ށ. ނޫމަރާ ޞިއްޙީ މަރުކަޒުގައި އަލަށް ޤާއިމުކުރި ލެބޯޓަރީގެ ޚިދުމަތް ރަސްމީކޮށް ފަށައިފިއެވެ.
މި ޚިދުމަތް ރަސްމީކޮށް ފައްޓަވައިދެއްވީ، ޞިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީއެވެ. ނޫމަރާގައި މި ޚިދުމަތް ފެށުމަށްޓަކައި އެރަށު ޞިއްޙީ މަރުކަޒުގައި ބޭއްވި ޚާއްޞަ ރަސްމިއްޔާތުގައި ޞިއްޙީ ވަޒީރުގެ އިތުރުން، ޞިއްޙީ ވުޒާރާގެ އިސްވެރިންނާއި، ނޫމަރާ ކައުންސިލްގެ މެންބަރުންނާއި، އަދި ޞިއްޙީ މަރުކަޒުގެ އިސްވެރިންނާއި މުވައްޒަފުން ބައިވެރިވެވަޑައިގެންނެވިއެވެ.
ލެބޯޓަރީގެ ޚިދުމަތް އިފްތިތާޙު ކޮށްދެއްވުމަށްފަހު، ވަޒީރު ޤީލާ ޢަލީ ވަނީ އަލަށް ހުޅުވުނު ލެބޯޓަރީ ބައްލަވާލައްވައި، ޞިއްޙީ މަރުކަޒުގެ އިސްވެރިންނާއި މުވައްޒަފުންނާ ބައްދަލުކުރައްވައި އެ މަރުކަޒުގެ މަސައްކަތްތަކާ ގުޅޭގޮތުން މަޝްވަރާ ކުރައްވާފައެވެ.
ށ. ނޫމަރާގެ ޞިއްޙީ ޚިދުމަތް އިތުރަށް ފުޅާކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިދިޔަ އަހަރު އެރަށަށް ކުރެއްވި ދަތުރުފުޅުގައި ރައްޔިތުންނާ ބައްދަލުކުރައްވައި ވިދާޅުވެފައެވެ. އެ ބައްދަލުކުރެއްވުމުގައި ރައީސް ވިދާޅުވީ، ޞިއްޙީ ދާއިރާއަކީ ސަރުކާރުން ވަރަށް ބޮޑު އަހައްމިއްޔަތުކަމެއް ދެއްވާ ދާއިރާއެއް ކަމަށާއި، މި ދާއިރާއިން މީހުން ބިނާކުރުމާއި ވަސީލަތްތައް އިތުރުކުރުމުގެ މަސައްކަތް ބާރަށް ކުރިއަށްދާ ކަމަށެވެ. އަދި ރަށުގައި ތިބެގެން އަސާސީ ޓެސްޓުތައް ހެދޭނެ އިންތިޒާމު ހަމަޖެއްސުމަށްޓަކައި ނޫމަރާގައި ލެބޯޓަރީގެ ޚިދުމަތް ޤާއިމުކޮށްދެއްވާނެ ކަމުގެ ޔަޤީންކަން އެމަނިކުފާނު ދެއްވިއެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މި ވަޢުދުގެ ދަށުން، މިހާތަނަށް ލެބޯޓަރީގެ ޚިދުމަތް ލިބެން ނެތް 76 ރަށެއްގައި މި ޚިދުމަތް ޤާއިމުކުރުމުގެ މަސައްކަތް ސަރުކާރުން މިހާރު ދަނީ ވަރަށް ހަލުވި ދުވެއްޔެއްގައި ކުރިއަށް ގެންދަމުންނެވެ.
ނޫމަރާގެ އިތުރުން އެ ސަރަޙައްދުގެ އެހެން ރަށްރަށުގައިވެސް ޞިއްޙީ ޚިދުމަތްތައް ފުޅާކުރުމަށް ސަރުކާރުން އިސްކަންދެމުން އަންނައިރު، ނޫމަރާގައި މި ހުޅުވުނު ލެބޯޓަރީއަކީ މި ސަރުކާރުން އަތޮޅުތަކުގައި ޚިދުމަތް ދޭން ފެށި 22 ވަނަ ލެބޯޓަރީއެވެ.
