ބާސެލޯނާ އަދި ސްޕެއިންގެ ކުރީގެ މިޑްފީލްޑަރު އަންދްރޭސް އިނިއެސްޓާ ކާމިޔާބު 24 އަހަރަށް ފަހު ފުޓުބޯޅާގެ ދުނިޔޭން ރިޓަޔާކޮށްފިއެވެ.
ބާސެލޯނާގެ މަޝްހޫރު ލަމާސިއާ ޔޫތު އެކަޑަމީ މެދުވެރިކޮށް އަންދްރޭސް އިނިއެސްޓާ ވަނީ އެ ކްލަބަށް ގާތްގަނޑަކަށް 700 ސީނިއާ މެޗު ކުޅެ، ލަލީގާ އާއި ޔޫއެފާ ޗެމްޕިއަންސް ލީގު ފަދަ ބޮޑެތި ތަށިތައް ކާމިޔާބުކޮށްފައެވެ. ސްޕެއިންގެ ކުޅުންތެރިޔާ އޭނާގެ ނަން އޭނާގެ ގައުމުގެ ފުޓްބޯޅަ ތާރީޚުގައި ލިޔެފައިވަނީ 2010 ވަނަ އަހަރު ފުރަތަމަ ފަހަރަށް ވޯލްޑްކަޕް ކާމިޔާބުކުރި ގޯލު ޖަހައިގެންނެވެ.
"މިއަދު ކުޑަކޮށް އިމޯޝަނަލް ވާން ހުއްދަ ދެއްވާ...، މި ދުވަސް އަންނާނެ ކަމަކަށް އަހަރެން ދުވަހަކުވެސް ހިއެއް ނުކުރަން. މީ ހިތާމައިގެ ކަރުނައެއް ނޫން، އެއީ ފުޓްބޯޅަ ކުޅުންތެރިއަކަށްވުމުގެ ހުވަފެން އޮތް އެ ކުއްޖާގެ ކަރުނަތައް، ފުޓްބޯޅަ ކުޅުންތެރިއަކަށްވުމުގެ ހުވަފެން އަޅުގަނޑުމެންނަށް ހާސިލު ކުރެވުނީ ވަރަށް ބުރަ މަސައްކަތެއް، ގުރުބާނީތަކަކަށްފަހު" ރިޓަޔާ ކުރާނެކަން އިއުލާން ކުރި ނޫސްވެރިންގެ ބައްދަލުވުމުގައި އިނިއެސްޓާ ބުންޏެވެ.
އިނިއެސްޓާ އަކީ ސްޕެއިން އަދި ބާސެލޯނާގެ ތާރީހުގައި ވެސް އެންމެ މޮޅު އެއް ފުޓްބޯޅަ ކުޅުންތެރިޔާ އެވެ. އޭނާ ވަނީ ޖުމްލަ 39 ރަސްމީ ތަށި ހޯދައިފައެވެ. ބާސެލޯނާއާއެކު އޭނާ ވަނީ ލަލީގާ ނުވަ ފަހަރު، ސުޕަކޮޕާ ޑި އެސްޕެނާ ހަތް ފަހަރު، ކޮޕާ ޑެލްރޭ ހަ ފަހަރު، ޗެމްޕިއަންސް ލީގު ހަތަރު ފަހަރު، ޔޫއެފާ ސުޕަ ކަޕް ތިން ފަހަރު، އަދި ފީފާ ކްލަބް ވޯލްޑް ކަޕް ތިން ފަހަރު ކާމިޔާބުކޮށްފައެވެ. ވިސެލް ކޯބޭގައި އޭނާ ވަނީ އެމްޕަޔަރސް ކަޕް (2019)، ޖަޕާނު ސުޕަ ކަޕް (2020)، އަދި ޖޭ1 ލީގު (2023) ކާމިޔާބުކޮށްފައެވެ. ސްޕެއިންގެ ގައުމީ ޓީމާއެކު 16 އަހަރުން ދަށުގެ އަދި 19 އަހަރުން ދަށުގެ ލެވެލްގައި ޔޫރަޕްގެ ޗެމްޕިއަންކަން ހޯދައި، ޔޫރަޕިއަން ޗެމްޕިއަންޝިޕް ދެ ފަހަރު (2008 އަދި 2012) އަދި އެއް ވޯލްޑް ކަޕް (2010) ކާމިޔާބުކުރިއެވެ.
2018 ވަނަ އަހަރާ ހަމައަށް އޭނާ އަކީ ބާސެލޯނާގެ މުހިއްމު އަދި މޮޅުކުޅުމެއް ކުޅިފައިވާ ކުޅުންތެރިއެކެވެ. ބާސާ ދޫކޮށްލުމަށްފަހު އޭނާ ޖަޕާނާ ގުޅުނު އިރު، 2023 ވަނަ އަހަރާ ހަމައަށް އެތަނަށް ކުޅުމަށް ފަހު ޔުނައިޓެޑް އަރަބް އެމިރޭޓްސްގެ އެމިރޭޓްސް ކްލަބަށް ބަދަލުވެ، ރިޓަޔާ ކުރެވެންދެން ހުރީ އެ ކުލަބުގައެވެ.
މި ލިޔުން ކިޔާލުމުން
