އާލިން ހާލަންޑް މެޗުގެ ފަހު ވަގުތު ކާމިޔާބުކޮށްދިން ލަނޑާއެކު 2-1 އިން އައިވަރީ ކޯސްޓް ބަލިކޮށް، ނޯވޭ އިން ފީފާ ވޯލްޑް ކަޕްގެ ގަދަ 16 ގެ ޖާގައެއް ކަށަވަރުކޮށްފިއެވެ. މިއީ 1998 ވަނަ އަހަރަށްފަހު ނޯވޭ އިން ވޯލްޑް ކަޕްގެ ނޮކްއައުޓް ބުރަށް ދަތުރުކުރި ފުރަތަމަ ފަހަރެވެ. ގަދަ 16 ގައި ނޯވޭ ނުކުންނާނީ ބްރެޒިލްއާ ދެކޮޅަށެވެ.
މި މެޗުގައި ނޯވޭއަށް ފުރަތަމަ ލީޑު ހޯދައިދިނީ އެންޓޯނިއޯ ނޫސާއެވެ. އޭނާ މި ލަނޑު ކާމިޔާބުކުރީ ޕެނަލްޓީ އޭރިއާގެ ވާތްފަރާތުން ބޯޅަ ހޯދުމަށްފަހު، އައިވަރީ ކޯސްޓްގެ ޕެޕޭ ކައިރިން ނައްޓާލާފައި ފޮނުވާލި ހިތްގައިމު ހަމަލާއަކުންނެވެ. މިއީ މި މުބާރާތުގައި ނޫސާ ކާމިޔާބުކުރި ފުރަތަމަ ލަނޑެވެ. މެޗުގެ 41 ވަނަ މިނެޓުގައި ނޯވޭގެ ލީޑު ފުޅާކުރުމަށް ހާލަންޑަށް ރަނގަޅު ފުރުސަތެއް ލިބުނު ނަމަވެސް، އިބްރާހިމް ސަންގާރޭ ވަނީ އެ ހަމަލާ ހުއްޓުވާފައެވެ.
އެމާސް ފައޭގެ އިރުޝާދުގެ ދަށުން ކުޅެމުންދިޔަ އައިވަރީ ކޯސްޓުން މެޗުގެ ކުރީކޮޅު ނުރައްކާތެރި ހަމަލާތަކެއް އުފެއްދިއެވެ. އެޓީމުން ނަތީޖާ ހަމަހަމަކުރީ ބަދަލު ކުޅުންތެރިއެއްގެ ގޮތުގައި ކުޅެން އެރި އަމާދު ދިއާލޯ ޖަހައިދިން ލަނޑުންނެވެ.
ނޯވޭ މޮޅުވި ލަނޑު މެޗުގެ ފަހު ވަގުތު ހާލަންޑް ކާމިޔާބުކުރީ ޕެޓްރިކް ބާގް ނަގައިދިން ހުރަހަކުންނެވެ. މިއީ 2026 ވަނަ އަހަރުގެ ވޯލްޑް ކަޕްގައި ހާލަންޑް ޖެހި ފަސްވަނަ ލަނޑެވެ. ހާލަންޑް ވަނީ މިހާތަނަށް ގައުމީ ޓީމަށް ކުޅުނު 53 މެޗުގައި 60 ލަނޑު ޖަހާފައެވެ.
މި މުބާރާތުގައި ހާލަންޑް ދައްކަމުންދާ މޮޅު ކުޅުމާއެކު އޭނާ ވަނީ ވޯލްޑް ކަޕްގެ ފުރަތަމަ ތިން މެޗުގައިވެސް ލަނޑު ޖަހާފައެވެ.