ޔޫކްރެއިންގެ ޑްނިޕްރޮޕެޓްރޯވްސްކް އަދި ޚާރްކީވް ސަރަހައްދުތަކުގެ ހަކަތައިގެ ވަސީލަތްތަކަށް ރަޝިޔާއިން ދިން ވައިގެ ހަމަލާތަކާ ގުޅިގެން، ގާތްގަނޑަކަށް 850،000 މީހުންނަށް ކަރަންޓުގެ ޚިދުމަތް ކެނޑިއްޖެއެވެ.
އިރުމަތީ ޑްނިޕްރޮޕެޓްރޯވްސްކް ސަރަހައްދުގެ ހަކަތަ އުފައްދާ މަރުކަޒަކަށް ރޭގަނޑު ދިން ހަމަލާއެއްގައި 600،000 އަށް ވުރެ ގިނަ މީހުންގެ ކަރަންޓު ކެނޑިފައިވާ ކަމަށް، ޔޫކްރެއިންގެ ހަކަތައިގެ ކުންފުންޏެއް ކަމަށްވާ ޑީޓެކްއިން ވަނީ ކަށަވަރުކޮށްދީފައެވެ.
ޓެލެގްރާމް މެދުވެރިކޮށް އެ ކުންފުނިން ބުނީ، ޕަވްލޯގްރޭޑް، ސަމަރިވްސްކީ، ކާމިއަންސްކޭ، ޑްނިޕްރޯ ޑިސްޓްރިކްޓް އަދި ޑްނިޕްރޯ ސިޓީގެ ރައްޔިތުންނަށް ކަރަންޓުގެ ޚިދުމަތް ކެނޑިފައިވާ ކަމަށެވެ.
ގެއްލުން ލިބުނު ތަންތަން މަރާމާތުކުރުމަށް އިންޖިނިއަރުން މަސައްކަތްކުރަމުން ދިޔަ ނަމަވެސް، ތަކުރާރުކޮށް ދެމުންދާ ހަމަލާތަކުގެ ސަބަބުން އެ މަސައްކަތަށް ބޮޑެތި ހުރަސްތަކެއް ކުރިމަތިވަމުންދާ ކަމަށްވެސް ޑީޓެކްއިން ބުނެފައިވެއެވެ.
މީގެ އިތުރުން، ޚާރްކީވް ސަރަހައްދަށް ދިން ހަމަލާތަކާ ގުޅިގެން އިތުރު 250،000 މީހުންގެ ކަރަންޓުގެ ޚިދުމަތް ވަނީ ކެނޑިފައެވެ. މި ހަމަލާތަކުގައި އެއްވެސް މީހަކަށް އަނިޔާވި ކަމުގެ ރިޕޯޓެއް އަދި ލިބިފައި ނުވެއެވެ.
ރަޝިޔާއިން ދެމުންދާ ޑްރޯން އަދި މިސައިލް ހަމަލާތައް ވަރުގަދަކޮށްފައިވާއިރު، ފިނި މޫސުން ކައިރިވެފައިވާ މި ދަނޑިވަޅުގައި ކަރަންޓު ކެނޑުމުގެ އަސަރު ގިނަ ބަޔަކަށް ކުރާނެއެވެ.
މީގެ ކުރިންވެސް، ހަކަތަ އުފައްދާ ތަންތަނަށް ދިން ވަރުގަދަ ހަމަލާތަކުގެ ސަބަބުން ފަސް ސަރަހައްދެއްގައި ކަރަންޓު ކެނޑިފައިވާ ކަމަށް ޔޫކްރެއިންގެ އެނަރޖީ މިނިސްޓްރީން ވަނީ ހާމަކޮށްފައެވެ.
