ފަރަންސޭސިވިލާތާއި ގަތަރުން ލުބްނާނަށް އިންސާނީ އެހީތެރިކަން ފޯރުކޮށްދީފައިވާކަމަށް ފްރާންސްގެ ޚާރިޖީ ވަޒީރު ވިދާޅުވެއްޖެއެވެ.
"އަޅުގަނޑުމެން އެއްވެސް ކަމެއް ނުކޮށްފިނަމަ މާދަމާ ލުބްނާން، ސީރިޔާ އޮތް ހާލަތަށް ވެއްޓިދާނެ" ފަރަންސޭސިވިލާތުގެ ގާނޫނު ހަދާ މަޖިލީހުގެ މެމްބަރުންނާ ވާހަކަ ދައްކަވަމުން ޖީން ނޯއެލް ބަރޮޓް ވިދާޅުވިއެވެ.
ފަރަންސޭސިވިލާތާއި ގަތަރުގެ އަސްކަރީ މަތިންދާބޯޓުތަކުން 27 މެޓްރިކް ޓަނުގެ ބޭހާއި ޒަރޫރީ ބޭނުންތަކަށް ބޭނުންވާ ތަކެތި ލުބުނާނަށް ފޯރު ކޮށްދީފައިވާ ކަމަށް އޭނާ ވިދާޅުވިއެވެ.
ފްރާންސަކީ ލުބުނާނާއެކު ތާރީޚީ ގުޅުމެއް އޮންނަ ގައުމެކެވެ. މި ދެ ގައުމު ގުޅިގެން ދިޔައީ މެދުއިރުމަތީގެ ގައުމުތަކުގައި ހަނގުރާމަ ހުއްޓާލުމަށް އެމެރިކާއާއި ގުޅިގެން މަސައްކަތް ކުރަމުންނެވެ. ނަމަވެސް އެ މަޝްވަރާތައް ހުއްޓާލީ ސެޕްޓެމްބަރު މަހުގެ ފަހުކޮޅު އިޒްރޭލުން ބެއިރޫތުގެ ދެކުނުގެ އަވަށްތަކަށް ވަރުގަދަ ބޮމުގެ ހަމަލާތަކެއް ދީ، ހިޒްބުالله ގެ ޒަމާންވީ ލީޑަރު ޙަސަން ނަޞްރުالله އަވަހާރަކޮށްލުމުންނެވެ.
ފަރަންސޭސިވިލަތާއި ގަތަރުން މިހާރު ދަނީ ޒަޚަމުވި މީހުންނާއި ގެދޮރު ގެއްލިފައިވާ މީހުންނަށް އެހީވާ ލޯކަލް އެއިޑް ގްރޫޕްތަކަށް އެހީތެރިވަމުންނެވެ.
ފަރަންސޭސިވިލާތުން ވަރަށް އަވަހަށް ލުބްނާނާބެހޭ ކޮންފަރެންސެއް ބޭއްވުމަށް މަސައްކަތް ކުރަމުން އަންނަ ކަމަށާއި، އެ ކޮންފަރެންސްގައި ލުބުނާނުގެ އަސްކަރިއްޔާ ހަރުދަނާ ކުރުމާއި، އެ ގައުމަށްދޭ ދޭ އިންސާނީ އެހީ އިތުރު ކުރުން ފަދަ ކަންކަމާ ގުޅޭގޮތުން މަޝްވަރާ ކުރެވިގެންދާނެ ކަމަށް ފަރަންސޭސި ޚާރިޖީ ވަޒީރު ވިދާޅުވިއެވެ.
މި ލިޔުން ކިޔާލުމުން
