސް ވިދާޅުވީ، ހަނގުރާމަ ހުއްޓާލުމަށާއި ހޮރްމޫޒް ކަނޑުއޮޅި ހުޅުވާލުމަށް އީރާނާއެކު ސޮއިކުރި އެއްބަސްވުމުގެ ބަދަލުގައި، އީރާނުގެ ފްރީޒްކޮށްފައިވާ އެއްވެސް ފައިސާއެއް ދޫނުކުރާނެ ކަމަށެވެ.
"އެއްވެސް ފައިސާއެއް ދޫކޮށްފައެއް ނުވާނެ، އަދި އެކަން ބަދަލެއް ވެސް ނުވާނެ،" އޭނާ ވިދާޅުވިއެވެ.
ވޭންސް ވިދާޅުވި ގޮތުގައި އީރާނަށް ފައިސާ ލިބޭނީ، އެގައުމުން މަތީ މިންވަރަކަށް ފައްކާކޮށްފައިވާ ޔުރޭނިއަމްގެ ރިޒާވް ނައްތާލުމަށް ކަނޑައެޅިގެން ފިޔަވަޅުތަކެއް އަޅައި، އެކަން ޔަގީންވުމުންނެވެ.
"އީރާނުން ޔުރޭނިއަމް ރިޒާވް ނައްތާލަން ފިޔަވަޅު އަޅާ ތަން ފެނިއްޖެއްޔާ، ދަތިކުރުމުގެ ފިޔަވަޅުތަކަށް ލުއި ލިބޭނެ. އަދި އެގައުމުން ނިއުކްލިއާ ހަތިޔާރު ނުއުފައްދާކަން ކަށަވަރުކުރަން އަޅުގަނޑުމެން ބޭނުންވާ ފަދަ ބެލެހެއްޓުމުގެ ނިޒާމަކަށް ފުރުސަތު ދީފިނަމަ، ފިޔަވަޅުތަކަށް ލުއި ލިބޭނެ،" ވޭންސް ވިދާޅުވިއެވެ. "އެކަމަކު އެބޭފުޅުން ރަނގަޅު ގޮތުގައި ކަންކަން ނުކޮށް، އެ ބެލެހެއްޓުމުގެ ނިޒާމަށް ފުރުސަތު ނުދީފިނަމަ، ނިއުކްލިއާ ޕްރޮގްރާމް އަލުން ބިނާކުރާނެ ފައިސާއެއް އެބޭފުޅުންނަކަށް ދުވަހަކުވެސް ނުލިބޭނެ."
ހޯމަ ދުވަހު ސީއެންބީސީ އަށް ދެއްވި އިންޓަވިއުއެއްގައި ވޭންސް ވިދާޅުވީ، އިގްތިސާދީ ގޮތުން މުހިންމު މި ކަނޑުގެ މަގު ދާއިމީ ގޮތެއްގައި އެއްވެސް ފީއެއް ނެގުމެއް ނެތި ހުޅުވާލެވޭނެ ކަމަށް އެމެރިކާއިން އުންމީދުކުރާ ކަމަށެވެ.
އެމެރިކާ އާއި އީރާނުން ބުނެފައިވަނީ ދެގައުމުގެ ދެމެދުގައި އޮތް ހަނގުރާމަ ހުއްޓާލުމަށާއި ކަނޑުއޮޅި ހުޅުވާލުމުގެ ޝަރުތުތަކަށް އެއްބަސްވެވިފައިވާ ކަމަށެވެ. މި ޚަބަރާއެކު ބައިނަލްއަގުވާމީ ބާޒާރުތަކަށް ބޮޑު ހަމަޖެހުމެއް ލިބިފައިވީ ނަމަވެސް، މި އެއްބަސްވުން ދެމިއޮތުން ބިނާވެގެންވަނީ ލުބުނާނުގައި ހިނގަމުންދާ ދެކޮޅުވެރިކަން ހުއްޓުމަކަށް އައުމުގެ މައްޗަށެވެ. އަދި އީރާނުގެ ނިއުކްލިއާ ޕްރޮގްރާމާ ބެހޭ ވާހަކަތައް ވަނީ ފަހުގެ ތާރީޚަކަށް ފަސްކޮށްފައެވެ.
މިއީ ހަމައެކަނި ފްރޭމްވޯކް އެއްބަސްވުމެއް ނަމަވެސް، މިއީ ފެބްރުއަރީ މަހު އެމެރިކާ އާއި އިސްރާއީލުން ގުޅިގެން އީރާނަށް ދޭން ފެށި ހަމަލާތަކަށްފަހު، އެތައް ހާސް ބަޔަކު މަރުވެ، ހަކަތައިގެ ބާޒާރަށް ބޮޑު ލޮޅުމެއް އައިސްފައިވާ މި ހަމަޖެހުމަށް ލިބުނު އެންމެ ބޮޑު ކުރިއެރުމެވެ.
ވޭންސް ސީއެންބީސީއަށް ވިދާޅުވި ގޮތުގައި، ހުކުރު ދުވަހު ސްވިޒަލޭންޑުގައި ބާއްވާ ސޮއިކުރުމުގެ ރަސްމިއްޔާތުގައި އީރާނުގެ ފަރާތުން ބައިވެރިވެވަޑައިގަންނަވާނީ އެގައުމުގެ ޚާރިޖީ ވަޒީރާއި މަޖިލީހުގެ ރައީސް އެވެ. އަދި އެއްބަސްވުމުގެ ގިނަ ތަފްސީލުތަކެއް ކުރިއަށް އޮތް ތަނުގައި މޭޒުދޮށުގައި މަޝްވަރާކޮށްގެން ނިންމަންޖެހޭ ކަމަށް ވެސް އޭނާ ވިދާޅުވިއެވެ.