ޔޫއޭފާ ޗެމްޕިއަންސް ލީގުގައި އިނގިރޭސިވިލާތުގެ މެންޗެސްޓަރ ސިޓީ އިން ބެލްޖިއަމް ގެ ކްލަބް ބްރޫޖާއި ދެކޮޅަށް މިރޭ ނުކުންނަ މެޗުން ބަލިވެއްޖެނަމަ މުބާރާތުގެ ނޮކްއައުޓް ބުރަށް ނުގޮސް ގްރޫޕް ސްޓޭޖުން ކަޓާނެ އެވެ.
ޗެމްޕިއަންސް ލީގު މި ސީޒަނުގައި ކުޅެން ފަށާފައިވަނީ މުޅިން އާ ފޯމެޓަކަށެވެ. މިގޮތުން މިހާރު ކުޅޭ ފޯމެޓުން މުބާރާތުގެ ގަދަ 08 ޓީމް ސީދާ ނޮކްއައުޓް ބުރަށް ދާނެއެވެ.
އިނގިރޭސި ޕްރިމިއާ ލީގުގެ އެންމެ ފަހުގެ ޗެމްޕިއަން ސިޓީ މިވަގުތު އޮތީ 8 ޕޮއިންޓާއިއެކު ތާވަލުގެ 25 ވަނައިގައެވެ. ނަމަވެސް، މިރޭ މޮޅުވެގެން ސިޓީއަށް ނޮކްއައުޓްބުރުގެ ޕްލޭއޮފަށް ދެވޭނެ އެވެ.
ޗެމްޕިއަންސް ލީގުގެ މިހާރުގެ ފޯމެޓް އޮންނަ ގޮތުން ގަދަ 16 ޓީމުގެ ބުރުން ސީދާ ޖާގައެއް ލިބޭނީ އެންމެ ގިނަ ޕޮއިންޓް ހޯދާ 8 ޓީމަށެވެ. އަދި ނުވަ ވަނަ އާއި 24 ވަނަ އާ ދެމެދު ނިންމާ ޓީމުތަކަށް ފުރުސަތު ލިބޭނީ ނޮކްއައުޓް ބުރުންނެވެ. އެ ބުރުގައި ސީޑުކޮށްފައި އޮންނާނީ 9 ވަނައިން ފެށިގެން ޓޭބަލްގެ 16 ވަނަޔާހަމަޔަށް ނިންމާ ޓީމުތަކެވެ.
"އަހަރެމެންނަށް މިއޮތް ހާލަތުން މެޗުން މޮޅުވާން ޖެހޭ އަދި އެކަން ނުކުރެވިއްޖެ ނަމަ މި މުބާރާތުގައި ކުރިއަށް ނުދާނެ'' މެޗުގެ ކުރިން ސިޓީގެ ކޯޗު ގާޑިއޯލާ ބުންޏެއެވެ.
އެކަމަކު އެއީ މައްސަލައެއް ނޫން ކަމަށާއި، ލިބިފައި އޮތް ފުރުސަތުގައި މިގޮންޖެހުމާއި ކުރިމަތިލާން ތަައްޔާރަށް އޮތްކަމަށް ގާޑިއޯލާ އިތުރަށް ބުނެފައިވެ އެވެ.
މި ސީޒަނުގަ ޕްރިމިއާ ލީގުގަ އަދި ޗެމްޕިއަންސް ލީގުގަ ސިޓީއަށް އެންމެ އެދެވޭ ކުޅުމެއް ނުދެއްކުނަސް އެކަން ބަދަލު ކުރަން އޭނަގެ ޓީމު މިރޭ ތައްޔާރުވެފައި ވާ ކަމަށް ގާޑިޔޯލާ ބުންޏެއެވެ.
އަނިޔާގެ ގިނަ މައްސަލަ ތަކެއް މިސީޒަނުގަ ކުރިމަތި ވެފައިވާ ސިޓީން ވަނީ މި ޖަނަވަރީ ޓްރާންސްފަރ ވިންޑޯގަ ޓީމް އިތުރަށް ވަރުގަދަ ކުރުމުގެ ގޮތުން 3 ކުޅުންތެރިއެއްގެ ސޮއި ހޯދާފައެވެ. އެއީ ޖަރުމަނުގެ ޢައިންޓަޙް ފްރެންކްފަރޓްއިން ގެނައި މިސްރް ފޯވަރޑް އޮމަރު މަރްމޫޝް، ބުރެޒިލްގެ ޕަލްމެއިރާސްއިން ގެނައި ޑިފެންޑަރ ވިޓޯ ރުއިސް އާއި ފްރާންސްލީގުގެ ލެންސް އިން ގެނައި އުޒްބަކިސްތާންގެ އުންމީދީ ޑިފެންޑަރ އަބްދުއްކާދިރު ހުސަނޯވް އެވެ.
މީގެ އިތުރުން އާޖެންޓީނާގެ ރިވަރ ޕްލޭޓަށް ލޯން އުސޫލުން ކުޅެމުން އަންނަ ޒުވާން އުއްމީދީ ފޯވަރޑް ކްލައުޑިޔޯ އެޗަވޭރީ، ދެކުނު އެމެރިކާ ބައްރުގެ 20 އަހަރުން ދަށުގެ މުބާރާތަށްފަހު ޓީމާ ގުޅުމުން ސިޓީއަށް ދިމާވެފައިވާ މައްސަލަތަކަށް ހައްލުލިބިގެން ދާނެ ކަމަށް ބެލެވެ އެވެ.
މި މެޗް ފަށާނީ ރާއްޖެ ގަޑިން މިރޭ ދަންވަރު 01 ޖަހާއިރު އެވެ.
މި ލިޔުން ކިޔާލުމުން
