އޯލްޑް ޓްރެފޯޑްގައި ދެ ލަނޑުގެ ލީޑެއް ނަގާފައިވަނިކޮށް، ބްރައިޓަން އަތުން ބަލިވެ މެންޗެސްޓާ ޔުނައިޓެޑް ލީގު ކަޕްގެ ތިންވަނަ ބުރުން ކަޓައިފިއެވެ. މިއީ ވޭތުވެދިޔަ 50 އަހަރުގެ ތެރޭގައި އޯލްޑް ޓްރެފޯޑްގައި 2-0 ގެ ލީޑެއްގައި އޮވެ ޔުނައިޓެޑް ބަލިވި ފުރަތަމަ ފަހަރެވެ. އަދި މިއީ އަމިއްލަ ދަނޑުގައި ޖެހިޖެހިގެން އެ ޓީމު ބަލިވި ދެވަނަ މެޗެވެ.
ބުދަ ދުވަހުގެ ރޭ ކުޅުނު މެޗު ފެށިގެން ފުރަތަމަ 10 މިނެޓުގެ ތެރޭގައި ޔުނައިޓެޑުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ އަށްވަނަ މިނެޓުގައި ޒުވާން މިޑްފީލްޑަރު ޝީ ލޭސީ އެ ޓީމަށް ފުރަތަމަ ލަނޑު ޖަހައިދިން އިރު، އޭގެ ދެ މިނެޓު ފަހުން މޭސަން މައުންޓް ވަނީ ދެވަނަ ލަނޑު ކާމިޔާބުކޮށްފައެވެ.
ނަމަވެސް، ފުރަތަމަ ހާފުގެ އިތުރު ވަގުތުގެ ތެރޭގައި ޗަރަލަމްޕޮސް ކޮސްޓޫލަސް ވަނީ ބްރައިޓަންއަށް ލަނޑެއް ޖަހައިދީ ނަތީޖާގެ ފަރަގު ކުޑަކޮށްދީފައެވެ.
ދެވަނަ ހާފުގައި ބްރައިޓަން އިން ކުޅުން ވަރުގަދަކޮށް، 65 ވަނަ މިނެޓުގައި ޕަސްކަލް ގްރޮސްގެ ލަނޑުން ނަތީޖާ ހަމަހަމަކުރިއެވެ. އަދި 70 ވަނަ މިނެޓުގައި ޔުނައިޓެޑްގެ ޑިފެންސަށް ހެދުނު ގޯހެއްގެ ފައިދާ ނަގައި، މެކްސިމް ޑި ކުއިޕާ ވަނީ ބްރައިޓަން މޮޅުކޮށްދިން ލަނޑު ކާމިޔާބުކޮށް ނަތީޖާ އަނބުރާލާފައެވެ.
މިއީ ވޭތުވެދިޔަ ނުވަ މަސް ދުވަހުގެ ތެރޭގައި ބްރައިޓަން އިން ޔުނައިޓެޑް ކަޕް މުބާރާތަކުން ބޭރުކޮށްލި ދެވަނަ ފަހަރެވެ. މި ނަތީޖާއާ ގުޅިގެން މެޗު ނިމުމުން ޔުނައިޓެޑްގެ ސަޕޯޓަރުން ވަނީ ޓީމަށް ވަރަށް ބޮޑަށް ނުރުހުން ފާޅުކޮށްފައެވެ.
މި ސީޒަނުގައި ކުޅުނު ހަ މެޗުގެ ތެރެއިން ތިން މެޗުން ޔުނައިޓެޑް ބަލިވެފައިވާއިރު، ކުރިއަށް އޮތް ޕްރިމިއާ ލީގު މެޗުގައި ފުލަމްއާ ދެކޮޅަށް ނުކުންނައިރު ކޯޗު މައިކަލް ކެރިކްގެ މައްޗަށް ވަނީ ބޮޑު ޕްރެޝަރެއް ކުރިމަތިވެފައެވެ.
މުބާރާތުގެ އެހެން މެޗެއްގައި އެސްޓަން ވިލާއިން ވަނީ 3-1 އިން ކޮވެންޓްރީ ބަލިކޮށްފައެވެ. މި މެޗުގައި ވިލާގެ ޓެމީ އަބްރަހަމް ދެ ލަނޑު އަދި ރޮސް ބާކްލީ ލަނޑެއް ޖެހިއިރު، ކޮވެންޓްރީގެ ހަމައެކަނި ލަނޑު ކާމިޔާބުކުރީ ވިކްޓަރ ޓޯޕްއެވެ.
ޗާލީ އަލްކަރާޒްގެ ލަނޑުން އެވަޓަން ވަނީ 1-0 އިން ވުލްވްސް ބަލިކޮށްފައެވެ. ހަތަރުވަނަ ޑިވިޝަނުގެ ފްލީޓްވުޑް ޓައުނުން 1-0 އިން ޝެފީލްޑް ޔުނައިޓެޑް ބަލިކޮށް، ތާރީޚުގައި ފުރަތަމަ ފަހަރަށް މުބާރާތުގެ ހަތަރުވަނަ ބުރަށް ވަނީ ދަތުރުކޮށްފައެވެ.
އަންގާރަ ދުވަހުގެ މެޗުތަކަށް ބަލާއިރު، އާސެނަލުން 4-2 އިން އިޕްސްވިޗް އަދި ލިވަޕޫލުން 3-1 އިން ޓޮޓެންހަމް ބަލިކުރިއިރު، ފުލަމް އަތުން ވެސްޓް ހޭމް ވަނީ 3-2 އިން ބަލިވެފައެވެ. މީގެއިތުރުން ބްރެންޓްފޯޑް ވަނީ 2-1 އިން ރެޑިންގް ބަލިކޮށްފައެވެ.
މި ލިޔުން ކިޔާލުމުން
