ސަލާމަތީ ނުރައްކާތަކާ ހެދި ޗައިނާއާއި ރަޝިއާގައި އުފައްދާ ބައެއް ހާޑްވެއާ އަދި ސޮފްޓްވެއާތައް، އެމެރިކާގައި އުފައްދާ ކާރާއި ޓްރަކް އަދި ބަސްތަކުގައި މަނާކުރަން އެމެރިކާއިން ދަނީ ތައްޔާރުވަމުންނެވެ.
އެމެރިކާގެ އޮފިޝަލުން ވިދާޅުވީ އަމިއްލަ އަށް ކާރުތައް ދުއްވުމަށާއި، އެހެން ނެޓްވޯކްތަކާ ކާރުތައް ގުޅާލުމަށް ބޭނުންކުރާ ޓެކްނޮލޮޖީގެ ސަބަބުން ރަޝިއާ އަދި ޗައިނާއަށް އެމެރިކާގެ މަގުތަކުގައި މި ސޮފްޓްވެއާތައް ބޭނުން ކުރާ ކާރުތައް ދުއްވުމުގެ ފުރުސަތު ލިބިދާނެތީ ކަންބޮޑުވާ ކަމަށެވެ.
އެމެރިކާއިން އުފައްދާ ކާރުތަކުގައި ޗައިނާ އަދި ރަޝިއާގައި އުފައްދާ ސޮފްޓްވެއާތައް މިހާރު ބޭނުން ކުރަނީ ވަރަށް މަދުންނެވެ.
ނަމަވެސް އެމެރިކާގެ ކޮމާސް ސެކްރެޓަރީ ޖީނާ ރައިމޮންޑޯ ވިދާޅުވީ އެމެރިކާއިން މިހާރު ކޮށްފައިވާ ޕްލޭންތަކަކީ މުސްތަގުބަލުގައި އެމެރިކާ ހިމާޔަތް ކުރުމަށް އެޅޭނެ މުހިންމު ފިޔަވަޅުތަކެއް ކަމަށެވެ.
"މިއަދު ކާރުތަކުގައި ކެމެރާ، މައިކްރޯފޯން، ޖީޕީއެސް ޓްރެކިން އަދި އިންޓަނެޓާ ގުޅިފައިވާ އެހެނިހެން ޓެކްނޮލޮޖީތައް އެބަހުރި، މިފަދަ މައުލޫމާތުތަކަށް އެކްސެސް ލިބެން ހުރުމުން އަޅުގަނޑުމެންގެ ގައުމީ ސަލާމަތާއި އެމެރިކާގެ ރައްޔިތުންގެ ޕްރައިވެސީއަށް ނުރައްކަލެއް ކުރިމަތިވުމަކީ އެކަށީގެންވާ ކަމެއް" ޖީނާ ވިދާޅުވިއެވެ.
ނަމަވެސް ގިނަ ބަޔަކު ބުނާގޮތުގައި އެމެރިކާއިން މި ފިޔަވަޅުތައް އަޅަނީ ނުސީދާ ގޮތުން ޗައިނާ އަދި ރަޝިޔާގެ ޓެކް ކުންފުނިތަކަށް ގެއްލުން ދިނުމަށެވެ.
މިފަހަކަށް އައިސް އެމެރިކާއިން ދަނީ، އެ ގައުމުގައި ކާރު އުފައްދާ ސަޕްލައި ޗެއިންގައި ޗައިނާ ގެ ބައިވެރިވުން ލިމިޓް ކުރުމަށް ގިނަ މަސައްކަތްތަކެއް ކުރަމުންނެވެ.
މި ލިޔުން ކިޔާލުމުން
