Monday, November 16
ސެޕްޓެމްބަރު މަހު ރާއްޖޭގެ އިގްތިސާދު 4 އިންސައްތަ ކުރިއަރައިފި

ރިއަލް އެސްޓޭޓް، ހޯލްސޭލް އަދި ރީޓެއިލް ވިޔަފާރި އަދި އިމާރާތްކުރުމުގެ ދާއިރާގެ ހަރަކާތްތައް އިތުރުވުމާއެކު، މި އަހަރުގެ ސެޕްޓެމްބަރު މަހު ރާއްޖޭގެ އިގްތިސާދު ކުރީ އަހަރުގެ ސެޕްޓެމްބަރު މަހާ އަޅާބަލާއިރު 4 އިންސައްތަ ކުރިއަރައިފިއެވެ.

މިކަން ހާމަވެފައިވަނީ މޯލްޑިވްސް ބިއުރޯ އޮފް ސްޓެޓިސްޓިކްސް (އެމް.ބީ.އެސް) އިން ކޮންމެ މަހަކު ނެރޭ، "މަންތްލީ އިންޑިކޭޓަރސް އޮފް އިކޮނޮމިކް ގްރޯތް" ރިޕޯޓުންނެވެ.

އެމް.ބީ.އެސް އިން އަންދާޒާކުރާ ގޮތުގައި، 2019 ވަނަ އަހަރުގެ އަސާސީ އަގުތަކަށް ބަލާއިރު ސެޕްޓެމްބަރު މަހުގެ އިގްތިސާދީ މިންވަރު ހުރީ 8.51 ބިލިއަން ރުފިޔާގައެވެ. މިއީ ކުރީ އަހަރަށްވުރެ 330 މިލިއަން ރުފިޔާގެ އިތުރުވުމެކެވެ. އަދި މިއީ 2024 ވަނަ އަހަރުގެ ސެޕްޓެމްބަރު މަހާ އަޅާބަލާއިރު 10 އިންސައްތައިގެ އިތުރުވުމެކެވެ.

ސެޕްޓެމްބަރު މަހުގެ އަހަރީ ކުރިއެރުން ވަނީ އޮގަސްޓު މަހު ހުރި 2.4 އިންސައްތައަށްވުރެ މަތިވެފައެވެ.

އިގްތިސާދީ ކުރިއެރުމަށް އެންމެ ބޮޑު ހިއްސާއެއް ވެފައިވަނީ ރިއަލް އެސްޓޭޓް ދާއިރާއިންނެވެ. އެއީ 0.9 ޕަސެންޓޭޖް ޕޮއިންޓެވެ. ހޯލްސޭލް އަދި ރީޓެއިލް ވިޔަފާރިއާއި އިމާރާތްކުރުމުގެ ދާއިރާގެ ކޮންމެ ދާއިރާއަކުން 0.8 ޕަސެންޓޭޖް ޕޮއިންޓް ހިއްސާކޮށްފައިވާއިރު، ޞިއްޙީ އަދި އިޖުތިމާޢީ ޚިދުމަތްތަކުގެ ދާއިރާއިން 0.6 ޕަސެންޓޭޖް ޕޮއިންޓް ވަނީ އިތުރުވެފައެވެ.

އަހަރުން އަހަރަށް ބަލާއިރު، އިމާރާތްކުރުމުގެ ދާއިރާގެ މަސައްކަތްތައް 16.6 އިންސައްތަ ކުރިއަރައި 457 މިލިއަން ރުފިޔާއަށް އަރާފައިވެއެވެ. ހޯލްސޭލް އަދި ރީޓެއިލް ވިޔަފާރި 8.8 އިންސައްތަ ކުރިއަރައި 815 މިލިއަން ރުފިޔާއަށް އަރާފައިވާއިރު، އޭގެ މައިގަނޑު ސަބަބަކީ އެތެރެކުރެވުނު މުދަލުގެ މިންވަރު އިތުރުވުން ކަމަށް އެމް.ބީ.އެސް އިން ފާހަގަކޮށްފައިވެއެވެ. މީގެ އިތުރުން، ދަތުރުފަތުރާއި މުވާޞަލާތީ ދާއިރާއަށް ވެސް 0.6 އިންސައްތައިގެ ކުރިއެރުމެއް ވަނީ ލިބިފައެވެ.

މި އަހަރުގެ ފުރަތަމަ ނުވަ މަސްދުވަހުގެ ތެރެއިން، އޭޕްރީލް މަސް ފިޔަވައި އެހެން ހުރިހާ މަހެއްގައި ވެސް ކުރީ އަހަރަށްވުރެ އިގްތިސާދީ ކުރިއެރުން ވަނީ މަތިވެފައެވެ. ޖެނުއަރީން ސެޕްޓެމްބަރާ ހަމައަށް ޖުމްލަ ޢަދަދު ހުރީ 81.1 ބިލިއަން ރުފިޔާގައެވެ. މިއީ 2025 ވަނަ އަހަރުގެ އެ މުއްދަތާ އަޅާބަލާއިރު 2.5 އިންސައްތައިގެ ކުރިއެރުމެކެވެ.

ނަމަވެސް، އޮގަސްޓު މަހާ އަޅާބަލާއިރު ސެޕްޓެމްބަރު މަހުގެ އިގްތިސާދީ ދުވެލި ވަނީ 11.6 އިންސައްތަ، ނުވަތަ 1.12 ބިލިއަން ރުފިޔާ ދަށްވެފައެވެ. ސެޕްޓެމްބަރު މަހުގެ އިގްތިސާދީ ހަރަކާތްތަކުގެ އެންމެ ބޮޑު ހިއްސާ (18.5 އިންސައްތަ) ފޯރުކޮށްދިން ފަތުރުވެރިކަމުގެ ދާއިރާ މަހުން މަހަށް ބަލާއިރު 29.5 އިންސައްތަ ދަށްވެފައިވާއިރު، މީގެ މައިގަނޑު ސަބަބަކީ މެދުއިރުމަތީގައި ހިނގަމުންދާ ހަނގުރާމައެވެ. އެ ހަމަނުޖެހުން ނިމުމުން ފަތުރުވެރިކަން ކުރިއަށްވުރެ ރަނގަޅުވާނެ ކަމަށް އަންދާޒާކުރެވެއެވެ.

އޮގަސްޓު މަހުން ސެޕްޓެމްބަރު މަހަށް އިގްތިސާދީ ހަރަކާތްތައް މަޑުޖެހުމަކީ 2024 އަދި 2025 ވަނަ އަހަރު ވެސް އާންމު އުސޫލުން އައިސްފައިވާ ބަދަލެކެވެ. އެހެންނަމަވެސް، ވޭތުވެދިޔަ ތިން އަހަރުގެ ތަފާސްހިސާބަށް ބަލާއިރު، މި އަހަރުގެ ސެޕްޓެމްބަރު މަހަކީ އެންމެ ބޮޑު އިގްތިސާދީ ކުރިއެރުމެއް ރެކޯޑުކުރެވުނު މަހެވެ.

މި ލިޔުން ކިޔާލުމުން

Like
Love
Ah Ah
Wow
Sad
ކިޔުންތެރިންގެ ހިޔާލު