ރައްޔިތުންނާ ގާތުން ޚިދުމަތް ދެއްވުމަށް ސަރުކާރުން ގެންގުޅުއްވާ ސިޔާސަތުތަކަށް، މާލޭ ސިޓީގެ ޑެޕިއުޓީ މޭޔަރ، އަޙްމަދު ނަރީޝް މަރުޙަބާ ދަންނަވައިފިއެވެ.
މިގޮތުން ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމުގެ މަޝްރޫޢު މިއަދު އިފްތިތާޙްކުރުމާ ގުޅިގެން 'އެކްސް' ގައި ޑެޕިއުޓީ މޭޔަރ ކުރެއްވި ޕޯސްޓެއްގައި ވިދާޅުވެފައިވަނީ، މާލޭ ސިޓީ ވިލިމާލެއާއި ހުޅުމާލޭ ފޭސް 1 އަދި ފޭސް 2 ގައި ދިވެހި ރައްޔިތެއްކަން އަންގައިދޭ ކާޑު ހެދުމުގެ ޚިދުމަތާއި ދިވެހި ޕާސްޕޯޓު ހެދުމުގެ ޚިދުމަތް ރައްޔިތުންނާ ގާތުން، އެރައްޔިތުން ތިބި ފަސްގަނޑަކުން ލިބޭނެ އިންތިޒާމް ހަމަޖައްސަވައި ދެއްވަން ނިންމަވައި، މިއަދު އެޚިދުމަތް ރަސްމީކޮށް ފައްޓަވައި ދެއްވިކަމަށްޓަކައި މާލެ ސީޓި ކައުންސިލާއި ރައްޔިތުންގެ ފަރާތުން ރައީސް ޑރ. މުޙައްމަދު މުޢިއްޒަށް ޝުކުރު ދަންނަވާ ކަމަށެވެ.
"އަދި ރައްޔިތުންނާ ގާތުން ޚިދުމަތް ދެއްވުމަށް ސަރުކާރުން ގެންގުޅުއްވާ ސިޔާސަތުތަކަށް މަރުޙަބާ ދަންނަވަން! މިއީ ލާމަރުކަޒީ ނިޒާމް މިގައުމުގައި ފައްކާކުރެއްވުމަށް ރައީސުލްޖުމްހޫރިއްޔާ ދެއްވާ އިސްކަން އަމަލީ ގޮތުން ފެނިގެންދާ އަލިގަދަ ދަލީލެއް!"، ޑެޕިއުޓީ މޭޔަރުގެ ޕޯސްޓުގައި ވިދާޅުވެފައިވެއެވެ.
މިއަދު އިފްތިތާޙްކުރި މަޝްރޫޢުގެ ދަށުން އައިޑީ ކާޑާއި ޕާސްޕޯޓުގެ ޚިދުމަތްތައް ފުރަތަމަ ފުޅާކުރާނީ ދ. އަތޮޅާއި، ލ. އަތޮޅު އަދި ހދ. އަތޮޅުގެ އިތުރުން މާލޭގެ ސިޓީގެ ބައެއް އަވަށްތަކަށެވެ. މިއަދުގެ ރަސްމިއްޔާތުގައި ވަނީ މި ޚިދުމަތްތައް ރާއްޖެއަށް ފުޅާކުރާނެ ގޮތުގެ މަގުޗާޓުވެސް ދައްކާލައިފައެވެ.
• ހއ. އިހަވަންދޫ: އޮގަސްޓު 2025ގައި ޕާސްޕޯޓުގެ ޚިދުމަތް އަދި މޭ 2025 ގައި އައިޑީ ކާޑުގެ ޚިދުމަތް
• ހދ. މަކުނުދޫގައި ސެޕްޓެންބަރު 2025 ގައި ޕާސްޕޯޓު ޚިދުމަތް އަދި ފެބުރުވަރީ މަހު އައިޑީކާޑުގެ ޚިދުމަތް
• ށ. ފުނަދޫގައި ޑިސެންބަރުގައި އަދި ށ. މިލަންދޫގައި ޖުލައި މަހު ޕާސްޕޯޓުގެ ޚިދުމަތް ފަށާނެ. އަދި ޖޫން 2025 ގައި އައިޑީކާޑު ޚިދުމަތް
• ނ. އަތޮޅުގައި ޖުލައި 2025 ގައި އައިޑީ ކާޑާއި ޕާސްޕޯޓުގެ ޚިދުމަތް
• ރ. އަތޮޅުގައި މޭ 2025 ގައި އައިޑީ ކާޑާއި ޕާސްޕޯޓުގެ ޚިދުމަތް
• ބ. އަތޮޅުގައި ޕާސްޕޯޓުގެ ޚިދުމަތް ޑިސެންބަރުގައި އަދި އައިޑީކާޑުގެ ޚިދުމަތް އޮގަސްޓުގައި
• ޅ. އަތޮޅުގައި ޕާސްޕޯޓުގެ ޚިދުމަތް އޭޕްރީލްގައި އަދި އައިޑިކާޑުގެ ޚިދުމަތް ސެޕްޓެންބަރުގައި
• އއ އަތޮޅުގައި ޕާސްޕޯޓު ސެޕްޓެންބަރުގައި އަދި އައިޑީކާޑުގެ ޚިދުމަތް އޮކްޓޫބަރުގައި
• އދ. އަތޮޅުގައި މާރިޗު މަހު ޕާސްޕޯޓު އަދި އޮގަސްޓު މަހު އައިޑީ ކާޑުގެ ޚިދުމަތް
• ވ. އަތޮޅުގައި ޕާސްޕޯޓުގެ ޚިދުމަތް ޑިސެންބަރުގައި އަދި އައިޑީކާޑު ނޮވެންބަރުގައި
• މ. އަތޮޅުގައި ޕާސްޕޯޓުގެ ޚިދުމަތް އޮގަސްޓުގައި އަދި އައިޑީކާޑު އޮކްޓޫބަރުގައި
• ފ. އަތޮޅުގައި ޕާސްޕޯޓުގެ ޚިދުމަތް ޖޫން މަހު އަދި އައިޑީކާޑުގެ ޚިދުމަތް ސެޕްޓެންބަރުގައި
• ތ. އަތޮޅުގައި ޕާސްޕޯޓު ފެބުރުވަރީގައި އަދި އައިޑީކާޑުގެ ޚިދުމަތް ޖުލައި މަހުގައި
• ގއ. އަތޮޅުގައި ޕާސްޕޯޓުގެ ޚިދުމަތް ޖަނަވަރީގައި
• އައްޑޫ ސިޓީ ހުޅުމީދޫގައި ޕާސްޕޯޓުގެ ޚިދުމަތް ނޮވެންބަރުގައި އަދި އައިޑީކާޑުގެ ޚިދުމަތް އޭޕްރީލްގައި
މި ލިޔުން ކިޔާލުމުން
