ޕާކިސްތާނުގެ ކަރާޗީ އެއާޕޯޓު ކައިރީ ބޮމެއް ގޮވައިގެން ހިނގި ހާދިސާގައި ޗައިނާ ދެ މީހަކު މަރުވެ އެކަކު ޒަޚަމް ވެފައިވަ ކަމަށް ޕާކިސްތާނުގައި ހުންނަ ޗައިނާ އެމްބަސީން ބުނެފިއެވެ.
އެމްބަސީން ބުނީ މި ހަމަލާ ދީފައިވަނީ އާދީއްތަ ދުވަހުގެ ރޭ 11:00 ހާއިރު ޖިނާހު އިންޓަނޭޝަނަލް އެއާޕޯޓު ކައިރީގައި ކަމަށާއި ހަމަލާ ދީފައި ވަނީ ޕޯޓް ގާސިމް އިލެކްޓްރިކް ޕަވާ ކޮމްޕެނީގެ ޗައިނާ މުވައްޒަފުންނަށް އަމާޒުކޮށް ކަމަށެވެ.
ޗައިނާ އެމްބަސީން މިއަދު ނެރުނު ބަޔާނެއްގައި ވަނީ "ޓެރަރިސްޓް ހަމަލާ" ކުށްވެރިކޮށް، ޕާކިސްތާނުގެ ފަރާތުން އެ ހަމަލާ ފުރިހަމައަށް ތަހުގީގުކޮށް އެކަން ކުރި މީހުންނަށް ހަރުކަށި އަދަބު ދިނުމަށާއި، ޕާކިސްތާނުގައި ތިބި ޗައިނާގެ ރައްޔިތުންނާއި ޗައިނާއިން އެ ގައުމުގައި ހިންގާ މުއައްސަސާތަކާއި މަޝްރޫއުތަކުގެ ސަލާމަތާއި ރައްކާތެރިކަމަށް އަޅަންޖެހޭ ހުރިހާ ފިޔަވަޅެއް އެޅުމަށް އެދިފަ އެވެ.
ރެސްކިއު އޮފިޝަލް ހަސަން ޚާން ނޫހަކަށް މައުލޫމަތު ދިން ގޮތުގައި ގޮވުމުގެ ސަބަބުން ހިނގި އަލިފާނުގެ ހާދިސާގައި 10 ވެހިކަލަކަށް ގެއްލުންވެފައިވާ ކަމަށާއި ހަތަރު ކާރެއް ބޭނުން ނުކުރެވޭ ވަރަށް ހަލާކުވެފައިވާ ކަމަށެވެ.
ޕާކިސްތާނުގެ ހަތިޔާރު އެޅި ޖަމާއަތެއް ކަމަށްވާ ބަލޫޗިސްތާން ލިބަރޭޝަން އާމީ (ބީއެލްއޭ) އިން މީގެ ކުރިން ނޫސްވެރިންނަށް އީމެއިލްކޮށް ނެރުނު ބަޔާނެއްގައި ބުނެފައި ވަނީ އެ ހަމަލާގެ ފަހަތުގައި ވަނީ އެ ޖަމާއަތުން ކަމަށެވެ. އަދި މި ހަމަލާ ދީފައިވަނީ އިމްޕްރޮވައިސް އެކްސްޕްލޯސިވް ޑިވައިސްއެއް ބޭނުން ކޮށްގެން ކަމަށެވެ.
މި ލިޔުން ކިޔާލުމުން
