މެކްސިކޯގައި ބާއްވާ މިސް ޔުނިވާސް މުބާރާތުގައި ދިވެހިރާއްޖޭގެ ނަމުގައި ދިވެއްސަކު ބައިވެރިވުން ކުށްވެރި ކުރާ ކަމަށް މިނިސްޓްރީ އޮފް ޔޫތު އެމްޕަވަމެންޓް އިންފޮމޭޝަން އެންޑް އާޓްސްއިން ވިދާޅުވެއްޖެއެވެ.
ޔޫތު މިނިސްޓްރީން މިއަދު އެކަމާ ގުޅިގެން ނެރުނު ބަޔާނެއްގައި ވިދާޅުވީ، މިސް ޔުނިވާސްގައި ރާއްޖެ ތަމްސީލު ކުރަން ދިވެހި ސަރުކާރުގެ ބައިވެރިވުމެއް އޮތް ކަމަށް ދޭހަވާ ގޮތަށް ހަބަރުތައް އާންމުވަމުންދާ ކަމަށެވެ.
އަދި ދިވެހީންގެ ދީނާއި ސަގާފަތާ އާދަކާދައާއި ނުގުޅޭ ހަރަކާތްތަކާއި މުބާރާތްތައް ބޭއްވުމާއި އެކިއެކި ފަރާތްތަކުން ބާއްވާ އެފަދަ މުބާރާތްތަކާއި ހަރަކާތްތަކުގައި ދިވެހީން ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއް ނޫން ކަމަށް އެ ބަޔާނުގައިވެއެވެ. އަދި ދިވެއްސަކު އެފަދަ ހަރަކާތެއްގައި ބައިވެރިވެފައިވާތީ އެކަން ކުށްވެރިކުރާ ކަމަށް ބުނެފައިވެއެވެ.
މިނިސްޓްރީން ބުނީ މިފަދަ މުބާރާތެއްގައި ދިވެއްސަކު ބައިވެރިވުމަކީ ދިވެހިން ގަބޫލު ކުރާ އާންމު އަހުލާގީ މިންގަނޑުތަކާއި އުސޫލުތަކާވެސް ހިލާފު ކަންކަމަށްވާއިރު، ރާއްޖެ ތަމްސީލް ކުރުމުގެ ނަމުގައި ދިވެއްސަކު އެފަދަ ހަރަކާތްތަކަށް ދިއުމުގައި ސަރުކާރުގެ ބައިވެރިވުން އޮތް ގޮތައް ދެކެވޭ ވާހަކަތަކަކީ ދޮގު ވާހަކަތަކެއް ކަމަށެވެ.
އަދި މީގެ އިތުރުން ރާއްޖެ ތަމްސީލުކުރުމުގެ ނަމުގައި އެފަދަ އެއްވެސް ހަރަކާތެއްގައި ދިވެއްސަކު ބައިވެރިކުރުވުމަކީ ސަރުކާރުން ކުރާނެ ކަމަކަށް ނުވާއިރު، އެއީ ސަރުކާރުން ކުރުވާ ކަމެއް ކަމަށް ދޭހަވާ ގޮތަށް މައުލޫމާތު ނުފެތުުމަށް ވެސް ޔޫތު މިނިސްޓްރީން ގޮވާލާފައިވެއެވެ. އަދި އެފަދަ ކަންކަމުގައި ބައިވެރިނުވުމަށާއި، ބައިވެރިވުމަށް މަސައްކަތް ކުރަމުންދާ ފަރާތްތަކުން އެކަން ހުއްޓާލުމަށްވެސް ސަރުކާރުން ވަނީ ގޮވާލާފަ އެވެ.
މި މުބާރާތް އަންނަ މަހުގެ 14 ވަނަ ދުވަހު ފަށާއިރު، ރާއްޖެ ތަމްސީލް ކުރުމުގެ ނަމުގައި ދިވެއްސެއްގެ ގޮތުގައި ބައިވެރިވެފައިވަނީ އުމުރުން 21 އަހަރުގެ މޮޑެލް، މަރިޔަމް ޝައިނާ ނަސީމެވެ.
މި ލިޔުން ކިޔާލުމުން
