ބްރެޒިލްގެ ތަރި ނޭމާ އެނާ ކުރިން ކުޅުނު ކްލަބް ކަމަށްވާ ސަންޓޯސްއަށް އަނެއްކާވެސް ބަދަލު ވެއްޖެއެވެ. ސަންޓޯސްއަކީ އެންމެ ފުރަތަމަ ނޭމާ ފުޓްބޯޅަ ކެރިއަރު ފެށި ކްލަބެވެ.
ސައުދީ އަރަބިޔާގެ އަލް ހިލާލް އަށް ކުޅެމުން ދިޔަ ނޭމާ އެ ކްލަބާއި އެކު ހަދާފައިވާ އެއްބަސްވުން އުވާލާފައިވަނީ އަނިޔާގެ ސަބަބުން ނޭމާގެ ބޭނުން އެންމެ ރަނގަޅަށް ނުހިފޭތީ ކަމަށް އެ ކްލަބުން ބުނެފައިވެ އެވެ. ނޭމާ އަލްހިލާލްއަށް ކުޅެމުން ދިޔައީ އަހަރަކު 130 މިލިއަން ޑޮލަރުގެ މުސާރައަކަށެއެވެ.
އަލް ހިލާލްގައި ކުޅެމުން ދިޔައިރު އަނިޔާގެ ސަބަބުން ގިނަ ދުވަސް ދަނޑުން ބޭރުގައި ނޭމާ ހޭދަކުރަން ޖެހުނެވެ. މިގޮތުން ވޭތުވެދިޔަ 02 ސީޒަނުގައި ނޭމާ އަށް ޖުމްލަ 07 މެޗުގައި ކާމިޔާބު ކޮށްދެވިފައިވަނީ އެންމެ ގޯލެކެވެ.
ސަންޓޯސްގައި ކުރިން މޮޅު ކުޅުމެއް ދެއްކި ނޭމާގެ ކެރިއަރުގެ އެންމެ ކާމިޔާބު ދުވަސްތައް ހޭދަ ކޮށްފައި ވަނީ ބާސެލޯނާގަ އެވެ.
''އެމް އެސް އެން'' ގެ ނަމުން މަޝްހޫރުވި މެސީ، ސުއަރޭޒް އަދި ނޭމާ ވަނީ ބާސެލޯނާ އަށް ޔޫރަޕްގެ ހުރިހާ ތައްޓެއް ކާމިޔާބު ކޮށްދީ 364 ގޯލް ޖަހާ ދީފަވެއެވެ. ނޭމާ ވަނީ މީގެތެރެއިން 105 ގޯލް ކާމިޔާބް ކޮށްދީފަ އެވެ.
6 މަސްދުވަހުގެ އެއްބަސްވުމެއްގެ ދަށުން ސަންޓޯސް އަށް ބަދަލުވި ނޭމާގެ އެންމެ ބޮޑު އަމާޒަކީ 2026 ވަނަ އަހަރުގެ ވޯލްޑްކަޕަށް ފިޓްވުންކަމަށް ބެލެވެއެވެ. މީގެ ކުރިން ނޭމާ ބުނެފައިވާ ގޮތުގައި ކުރިއަށް އޮތް މުބާރާތް ވާނީ އޭނާގެ އެންމެ ފަހު ވޯލްޑްކަޕަށް ކަމަށެއެވެ.
އެެއްބަސްވުގެ މާ ބޮޑު ތަފްސީލެއް ދެ ފަރާތުންވެސް މިހާތަނަށް ހާމަ ކޮށްފައި ނުވެއެވެ. އެހެން ނަމަވެސް 6 މަހުގެ އެއްބަސްވުމަށް ފަހު ނޭމާ އަނެއްކާވެސް މެސީ އަދި ސުއަރޭޒް އާއެކު ކުޅުމަށް އެމެރިކާގެ އިންޓަރ މަޔާމީ އަށް ބަދަލުވާނެ ކަމަށް ބްރެޒިލްގެ މަސްދަރު ތަކުން ހާމަކޮށްފައިވެއެވެ.
ބްރެޒިލްގެ މަޝްހޫރް ޕެލޭވެސް ކުޅުނު ސަންޓޯސްއަކީ ބްރެޒިލްގެ އެެންމެ ކާމިޔާބް އެއް ޓީމެއެވެ. ބްރެޒިލް ލީގް 8 ފަހަރު އަދި ދެކުނު އެމެރިކާ ބައްރުގެ ކްލަބްތަކުގެ މެދުގަ ކުޅޭ ސަރަހައްދީ ފުޓުބޯޅަ މުބާރާތުގެ ތަށި 3 ފަހަރު އެ ކްލަބުން މިހާތަނަށް ހޯދާފައިވެއެވެ.
މި ލިޔުން ކިޔާލުމުން
