ޓިއުނީޝިއާގެ ރިޔާސީ އިންތިހާބުގައި މިހާރުގެ ރައީސް ކައިސް ސައީދު ދެވަނަ ދައުރެއް ކާމިޔާބު ކުރައްވާފައިވާ ކަމަށް އެ ގައުމުގެ އިލެކްޝަންސް ކޮމިޝަނުން ބުނެފި އެވެ.
އިންޑިޕެންޑެންޓް ހައި އޮތޯރިޓީ ފޯ އިލެކްޝަންސް އޮފް ޓިއުނީޝިއާ (އައިއެސްއައިއީ) ގެ ހެޑް ހޯމަ ދުވަހު ގައުމީ ޓީވީގައިށް ދިން އިންޓަވިއުއެއްގައި ވިދާޅުވީ ސައިދަށް 90.7 ޕަސެންޓް ވޯޓު ލިބިވަޑައިގެންފައިވާ ކަމަށެވެ.
އައިއެސްއައިއީއިން ބުނީ އާދީއްތަ ދުވަހު ބޭއްވި އިންތިޚާބުގައި ވޯޓުލީ މީހުންގެ ނިސްބަތަކީ 28.8 އިންސައްތަ ކަމަށާއި މިއީ 2011 ވަނަ އަހަރަށް ފަހު ރިޕޯޓް ކުރެވުނު އެންމެ ދަށް އަދަދު ކަމަށެވެ. އެ ކޮމިޝަނުގެ ތަރުޖަމާނު މުހައްމަދު ޓްލީ މަންސްރީ މީގެ ކުރިން ވިދާޅުވީ ވޯޓުލާ މީހުންގެ އަދަދު ގާތްގަނޑަކަށް 30 ޕަސެންޓް ހުންނާނެ ކަމަށް އުންމީދު ކުރާ ކަމަށެވެ.
ކައިސް ސައީދު އިންތިޚާބު ކާމިޔާބުކުރެއްވީ ޕާޓީގެ ލީޑަރު ޒޫހައިރު މަގްޒައުއީއާ މަޝްހޫރު ވިޔަފާރިވެރިއެއް ކަމުގައިވާ އަޔާޗީ ޒަމްމެލްގެ މައްޗަށް ކުރު ހޯދައިގެންނެވެ. ނަމަވެސް އިންތިޚާބަށް ވަގުތު ކުޑަތަންވެފައި ވަނިކޮށް އަޔާޗީ ޒަމްމެލްގެ މައްޗަށް ދައުވާއެއް އުފުލައި އޭނާ ވަނީ ޖަލަށް ލާފައެވެ.
2019 ވަނަ އަހަރުން ފެށިގެން ވެރިކަމުގައި ހުންނެވި ސައީދު ވަނީ ސިޔާސީ އިދިކޮޅު ފަރާތްތަކަށާއި ފާޑުކިޔާ އެހެން ފަރާތްތައް ހައްޔަރުކޮށްފައެވެ.
ސައީދުގެ އިދިކޮޅުގައި ތިބި ބޮޑެތި ޕާޓީތަކުގެ އިސް ބޭފުޅުން ފާއިތުވި އަހަރެއްހާ ދުވަހުގެ ތެރޭގައި ޖަލަށްލާފައިވާއިރު، އާދީއްތަ ދުވަހުގެ ވޯޓުގައި އެ ޕާޓީތަކުން އިންތިޚާބުގައި ވާދަކުރި ތިން ކެނޑިޑޭޓުންގެ ތެރެއިން އެއްވެސް ކެނޑިޑޭޓަކަށް ތާއީދުކޮށްފައެއް ނުވެއެވެ.
2021 ވަނަ އަހަރު ސައީދު ވަނީ އިންތިހާބުކުރި މަޖިލިސް އުވާލައި، ގާނޫނު އަސާސީ އަލުން ލިޔުއްވާފަ އެވެ.
މި ލިޔުން ކިޔާލުމުން
