ސްޓެމްފޯޑް ބްރިޖުގައި ކުޅުނު ފޯރިގަދަ މެޗުގައި ބްރައިޓަން 4-3 އިން ބަލިކޮށް، އައު ކޯޗު ޒަބީ އަލޮންސޯގެ އިރުޝާދުގެ ދަށުން ޕްރިމިއާ ލީގުގައި ކުޅުނު ދެވަނަ މެޗުން ވެސް ޗެލްސީ މޮޅުވެއްޖެއެވެ.
މެޗު ފެށިގެން ހަތަރުވަނަ މިނެޓުގައި ޕެޑްރޯ ނެޓޯގެ ކޯނަރަކުން ރޯމިއޯ ލަވިއާ ވަނީ ޗެލްސީއަށް އޭނާގެ ފުރަތަމަ ލީގު ލަނޑު ޖަހައިދީ ލީޑު ހޯދައިދީފައެވެ. އަދި އޭގެ ކުޑައިރުކޮޅެއް ފަހުން ނެޓޯ އާއި ޔާއޯ ޕެޑްރޯ ކާމިޔާބުކުރި ލަނޑުތަކާއެކު ފުރަތަމަ ހާފުގެ 32 ވަނަ މިނެޓުގައި ޗެލްސީން ވަނީ 3-0 ގެ ފުޅާ ލީޑެއް ނަގާފައެވެ.
ފުރަތަމަ ހާފު ނިމެން ކައިރިވެފައި ވަނިކޮށް މާލިކް ޔަލްކޫޔޭ އޭނާގެ ފުރަތަމަ ލީގު ލަނޑާއެކު ބްރައިޓަންއަށް ފަރަގު ކުޑަކޮށްދިންއިރު، ދެވަނަ ހާފުގައި ޔާއޯ ޕެޑްރޯ އަތުން ބައިކޮޅަށް ވަން ލަނޑުން ބްރައިޓަން އުންމީދު އާކުރި ނަމަވެސް ކޯލް ޕާމާ ވަނީ ހިތްގައިމު ލަނޑަކުން ޗެލްސީގެ ލީޑު އަނެއްކާވެސް ފުޅާކޮށްފައެވެ.
މެޗުގެ އިތުރު ވަގުތުގައި ބްރައިޓަންގެ ޕަސްކަލް ގްރޮސް އިތުރު ލަނޑެއް ޖެހި ނަމަވެސް، އެ ޓީމަށް ނަތީޖާ ހަމަހަމަނުކުރެވި މެޗު ނިމުނީ ޗެލްސީ މޮޅުވެގެންނެވެ. މި ނަތީޖާއާއެކު ޗެލްސީ ތާވަލުގެ ތިންވަނައަށް އެރިއިރު، ބްރައިޓަން އޮތީ އަށްވަނައިގައެވެ.