ފީފާގެ ރައީސް ޖިއާނީ އިންފަންޓީނޯ ވޯލްޑް ކަޕްގެ ހިއްސާތަކެއް އަމިއްލަ އިންވެސްޓަރުންނަށް ވިއްކާލުމަށް ހުށަހެޅުއްވި ހުށަހެޅުމާ ގުޅިގެން، ޔޫއެފާގެ 55 މެންބަރު ޤައުމުން ފީފާގެ މުބާރާތްތައް ބޮއިކޮޓް ކުރުމަށް ވަނީ ނިންމާފައެވެ. މި ތާރީޚީ ނިންމުން ނިންމާފައިވަނީ ޔޫއެފާގެ މެންބަރުންގެ މެދުގައި ބޭއްވުނު ކުއްލި ބައްދަލުވުމެއްގައެވެ. މިއީ ފީފާގެ ހުށަހެޅުމާ މެދު އޮތް ނުރުހުން ފާޅުކުރުމުގެ ގޮތުންނާއި، ބައިނަލްއަޤުވާމީ ފުޓްބޯޅައިގެ އޮނިގަނޑަށް އަތުވެދާނެ ބަދަލުތަކާ މެދު ކަންބޮޑުވުން ފާޅުކުރުމުގެ ގޮތުން ނިންމި ނިންމުމެކެވެ.
އިންފަންޓީނޯގެ ޕްލޭނަކީ 20 ބިލިއަން ޑޮލަރުގެ ސަބްސިޑަރީއެއް އުފައްދައި، ވޯލްޑް ކަޕާއި އެހެނިހެން މުބާރާތްތައް ހިންގުމުގައި އަމިއްލަ އިންވެސްޓަރުންނަށް ކުޑަ ހިއްސާއެއް ދިނުމެވެ. މި ހުށަހެޅުން ގަބޫލުކުރާ ކޮންމެ މެންބަރު އެސޯސިއޭޝަނަކަށް 40 މިލިއަން ޑޮލަރު ދިނުމަށް ފީފާއިން ހުށަހަޅާފައިވާއިރު، މި ހުށަހެޅުން ގަބޫލުނުކޮށްފިނަމަ ލިބޭ ފައިސާގެ މިންވަރު 10 މިލިއަން ޑޮލަރަށް ދަށްވާނެ ކަމުގެ އިންޒާރު ވެސް ވަނީ ދީފައެވެ.
މި މައްސަލައިގައި ޔޫއެފާއިން ބުނެފައިވަނީ "ވޯލްޑް ކަޕަކީ ވިޔަފާރި އުސޫލުން ވިއްކާލެވޭނެ އެއްޗެއް ނޫން" ކަމަށެވެ. އަދި މި ހުށަހެޅުން އަނބުރާ ނުނަގާހާ ހިނދަކު ފީފާގެ އެއްވެސް މުބާރާތެއްގައި ބައިވެރިނުވާނެ ކަމަށް އެ އިދާރާއިން ވަނީ ކަނޑައަޅާފައެވެ. މި ނިންމުމުގެ ސަބަބުން 2027 ވަނަ އަހަރުގެ އަންހެނުންގެ ވޯލްޑް ކަޕާއި 2030 ވަނަ އަހަރުގެ ފިރިހެނުންގެ ވޯލްޑް ކަޕް ބޭއްވުމަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.
ޔޫއެފްއޭގެ އިތުރުން، ކޮންކަކަފް ގެ 41 މެންބަރުން ވެސް ވަނީ މި ހުށަހެޅުން ބާތިލުކޮށްފައެވެ. ހަމައެހެންމެ، އޭޝިއަން ފުޓްބޯޅަ ކޮންފެޑެރޭޝަން (އޭއެފްސީ) އިން ވެސް ވަނީ މަޝްވަރާކުރުމެއް ނެތި މިފަދަ ބޮޑު ނިންމުމެއް ނިންމުމަކީ ބަލައިގަނެވޭނެ ކަމެއް ނޫން ކަމަށް ބުނެ ފީފާގެ އަމަލުތަކަށް ފާޑުކިޔާފައެވެ.
ބައިނަލްއަޤުވާމީ ފުޓްބޯޅައިގައި މިހާރު ކުރިއަށްދާ ބޮއިކޮޓްގެ ސަބަބުން ކުޅިވަރުގެ ކުރިމަގަށް ބޮޑެތި ގޮންޖެހުންތަކަކާއި ލޮޅުންތަކެއް ވަނީ ކުރިމަތިވެފައެވެ.ފީފާއިން ހުށަހަޅާފައިވާ ކަންތައްތަކާ މެދު ދުނިޔޭގެ އެކި ފުޓްބޯޅަ އިދާރާތަކުގެ މެދުގައި ޚިޔާލުތަފާތުވުންތައް އުފެދި، އޮތް ނުތަނަވަސްކަން މިހާރު ވަނީ ކުރިއަށްވުރެ ބޮޑަށް އިތުރުވެފައެވެ.