ޣައްޒާގައި ހަރަކާތްތެރިވާ ހަމާސް ޖަމާއަތާ ދެކޮޅަށް އިޒްރޭލުން ކުރަމުންދާ ލާއިންސާނީ ހަނގުރާމައިގައި އިސްރާއީލު ސިފައިން ހިންގާ ޖަރީމާތައް ކުރިއަށް ގެންދިއުމުގެ ފުރުސަތު ނުދެވޭނެ ކަމަށް އދ.ގެ އިންސާނީ އެހީގެ އެންމެ އިސް އޮފިޝަލް ވިދާޅުވެއްޖެ އެވެ.
"އުތުރު ޣައްޒާގެ މުޅި އާބާދީ މަރުވުމުގެ ނުރައްކާ އެބައޮތް،" އދ. ގެ ހިއުމެނިޓޭރިއަން އެފެއާޒްގެ އެކްޓިން އަންޑާ ސެކްރެޓަރީ ޖެނެރަލް އަދި އެ ޖަމްޢިއްޔާގެ އިމަޖެންސީ ރިލީފް ކޯޑިނޭޓަރު، ޖޮއިސް އެމްސޫޔާ ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި ވިދާޅުވެފައި ވެއެވެ.
އިޒްރޭލުން ވަނީ އެ ސަރަހައްދުގެ ހޮސްޕިޓަލްތަކަށް ހަމަލާދީ ސިއްހީ ހިދުމަތްތެރިން ރަހީނުކޮށް އަދި އިމާރާތްތަކުގެ ދަށުގައި ތާށިވެފައި ތިބި މީހުން ސަލާމަތް ކުރުމަށް އެ ތަންތަނަށް ދާ ފަސްޓް ރެސްޕޮންޑަރުންނަށް ހުރަސް އަޅާފައި ކަމަށް ޖޮއިސް ވިދާޅުވިއެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ހެޑް، ޓެޑްރޯސް އަދަނޮމް ގެބްރިޔޭސުސް ވެސް ވަނީ ޖޮއިސްގެ މި ސްޓޭޓްމެންޓަށް ތާއީދު ކުރައްވައި، ޣައްޒާގެ "ނުރައްކާތެރި" ހާލަތާ މެދު ކަންބޮޑުވުން ފާޅުކުރައްވާފައެވެ.
ޑަބްލިއުއެޗްއޯގެ ޑިރެކްޓާ ޖެނެރަލް އިތުރަށް ވިދާޅުވީ ޣައްޒާގެ އުތުރުގައި ހިންގަމުންދާ މަދު މެޑިކަލް ފެސިލިޓީތަކުގެ ތެރޭގައި ހިމެނޭ ޖަބާލިއާ ސިޓީގެ ކަމާލް އަދްވާން ހޮސްޕިޓަލަށް އަމާޒުކޮށް އިޒްރޭލުން ގިނަ ހަމަލާތަކެއް ދީފައިވާ ކަމަށެވެ. އަދި މި ހޮސްޕިޓަލުގައި މަސައްކަތް ކުރާ 44 ފިރިހެން މުއައްޒަފުން އިޒްރޭލުގެ އަސްކަރިއްޔާއިން ހިފެހެއްޓުމުގެ ސަބަބުން ބަލި މީހުން ބަލަހައްޓަން ބާކީ ތިބީ މަދު އަދަދެއްގެ މުވައްޒަފުން ކަމަށް އޭނާ ވިދާޅުވިއެވެ.
ނަމަވެސް، އައިޑީއެފް އިން ބުނީ އެ ފެސިލިޓީގެ ވަށައިގެން ސިފައިން ހަރަކާތްތެރިވަނީ ޓެރަރިސްޓުންނާއި ޓެރަރިސްޓް މަރުކަޒުތައް އެ ސަރަހައްދުގައި ހުރި ކަމުގެ އިންޓެލިޖެންސް މައުލޫމާތުގެ މައްޗަށް ބިނާކޮށް ކަމަށެވެ.
އިޒްރޭލުން ޣައްޒާގައި ދެމުން ގެންދާ ހަމަލާތަކަށް އަހަރެއް ވެފައި ވާއިރު މިހާތަނަށް ފަލަސްތީނުން 42،924 މީހަކު ވަނީ ޝަހީދުވެފަ އެވެ.
މި ލިޔުން ކިޔާލުމުން
