އާދިއްތަ, November 22
ނިއުކާސަލްއާ އެއްވަރުވެ، އާސެނަލުން ލީޑު ފުޅާކުރުމުގެ ފުރުސަތު ގެއްލިއްޖެ

އިނގިރޭސި ޕްރެމިއާ ލީގުގައި ރޭ ރަށުން ބޭރުގައި ނިއުކާސަލް ޔުނައިޓެޑާއި ދެކޮޅަށް ކުޅުނު މެޗު 2-2 ގެ ނަތީޖާއަކުން އެއްވަރުވުމާއެކު، ލީޑު ފުޅާކުރުމަށް ލިބުނު ފުރުސަތު އާސެނަލުން ގެއްލުވާލައިފިއެވެ.

ނިއުކާސަލްގެ ސެއިންޓް ޖޭމްސް ޕާކުގައި 52 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ގިނައިރު ބޯޅަ ހިފަހައްޓައިގެން ކުޅުނީ އާސެނަލުންނެވެ.

މެޗުގައި ފުރަތަމަ ލަނޑު ކާމިޔާބުކޮށް ކުރި ހޯދީ ވެސް އާސެނަލުންނެވެ. ފުރަތަމަ ހާފުގެ 33 ވަނަ މިނެޓުގައި ކައި ހަވާޓްޒް ދިން ޕާހަކުން އެ ލަނޑު ކާމިޔާބުކޮށްދިނީ އިނގިރޭސި މިޑްފީލްޑަރު އެބެރެޗީ އެޒޭއެވެ.

ނަމަވެސް ދެވަނަ ހާފުގެ ކުޅުން ފެށުނުތާ ހަތަރުވަނަ މިނެޓުގައި ހާވީ ބާންސް ވަނީ ނިއުކާސަލަށް ނަތީޖާ އެއްވަރުކޮށްދީފައެވެ. އަދި މެޗުގެ 62 ވަނަ މިނެޓުގައި އެ ޓީމުގެ ޖަރުމަން ޑިފެންޑަރު މާލިކް ތިއާއޯ ވަނީ އިތުރު ލަނޑެއް ކާމިޔާބުކޮށް، މި މެޗުގައި ފުރަތަމަ ފަހަރަށް ނިއުކާސަލަށް ލީޑު ހޯދައިދީފައެވެ.

ނިއުކާސަލުން ލީޑު ނެގިތާ ގިނައިރު ނުވަނީސް އާސެނަލްގެ ގޯލްކީޕަރު ޑޭވިޑް ރާޔާއަށް އަނިޔާވުމުން، އޭނާގެ ބަދަލުގައި ކެޕާ ވަނީ ކުޅެން އަރުވާފައެވެ.

އާސެނަލުން ނަތީޖާ އެއްވަރުކުރި ލަނޑު 78 ވަނަ މިނެޓުގައި ކާމިޔާބުކޮށްދިނީ، ކެޕްޓަން މާޓިން އޮޑެގާޑް ތަނަވަސްކޮށްދިން ފުރުސަތަކުން ފޯވާޑް ނޯނީ މަޑުއެކޭއެވެ.

މި ނަތީޖާއާއެކު ލީގުގައި ޖެހިޖެހިގެން ފަސް މެޗުން އާސެނަލް މޮޅުވަމުން އައި ސިލްސިލާ ނިމުމަކަށް އައެވެ. ނަމަވެސް 11 މެޗުން 28 ޕޮއިންޓާއެކު ތާވަލުގެ އެއްވަނައިގައި އޮތް އާސެނަލަށް، ދެވަނައިގައި އޮތް ބްރައިޓަނަށްވުރެ ހަ ޕޮއިންޓުގެ ލީޑެއް ލިބިފައިވެއެވެ. 10 މެޗުން 22 ޕޮއިންޓް ހޯދާފައިވާ ބްރައިޓަނުން މިއަދު ހަލް ސިޓީއާ ދެކޮޅަށް ކުޅޭ މެޗުން މޮޅުވެއްޖެއްޔާ، އެ ފަރަގު ތިން ޕޮއިންޓަށް ކުޑަވާނެއެވެ.

މި މެޗުން ލިބުނު އެއް ޕޮއިންޓާއެކު 11 މެޗުން 13 ޕޮއިންޓް ހޯދާފައިވާ ނިއުކާސަލް މިހާރު އޮތީ ތާވަލުގެ 12 ވަނައިގައެވެ.

މި ލިޔުން ކިޔާލުމުން

Like
Love
Ah Ah
Wow
Sad
ކިޔުންތެރިންގެ ހިޔާލު