ޗާލްސް ޑި ކެޓެލެއާ ފުރަތަމަ ހާފުގައި ކާމިޔާބުކުރި ދެ ލަނޑާއެކު، ފީފާ ވޯލްޑް ކަޕް 2026 ބާއްވާ ތިން ގައުމުގެ ތެރެއިން އެއް ގައުމު ކަމަށްވާ އެމެރިކާ 4-1 ގެ ނަތީޖާއަކުން ބަލިކޮށް ބެލްޖިއަމް މުބާރާތުގެ ކުއާޓާ ފައިނަލަށް ދަތުރުކޮށްފިއެވެ. ސިއެޓްލް ސްޓޭޑިއަމްގައި ކުޅުނު މި މެޗުން ބެލްޖިއަމް މޮޅުވުމާއެކު، މުބާރާތް ބާއްވާ ތިން ގައުމު ކަމަށްވާ ކެނެޑާ، މެކްސިކޯ އަދި އެމެރިކާ ވެސް މިހާރު ވަނީ މުބާރާތުން ކަޓާފައެވެ.
މެޗުގެ ކުރީކޮޅު ބެލްޖިއަމްއިން ވަނީ އެމެރިކާގެ ގޯލަށް ނުރައްކާކޮށްފައެވެ. އެގޮތުން ޓިމޮތީ ކަސްޓޭން ފޮނުވާލި ބާރު ހަމަލާ އެމެރިކާގެ ކީޕަރު މެޓް ފްރީޒް ދިފާއުކުރި ނަމަވެސް، މާގިނައިރެއް ނުވެ ބެލްޖިއަމްއިން ލީޑު ނެގިއެވެ. ނިކޮލަސް ރަސްކިން ތަނަވަސްކޮށްދިން ފުރުސަތަކުން ޗާލްސް ޑި ކެޓެލެއާ ވަނީ ފަސޭހަކަމާއެކު ބޯޅަ ގޯލުގެ ތެރެއަށް ފޮނުވާލާފައެވެ.
މެޗުގެ 31 ވަނަ މިނެޓުގައި މާލިކް ޓިލްމަން ހިލޭ ޖެހުމަކުން ލަނޑެއް ޖަހައި އެމެރިކާއަށް އުންމީދު އާކޮށްދިން ނަމަވެސް، އެ އުފާވެރިކަން ދެމިއޮތީ އެންމެ 116 ސިކުންތަށެވެ. ލެއަންޑްރޯ ޓްރޮސާޑް ނަގައިދިން ހުރަހަކުން ޑި ކެޓެލެއާ ބޮލުން ޖަހައި އޭނާގެ ދެވަނަ ލަނޑާއެކު ބެލްޖިއަމްއަށް އަލުން ލީޑު ހޯދައިދިނެވެ.
ދެވަނަ ހާފުގައި އެމެރިކާގެ ޑިފެންސަށް ހެދުނު ގޯހެއްގެ ފައިދާ ނަގައި ބެލްޖިއަމްގެ ހޭންސް ވެނާކަން ވަނީ އެޓީމުގެ ތިންވަނަ ލަނޑު ކާމިޔާބުކޮށްފައެވެ. މިއީ ވެނާކަން ވޯލްޑް ކަޕްގައި ޖެހި ފުރަތަމަ ލަނޑެވެ. މެޗުގެ ފަހުކޮޅުގައި އެމެރިކާއިން ކުޅުން ރަނގަޅުކޮށް ހަމަލާތަކެއް އުފެއްދި ނަމަވެސް، ބެލްޖިއަމްގެ ކީޕަރު ތިބޯ ކޯޓުއާ ވަނީ އެ ހަމަލާތައް ހުޝިޔާރުކަމާއެކު ދިފާއުކޮށްފައެވެ.
ބެލްޖިއަމްގެ ހަތަރުވަނަ ލަނޑު މެޗުގެ އިތުރު ވަގުތުގައި ކާމިޔާބުކޮށްދިނީ ބަދަލު ކުޅުންތެރިޔާ ރޮމެލޫ ލުކާކޫ އެވެ. މި ލަނޑާއެކު ލުކާކޫ ވެގެންގޮސްފައިވަނީ އޭނާގެ ކެރިއަރުގައި ޖެހިޖެހިގެން ތިން ވޯލްޑް ކަޕް މެޗުގައި ލަނޑު ޖެހި ފުރަތަމަ ކުޅުންތެރިޔާއަށެވެ.
ކުއާޓާ ފައިނަލްގައި ބެލްޖިއަމް ބައްދަލުކުރަން ޖެހޭނީ ޕޯޗުގަލް ކަޓުވާލުމަށްފަހު ދަތުރުކުރި ސްޕެއިންއާއެވެ. މި ފޯރިގަދަ މެޗު އޮންނާނީ ޖުލައި 10 ވަނަ ދުވަހު ލޮސް އެންޖެލިސް ސްޓޭޑިއަމްގައެވެ.