ވަގުތީ ގޮތުން މަޤާމުން ވަކިކޮށްފައިވާ ދެކުނު ކޮރެއާގެ ރައީސް ޔޫން ސުކް ޔެއޯލް ހައްޔަކުރުމުގެ އަމުރަކަށް އެ ޤައުމުގެ ކަމާބެހޭ ފަރާތްތަކުން ކޯޓުގައި އެދިއްޖެއެވެ.
މި އަމުރަށް އެދިފައި ވަނީ ދެކުނު ކޮރެއާގައި އަސްކަރީ ވެރިކަމެއް ތަންފީޒްކުރުމަށް ޔޫން ކުރި މަސައްކަތް ނާކާމިޔާބުވެ, ޤައުމުގައި މި މައްސަލައިގެ ސަބަބުން ހަމަނުޖެހުން އުފެދުމާއި ގުޅިގެންނެވެ.
ދެކުނު ކޮރެއާގެ ޖޮއިންޓް އިންވެސްޓިގޭޝަން ހެޑްކުއާޓަރސްއިން މިއަދު ބުނެފައިވަނީ ވެރިކަމުގެ ބާރުގެ ބޭނުން ނަހަމަ ގޮތުގައި ބޭނުންކުރުމުގެ ދަޢުވާ ޔޫން ގެ މައްޗައް އުފުލާފައިވާ ކަމަށެވެ.
ކޮރަޕްޝަން އިންވެސްޓިގޭޝަން ފޯރ ހައި ރޭންކިންގ އޮފީސް (ސީއައިއޯ) އާއި، ފުލުހުން އަދި ދިފާޢީ މިނިސްޓްރީގެ އޮފިޝަލުން ހިމެނޭ ޖޮއިންޓް އިންވެސްޓިގޭޓިވް ޓީމުން ބުނެފައިވަނީ ވަގުތީ ގޮތުން މަޤާމުން ދުރުކުރެވިފައިވާ ޔޫން, ސުވާލުކުރުމަށް އެދި ފޮނުވާފައިވާ 3 ޗިޓަށް ވެސް އިޖާބަ ދީފައިނުވާތީވެ ހައްޔަރުކުމުގެ އަމުރަކަށް މިހާރު އެދިފައިވާ ކަމަށެވެ.
ޔޫން ހައްޔަރުކުރުމަށް އެދުމާ ގުޅިގެން ކޯޓަކުން އަމުރެއް ނެރޭނެތޯ ދަނީ ސުވާލު އުފެދެމުންނެވެ. މިއީ ދެކުނު ކޮރެއާގެ ތާރީޚުގައި ވެސް ވެރިއެއްގެ މައްޗައް ހިންގޭ މިފަދަ ފުރަތަމަ ޝަރީޢަތެވެ.
ޔޫން އަކީ މިހާރު ރައީސްކަމުގެ މަޤާމުގައި ހުރި މީހާކަމަށް ވުމާއެކު, ގިނަ ދަޢުވާތަކުން ވަނީ ސަލާމަތްވެފައެވެ. ނަމަވެސް, މި ދަޢުވާއިން އިން ސަލާމަތްވެ ވަޑައިގެންފައި ނުވެއެވެ.
ޔޫންގެ ވަކީލު ޔުން ގަޕް ގެއުން, ސަރުކާރުގެ ނިއުސް އޭޖެންސީއެއް ކަމަށްވާ ޔޮންހަޕް އަށް ބުނެފައިވަނީ ސީއައިއޯ އިން ޢަމަލުކުރަމުންދަނީ އެ ފަރާތުގެ ބާރުތަކުގެ ބޭރުން ކަމަށާއި، އެކަމާ ގުޅިގެން ރަސްމީ ފިޔަވަޅުތަކެއް އަޅާނެ ކަމަށެވެ.
ޑިސެންބަރު 3 ގައި ޔޫން ކުރު މުއްދަތަކަށް މާޝަލް ލޯ އިޢުލާން ކުރުމާއި ގުޅިގެން ދެކުނު ކޮރެއާގެ ރައްޔިތުން ވަނީ ބޮޑު ސިހުމެއްގެ ތެރެއަށް ގޮސްފައެވެ. އަދި ޤައުމުގައި ވަނީ ފަހުގެ ތާރީޚެއްގައި ނުހިގާ ވަރުގެ ސިޔާސީ ހަމަނުޖެހުމެއް އުފެދިފައެވެ.
ޑިސެންބަރު 14 ގައި ޤައުމީ މަޖިލީހުގެ 204-85 ވޯޓަކުން އޭނާ މަޤާމުން ދުރުކުރުމަށް މެންބަރުން ވޯޓުދިނުމާ ގުޅިގެން ޔޫން ވަނީ އޭނާގެ މަސްއޫލިއްޔަތުތަކުން ވަގުތީ ގޮތުން ވަކިކޮށްފައެވެ.
ސިޔާސީ މައިދާނަށް ނުކުތުމުގެ ކުރިން ޤައުމުގެ އެންމެ މަތީ ޕްރޮސިކިއުޓަރެއްގެ ގޮތުގައި މަސައްކަތްކުރެއްވި ކޮންޒަވޭޓިވް ލީޑަރު މިހާރު ދަނީ ޖިނާއީ ދަޢުވާތަކާ ކުރިމަތިލަމުންނެވެ. މިއީ ދެކުނު ކޮރެއާގެ ޤާނޫންގެ ދަށުން އުމުރު ދުވަހުގެ ޖަލު ޙުކުމެއް ނުވަތަ މަރުގެ ޙުކުމް އިއްވިދާނެ ފަދަ ކުށެކެވެ.
މި މައްސަލައާ ގުޅިގެން، ހަތިޔާރު އަޅައިގެން ތިބި ސިފައިން ޤައުމީ މަޖިލީހަށް ވަދެ، މެންބަރުންނާ މެދު ހަމަނުޖެހުން ވަނީ ހިނގައިފައެވެ. މިއީ ދެކުނު ކޮރެއާގެ ކުރީގެ އަސްކަރީ ޑިކްޓޭޓަރޝިޕްގެ މަންޒަރުތައް ސިފަވެގެންދިޔަ ހާދިސާއެއް ކަމުގައި ގިނަ ބަޔަކު ދެކެއެވެ.
އިސް ދިފާޢީ އޮފިޝަލަށް ޔޫން އަންގާފައި ވަނީ މަޖިލީހަށް ވަނުމަށް ބޭނުންވެއްޖެ ނަމަ ސިފައިންނަށް ހަތިޔާރު ބޭނުންކުރުމުގެ ބާރު ދިނުމަށް ކަމަށް ޕްރޮސިކިއުޓަރުން ވަނީ ތުހުމަތުކޮށްފައެވެ.
މާޝަލް ލޯގެ ޙާލަތު ދެމިގެން ދިޔައީ ގާތްގަނޑަކަށް 6 ގަޑިއިރު ވަންދެންނެވެ. އޭގެ ފަހުން މެންބަރުންގެ އިއްތިފާޤުން ވޯޓުދިނުމާ ގުޅިގެން ޔޫން އަށް އެ އަމުރު އުވާލުމަށް މަޖުބޫރުވިއެވެ.
ޔޫން ވަނީ އޭނާގެ ކުރު މުއްދަތުގެ މާޝަލް ލޯ އިޢުލާންކުރުން ދިފާޢުކޮށް، އެއީ ޤާނޫނީ އަދި ކޮންމެހެން ކުރަންޖެހުނު ކަމެއް ކަމަށް ބުނެފައެވެ. އޭނާ ބުނެފައިވަނީ "އެންޓި-ސްޓޭޓް ފޯސަސް" އަދި އިދިކޮޅު ޑިމޮކްރެޓިކް ޕާޓީ (ޑީޕީ) ގެ ހުރަސްއެޅުމުގެ ނުރައްކާ އޮތް ކަމަށެވެ.
ދެކުނު ކޮރެއާގެ ވަގުތީ ރައީސް ހަން ޑަކް-ސޫ ވެސް މަޤާމުން ދުރުކުރުމަށް މިދިޔަ ހުކުރު ދުވަހު އިދިކޮޅުން ލީޑްކުރާ ޕާޓީގެ މެންބަރުން ވޯޓުދިނުމާ ގުޅިގެން ޤައުމުގައި ވަނީ އިތުރު ހަމަނުޖެހުންތައް އުފެދިފައެވެ. މިގޮތުން ރައީސްކަމުގެ ބާރުތައް ބޮޑުވަޒީރުގެ ނައިބު އަދި މާލީ ވަޒީރު ޗޮއި ސަންގް މޮކްއާ ވަނީ ހަވާލުކޮށްފައެވެ.
ޑީޕީ އާއި އެހެން ކުދި އިދިކޮޅު ޕާޓީތަކުން ހަން މަޤާމުން ދުރުކުރުމަށް ވޯޓުދިނީ އޭނާ ކޮންސްޓިޓިއުޝަނަލް ކޯޓުގައި ހުސްވެފައިވާ ތިން ފަނޑިޔާރުންގެ މަޤާމަށް ވަގުތުން މީހުން ޢައްޔަންކުރުމަށް އިންކާރުކުރުމާ ގުޅިގެންނެވެ. މި ކޯޓުން ދަނީ ޔޫން މަޤާމުގައި ބެހެއްޓުމާމެދު މަޝްވަރާކުރަމުންނެވެ.
ދެކުނު ކޮރެއާގެ ޤާނޫނުގެ ދަށުން ކޯޓަށް މި ނިންމުން ނިންމުމަށް 6 މަސް ދުވަހުގެ މުއްދަތެއް ލިބޭނެވެ. އަދި ކޯޓުގެ ނިންމުމާއެކު ޔޫންގެ މަޤާމަށް ވާގޮތް އެނގިގެންދާނެވެ.
ހުކުރު ދުވަހު ބޭއްވުނު ފުރަތަމަ އިބްތިދާއީ އަޑުއެހުމުގައި، ކޯޓުގައި ޔޫންގެ ވަކީލުން ބުނެފައިވަނީ ޔޫންގެ މައްސަލައާ ގުޅިގެން އިތުރަށް ތައްޔާރުވުމަށް ވަގުތު ބޭނުންވާ ކަމަށެވެ. އަދި ވަކީލުން ވަނީ މައްސަލަ ލަސްކުރުމަށް ވެސް ކޯޓުގައި އެދިފައެވެ. ނަމަވެސް ކޯޓުން މި މައްސަލަ ބަލައިގެންފައި ނުވެއެވެ.
މި ލިޔުން ކިޔާލުމުން
