އިޒްރޭލުން ސީރިޔާއަށް ދިން މިސައިލް ހަމަލާތަކެއްގައި ސީރިޔާގެ މެދުތެރޭގެ ސިޓީއަކުން ފަސް މީހުން މަރުވެ، 19 މީހަކު ޒަހަމްވެފައިވާ ކަމަށް ސީރިޔާގެ ދައުލަތު މީޑިއާއިން ބުނެފި އެވެ.
ސީރިޔާގެ މީޑިޔާތަކުން ބުނެފައިވާގޮތުން އެ ގައުމުގެ ވައިގެ ދިފާއީ ބާރުތަކުން ވަނީ ބައެއް މިސައިލްތަކަށް ރައްދުދީ އެ މިސައިލްތައް އަމާޒަށް ވާސިލުވުމުގެ ކުރިން ވައްޓާލާފައެވެ. ނަމަވެސް ބައެއް މިސައިލްތައް ސީރިޔާގެ އަވަށެއް ކަމުގައިވާ މަސްޔަފް ކައިރިއަށް އަމާޒުވެ ބޮޑެތި ގެއްލުންތައް ލިބިފައިވާކަމަށް މީޑިޔާތަކުން މައުލޫމާތު ދެއެވެ.
އިޒްރޭލުގެ ޖެޓްތަކުން ލުބްނާން ކައިރިން ސީރިއާއަށް ހަމަލާދީފައި ވާއިރު ހަމަލާދިން ސަރަހައްދަކީ ރަޝިޔާ އާއި އެމެރިކާ ހިމެނޭ ގޮތަށް ސަރަހައްދީ އަދި ބައިނަލްއަގްވާމީ ގިނަ ބާރުތަކެއް ހަރަކާތްތެރިވާ ކަމަށް ބެލެވޭ ސަރަހައްދެކެވެ.
މަސްޔަފްގެ ޕަބްލިކް ހޮސްޕިޓަލްގެ ޑިރެކްޓަރު ވިދާޅުވީ މަރުވި 5 މީހުންކީވެސް އާންމުން ކަމަށެވެ. ސީރިޔާގައި 13 އަހަރު ވަންދެން ހިނގަމުންދާ ދާޚިލީ ހަނގުރާމައިގެ ތެރޭގައި އިސްރާއީލުން ދަނީ އެކި ދުވަސްތައް މަތިން އެޤައުމުގަށް ވައިގެ މަގުން ޙަމަލާތައް ދެމުންނެވެ. މި ހަމަލާތަކުގެ މައިގަނޑު އަމާޒުތަކަކަށް ބެލެވެނީ އީރާނާ ގުޅުން ހުރި ސައިޓްތަކެވެ.
އާދީއްތަ ދުވަހު މި ހަމަލާ ދީފައި މިވަނީ މިދިޔަ ޖުލައި މަހު ތެހެރާނުގައި ހަމާސްގެ ވެރިޔާ އިސްމާއިލް ހަނިއްޔާ އަވަހާރަކޮށްލުމާ ގުޅިގެން އީރާނުގެ އޮފިޝަލުން އެކަމަށް ރައްދު ދޭނެ ކަމަށް ވައުދުވެފައިވާ ދަނޑިވަޅެއްގައެވެ.
މި ލިޔުން ކިޔާލުމުން
