2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާއަށް ދިން ނުރައްކާތެރި އުދުވާނީ ހަމަލާތަކަށް 25 އަހަރު ފުރުނުއިރު، އުސާމާ ބިން ލާދިން އުފެއްދި އަލްޤައިދާ ޖަމާއަތަށް ބޮޑެތި ގޮންޖެހުންތަކަކާއި ނާކާމިޔާބީތަކެއް ކުރިމަތިވި ނަމަވެސް، އެ ދުނިޔެވީ ޖިހާދީ ނެޓްވޯކުގެ ނުފޫޒު މުޅިން ކެނޑިގެން ނުދެއެވެ.
އަލްޤައިދާ އުފެދުނީ 1980 ގެ އަހަރުތަކުގެ ފަހުކޮޅު، ސޯވިއެޓް-އަފްޣާން ހަނގުރާމައިގެ ތެރެއިން ސައޫދީގެ އުސާމާ ބިން ލާދިންގެ އިސްނެގުމުގެ މަތިންނެވެ. މި ޖަމާއަތުން 1992 އިން 1998 އަށް ޔަމަނުގައި ތިބި އެމެރިކާ ސިފައިންނަށާއި، ކެންޔާ އަދި ޓެންޒޭނިއާގައި ހުންނަ އެމެރިކާ އެމްބަސީތަކަށް ބޮމުގެ ހަމަލާތައް ދީ 224 މީހުން މަރާލިއެވެ. އޭގެ ފަހުން 2001 ވަނަ އަހަރު، ހަތަރު މަތިންދާބޯޓު ހައިޖެކްކޮށްގެން އެމެރިކާއަށް ދިން 9/11 ގެ ނުރައްކާތެރި ހަމަލާތަކުގައި ގާތްގަނޑަކަށް 3،000 މީހުން މަރުވިއެވެ.
9/11 ގެ ހަމަލާއަށްފަހު ފިލައިގެން އުޅުނު އުސާމާ ބިން ލާދިން 2011 ގައި ޕާކިސްތާނުގައި އެމެރިކާ ސިފައިން މަރާލާފައިވާއިރު، އެ ހަމަލާގެ މޭސްތިރިޔާ ޚާލިދު ޝެއިޚް މުޙައްމަދު 2003 ގައި ވަނީ ހައްޔަރުކޮށްފައެވެ. ގުއަންޓަނާމޯ ބޭގައި ބަންދުކޮށްފައިވާ ޚާލިދުގެ ޝަރީއަތް 2028 ވަނަ އަހަރުގެ ޖޫން މަހު ހިންގުމަށް މިހާރު ވަނީ އަމުރުކޮށްފައެވެ. ބިން ލާދިންއަށްފަހު އަލްޤައިދާއާ ހަވާލުވި އައިމަން އަލް-ޒަވާހިރީ 2022 ގައި ޑްރޯން ހަމަލާއެއްގައި މަރާލާފައިވާއިރު، މިހާރު އެ ޖަމާއަތުގެ ހަގީގީ ލީޑަރަކީ މިސްރުގެ ސައިފުލް އަދްލު ކަމަށް ބެލެވެއެވެ.
2001 ގެ ފަހުން އަލްޤައިދާއިން ބާލީ (2002)، މެޑްރިޑް (2004) އަދި ލަންޑަން (2005) ފަދަ ރަށްތަކުގައި ނުރައްކާތެރި ހަމަލާތައް ދީ، އިރާގު، އުތުރު އެފްރިކާ އަދި ޔަމަނުގައި ގޮފިތައް އުފެއްދިއެވެ. ނަމަވެސް، 2014 ގައި އަބޫބަކުރު އަލް-ބަޣްދާދީ އިސްލާމިކް ސްޓޭޓް (އައިއެސް) އުފައްދައި އަލްޤައިދާއިން ވަކިވުމާއެކު ދެ ޖަމާއަތުގެ މެދުގައި ބޮޑު ވާދަވެރިކަމެއް އުފެދުނެވެ. އަދި 2016 ގައި ސީރިއާގެ ނުސްރާ ފްރަންޓްވެސް އަލްޤައިދާއިން ވަކިވިއިރު، އެ ޖަމާއަތުގެ ލީޑަރު އަހުމަދު އައް-ޝަރައު ވަނީ 2024 ގައި ބައްޝާރުލް އަސަދުގެ ވެރިކަން ވައްޓާލައި ސީރިއާގެ ރައީސްކަމަށް ވަޑައިގެންފައެވެ.
މިއަދު އަލްޤައިދާގެ އެންމެ ބޮޑު ނުފޫޒެއް އޮތީ ސޯމާލިއާގެ އަލްޝަބާބު އަދި ހުޅަނގު އެފްރިކާގެ ސާހިލް ސަރަހައްދުގައި ހަރަކާތްތެރިވާ ޖޭއެންއައިއެމް ގައެވެ. މީގެ އިތުރުން ޕާކިސްތާން ތާލިބާން (ޓީޓީޕީ) އަށްވެސް އަލްޤައިދާގެ ފިކުރީ އަދި ތަމްރީނު އެހީތެރިކަން ލިބެމުންދެއެވެ. މަޝްހޫރު ވަކިވަކި ލީޑަރުންނަށް ބަރޯސާވުމުގެ ބަދަލުގައި، އަލްޤައިދާއިން މިހާރު ވަނީ ދެނެގަންނަން އުނދަގޫ، އާންމުކޮށް ފެންނަން ނުތިބޭ އޮޕަރޭޓިވުންގެ ޓީމުތަކަކަށް އެ ޖަމާއަތުގެ އުސޫލުތައް ބަދަލުކޮށްފައި ކަމަށް މާހިރުން ފާހަގަކުރެއެވެ.
މި ލިޔުން ކިޔާލުމުން
