މުސާރަ ކުޑަވުމާއި ދިރިއުޅުމުގެ ޚަރަދު ބޮޑުވުމާ ގުޅިގެން ބަންގްލަދޭޝްގެ ފޭރާން އުފައްދާ ފެކްޓަރީތަކުގެ މަސައްކަތްތެރިން ކުރަމުންދާ މުޒާހަރާތަކާ ގުޅިގެން، އެތައް ސަތޭކަ ފެކްޓަރީއެއްގެ މަސައްކަތްތައް ހުއްޓުމަކަށް އަތުވެއްޖެއެވެ.
ހޮނިހިރު ދުވަހު މުޒާހަރާތައް ފެށުމާއެކު، ގާތްގަނޑަކަށް 500 ފެކްޓަރީ ވަގުތީ ގޮތުން ބަންދުކުރަން ޖެހުނެވެ. މި މުޒާހަރާތައް މިއަދަށް ތިން ދުވަސް ވެފައިވާއިރު، އެތައް ހާސް މަސައްކަތްތެރިން ވަނީ މަގުތަކަށް ނުކުމެފައެވެ.
ވެރިރަށް ޑާކާގެ މިރުޕޫރު އިންޑަސްޓްރިއަލް ސަރަހައްދުގައި ފުލުހުން ގިނަ އަދަދަކަށް ހަރަކާތްތެރިވަމުންދާއިރު، ސަވަރު، އަޝޫލިއާ އަދި ގާޒީޕޫރުގައިވެސް މުޒާހަރާތައް ދަނީ ހިނގަމުންނެވެ. މުޒާހަރާތައް ހުއްޓުވުމަށް ފުލުހުން ވަނީ ކަރުނަގޭހާއި ސައުންޑް ގްރެނޭޑް ބޭނުންކޮށްފައެވެ.
މަސައްކަތްތެރިން އެދެމުންދަނީ އެންމެ ކުޑަ މުސާރައިގެ ގޮތުގައި މަހަކު 30,000 ޓަކާ (242 ޑޮލަރު) ދިނުމަށެވެ. މިއީ މިހާރު އެމީހުންނަށް ލިބޭ 12,500 ޓަކާ (101 ޑޮލަރު) އަށްވުރެ ދެގުނައަށްވުރެ ގިނަ އަދަދެކެވެ.
މުޒާހަރާތައް ހަމަޖެއްސުމުގެ ގޮތުން، ބަންގްލަދޭޝްގެ ސަރުކާރުން ވަނީ މި ދާއިރާގެ އެންމެ ކުޑަ މުސާރަ ކަނޑައެޅުމަށް އާ ވޭޖް ބޯޑެއް އެކުލަވާލާފައެވެ. މީގެ އިތުރުން، ބޮޑުވަޒީރު ތާރިޤް ރަޙްމާން ވަނީ ވަޒީރުންނާއި އެޑްވައިޒަރުންނާއެކު ކުއްލި ބައްދަލުވުމެއް ބާއްވާފައެވެ.
ބަންގްލަދޭޝްގެ ފޭރާން އުފައްދާ ސިނާއަތުގެ އާމްދަނީ 38 ބިލިއަން ޑޮލަރަށް އަރާއިރު، އެއީ އެ ޤައުމަށް އެކްސްޕޯޓް އާމްދަނީ ލިބޭ އަދި ވަޒީފާގެ ފުރުސަތުތައް ފަހިކޮށްދޭ މައިގަނޑު ދާއިރާއެވެ.
