ތައިލެންޑުގެ އުތުރުގެ ސިޓީއެއް ކަމަށްވާ ޗިއާންގް މައިގައި ފެންބޮޑުވެ ތިން މީހަކު މަރުވެއްޖެ އެވެ.
ޓޫރިސްޓުންގެ މެދުގައި މަގުބޫލު މަންޒިލެއް ކަމަށްވާ އެ ސިޓީއަށް ހޮނިހިރު ދުވަހުގެ ރޭ ބޯކޮށް ވާރޭވެހި ފެންބޮޑުވެފައި ވަނީ ޕިންގް ކޯރު އޯވާފްލޯ ވުމުގެ ސަބަބުންނެވެ. ކޯރުގެ ފެނުގެ އުސްމިން 17.4 ފޫޓަށް އުފުލިފައިވާއިރު މިއީ ފާއިތުވި 50 އަހަރުގެ ތެރޭގައި ކޯރު ފެނުގެ އުސްމިން އެންމެ މައްޗައް އުފުލުނު ފަހަރެވެ.
ފެންބޮޑުވުމެގެ ސަބަބުން އެ ސަރަހައްދުގައި ދިރިއުޅޭ މީހުން ރައްކާތެރި ހިސާބުތަކަށް ގެންގޮސްފައިވާއިރު، އެ ސަރަހައްދުގައި ތިބި ފަތުރުވެރިން ވެސް ވަނީ ޓްރަކް ތަކުގައި ފެންބޮޑުވި ސަރަހައްދުން ރައްކާތެރި ހިސާބުތަކަށް ގެންގޮސްފައެވެ.
ފެންބޮޑުވި ހިސާބުގައި ތިބި ގިނަ ފިހާރަތައް ބަންދުކުރަން މަޖުބޫރުވެފައިވާއިރު، އެ އަވަށުގެ ސެންޓްރަލް ރޭލް ސްޓޭޝަން ވެސް ވަނީ ފެންބޮޑުވުމުގެ ސަބަބުން ބަންދު ކޮށްފައެވެ.
ޗިއާންގް މައިގެ ޕަބްލިކް ހެލްތު އޮފިޝަލެއް ކަމަށްވާ ސަރިޓްޑޭޓް ޗަރޮއެންޗައި ވިދާޅުވީ މި ހާދިސާގައި ތިން މީހަކު މަރުވެފައިވާ ކަމަށާއި އޭގެ ތެރޭގައި ކަރަންޓުގައި ޖެހުނު 44 އަހަރުގެ ފިރިހެނަކާއި، ބިންގަނޑު ކަނޑައިގެން ދިޔުމުގެ ސަބަބުން 33 އަހަރުގެ އަންހެނެއް މަރުވި ކަމަށް އޭނާ ވިދާޅުވިއެވެ.
ފެން ބޮޑުވުމުގެ ސަބަބުން ގާތްގަނޑަކަށް ގިނަ މެޑިކަލް ސެންޓަރުތައް ބަންދުކުރަން ޖެހުމުގެ ސަބަބުން 80 އަށް ވުރެ ގިނަ މީހުން ސަލާމަތީ ހިޔާތަކަށް ބަދަލުކޮށްފައިވާ ކަމަށް އޭނާ ވިދާޅުވިއެވެ.
މިދިޔަ ސެޕްޓެމްބަރު މަހުގެ ކުރީކޮޅު ތައިލޭންޑްއަށް އެރި ތޫފާން ޔާގީ ގެ ސަބަބުން އެ ގައުމުގެ އުތުރުގެ ޕްރޮވިންސްތަކުގައި ފެންބޮޑުވުމުގެ ހާދިސާތައް ހިނގަމުންދާއިރު، މި ހާދިސާތަކުގެ ސަބަބުން އެ ޕްރޮވިނސް ތަކުގައި ދިރިއުޅޭ މީހުންނަށާއި އެ މީހުންގެ މުދަލަށް ދަނީ ބޮޑެތި ގެއްލުންތަކެއް ލިބެމުންނެވެ.
މިވަގުތު ތައިލެންޑުގެ 76 ޕްރޮވިންސްގެ ތެރެއިން 20 ޕްރޮވިންސެއްގައި ވަނީ ބޯ ވިއްސާރައިގެ ސަބަބުން ކޯރުތައް ބަންޑުންވެ ފެންބޮޑުވެފައެވެ.
މި ލިޔުން ކިޔާލުމުން
