Monday, November 16
އިންގްލެންޑް އަތުން ސްޕެއިން ބަލިވެ، 43 މެޗުގެ ރެކޯޑަށް ނިމުމެއް

ޔޫއެފާ ނޭޝަންސް ލީގުގައި ރޭ މެޑްރިޑުގައި ކުޅުނު މެޗުގައި އިންގްލެންޑް އަތުން 3-2 އިން ސްޕެއިން ބަލިވެއްޖެއެވެ.

މި ބަލިއާއެކު، ބަލިނުވެ 43 މެޗު ކުޅުނު ސްޕެއިންގެ ރެކޯޑަށް ވަނީ ނިމުމެއް އައިސްފައެވެ. މީގެ ކުރިން ސްޕެއިން އެންމެ ފަހުން މެޗަކުން ބަލިވީ 2024 ވަނަ އަހަރުގެ މާޗު މަހުއެވެ.

މެޗުގެ ފުރަތަމަ ހާފު ނިމެން ދަނިކޮށް، ސްޕެއިންގެ ޑިފެންޑަރު ޕައު ކުބާސީ ހެރީ ކޭންއަށް ކުރި ފައުލަކަށް ލިބުނު ޕެނަލްޓީން ކޭން ވަނީ އިންގްލެންޑަށް ލީޑު ނަގައިދީފައެވެ.

ދެވަނަ ހާފުގެ 53 ވަނަ މިނެޓުގައި ޑެކްލަން ރައިސް ނަގައިދިން ކޯނަރަކުން އެޒްރީ ކޮންސާ އިންގްލެންޑްގެ ދެވަނަ ލަނޑު ޖެހިއިރު، އޭގެ 4 މިނެޓު ފަހުން ޖޫޑް ބެލިންހަމް ތަނަވަސްކޮށްދިން ބޯޅައަކުން ބެން ވައިޓް ވަނީ ނަތީޖާ 3-0 އަށް ބަދަލުކޮށްފައެވެ.

މި މެޗުގައި ސްޕެއިންގެ ފުރަތަމަ ލަނޑަކީ އެލިއޮޓް އެންޑަސަން ލަމީން ޔަމާލަށް ކުރި ފައުލަކާ ގުޅިގެން ލިބުނު ޕެނަލްޓީއަކުން މިކެލް އޮޔާޒަބާލް ކާމިޔާބުކުރި ލަނޑެކެވެ. އެ ފައުލާ ގުޅިގެން އެންޑަސަންއަށް ރަތް ކާޑު ދެއްކުމުން އިންގްލެންޑުން މެޗުގެ ބާކީބައި ކުޅުނީ 10 ކުޅުންތެރިންނާއެކުގައެވެ. އަދި މެޗުގެ 75 ވަނަ މިނެޓުގައި ޔަމާލް ދިން ބޯޅައަކުން ސްޕެއިންގެ ދެވަނަ ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ނިކޯ ވިލިއަމްސްއެވެ.

ފަހު ވަގުތުކޮޅު ނަތީޖާ އެއްވަރުކުރުމަށް ސްޕެއިނުން ގިނަ ހަމަލާތަކެއް ފޮނުވާލި ނަމަވެސް، އިންގްލެންޑްގެ ގޯލު ބެލެހެއްޓި ޖޭމްސް ޓްރެފޯޑް ވަނީ އެ ހަމަލާތައް ދިފާއުކޮށްފައެވެ.

މި މޮޅާއެކު ގްރޫޕުގެ ހަ މެޗުން ދެ ޓީމަށް ވެސް 15 ޕޮއިންޓު ލިބުނުއިރު، ލަނޑުގެ ތަފާތުން ގްރޫޕުގެ އެއްވަނަ ހޯދީ އިންގްލެންޑުންނެވެ. ދެ ޓީމު ވެސް ވަނީ ކުއާޓާ ފައިނަލަށް ދަތުރުކޮށްފައެވެ.

މި ލިޔުން ކިޔާލުމުން

Like
Love
Ah Ah
Wow
Sad
ކިޔުންތެރިންގެ ހިޔާލު