ސައުދީ އަރަބިއްޔާގެ މައްކާއާއި މަދީނާގެ އިތުރުން ރިޔާޟް ފަދަ މުހިންމު ސަރަހައްދުތަކަށް އަމާޒުކޮށް ޔަމަނުގެ ހޫޘީން ދިން ހަމަލާތަކެއް ސައުދީގެ ވައިގެ ދިފާއީ ބާރުތަކުން ހުއްޓުވައިފިއެވެ.
ޔަމަނުގައި ހަރަކާތްތެރިވާ ސައުދީ އިސްވެ އޮންނަ އަސްކަރީ ކޯލިޝަނުން މައުލޫމާތު ދީފައިވާ ގޮތުގައި، ހުކުރު އަދި ހޮނިހިރު ދުވަހު ހޫޘީން ވަނީ ސައުދީގެ އެކި ހިސާބުތަކަށް އަމާޒުކޮށް ދެ މިސައިލާއި ތިން ޑްރޯން ފޮނުވާލާފައެވެ. އޭގެ ތެރޭގައި ހުޅަނގު ސަރަހައްދަށް އަމާޒުކުރި ކްރޫޒް މިސައިލަކާއި، ދެކުނަށް ފޮނުވާލި ބެލިސްޓިކް މިސައިލެއް ހިމެނެއެވެ. މި ހުރިހާ ހަމަލާއެއް ވަނީ ވައިގެ ތެރޭގައި ނައްތާލާފައެވެ.
މީގެ އިތުރުން، ސައުދީގެ ތެލުގެ މުއްސަނދިކަން ލިބިފައިވާ އިރުމަތީ ސަރަހައްދަށް އަމާޒުކޮށް ހޫޘީން ފޮނުވާލި ޑްރޯނެއް ހުއްޓުވައި ވައްޓާލާފައިވާ ކަމަށާއި، ދެކުނު ސަރަހައްދަށް އަމާޒުކޮށް ފޮނުވާލި އެހެން ޑްރޯނެއް ވެސް ފަހުން ނައްތާލާފައިވާ ކަމަށް ކޯލިޝަނުން ބުނެފައިވެއެވެ.
ކޯލިޝަނުގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ ފާހަގަކުރި ގޮތުގައި، މި ހަމަލާތަކަކީ ވޭތުވެދިޔަ ބުރާސްފަތި ދުވަހު ރިޔާޟާއި އިރުމަތީ ޕްރޮވިންސަށް އަމާޒުކޮށް ފޮނުވާލި ތިން ބެލިސްޓިކް މިސައިލް ހުއްޓުވުމަށްފަހު، ޖެހިޖެހިގެން ދިން ހަމަލާތަކެކެވެ.
ހުކުރު ދުވަހު މަދީނާއަށް އަމާޒުކޮށް ހޫޘީން ފޮނުވާލި ޑްރޯނެއް ވައްޓާލި ކަމަށް ކޯލިޝަނުން ބުނި ނަމަވެސް، ހޫޘީން ވަނީ އެ ދުވަހު އެއްވެސް ހަމަލާއެއް ނުދޭ ކަމަށް ބުނެފައެވެ. މައްކާއާއި މަދީނާއަށް އަމާޒުކޮށް ހަމަލާދޭ ކަމަށް ސައުދީން ކުރާ ތުހުމަތުތައް އެ ޖަމާއަތުން އަބަދުވެސް ދޮގުކުރެއެވެ.
މި ހަމަލާތަކާ ގުޅިގެން ސައުދީގެ ސިވިލް ޑިފެންސްއިން ވަނީ ރައްޔިތުންގެ ސަލާމަތަށްޓަކައި ހާއްސަ އިރުޝާދުތަކެއް ނެރެފައެވެ. އެގޮތުން ނުރައްކަލުގެ އިންޒާރު ލިބޭ ވަގުތުތަކުގައި ބިއްލޫރި ކުޑަދޮރުތަކާއި، ބެލްކަނީ އަދި ފުރާޅު ފަދަ ހާމަ ތަންތަނަށް ނުނިކުމެ، ރައްކާތެރިކަމުގެ ފިޔަވަޅުތައް އެޅުމަށް ވަނީ އިލްތިމާސްކޮށްފައެވެ.
ސައުދީގެ އިގްތިސާދީ މައި އިންޖީނު ކަމުގައި ބެލެވޭ އިރުމަތީ ސަރަހައްދަށް، ވޭތުވެދިޔަ ހަފުތާތަކުގެ ތެރޭގައި ހޫޘީންގެ ހަމަލާތައް ވަނީ ގިނައިން އަމާޒުކޮށްފައެވެ. ދުނިޔޭގެ އެންމެ ބޮޑު ތެޔޮ ކުންފުނި ކަމަށްވާ ސައުދީ އަރާމްކޯގެ މައި މަރުކަޒު ހުންނަ މި ސަރަހައްދަށް އޮކްޓޯބަރު މަހުގެ ކުރީކޮޅު ދިން ހަމަލާއެއްގައި ވެސް ބޮޑެތި ގެއްލުންތަކެއް ވަނީ ލިބިފައެވެ.
