ށ. ފީވަކު ޞިއްޙީ މަރުކަޒުގެ ޖާގައިގެ ދަތިކަން ހައްލުކުރުމަށްޓަކައި އަލަށް އިމާރާތްކުރި އެކްސްޓެންޝަން އިމާރާތް ރަސްމީކޮށް ހުޅުވައި، އެ މަރުކަޒުން ދެމުންގެންދާ ޚިދުމަތްތައް 24 ގަޑިއިރަށް ބަދަލުކޮށްފިއެވެ.
މިކަމަށްޓަކައި ށ. ފީވަކުގައި ބޭއްވި ޚާއްޞަ ރަސްމިއްޔާތެއްގައި އެކްސްޓެންޝަން އިމާރާތް ރަސްމީކޮށް ހުޅުއްވައިދެއްވީ ޞިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީއެވެ. މި ރަސްމިއްޔާތުގައި ޞިއްޙީ ވުޒާރާގެ އިސްވެރިންނާއި، ފީވަކު ކައުންސިލްގެ މެންބަރުންގެ އިތުރުން ޞިއްޙީ މަރުކަޒުގެ އިސްވެރިންނާއި މުވައްޒަފުން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޤީލާ ޢަލީ ވިދާޅުވީ، އައު އެކްސްޓެންޝަން އިމާރާތާއެކު ޞިއްޙީ ޚިދުމަތް 24 ގަޑިއިރަށް ބަދަލުވެގެން ދިޔުމަކީ ފީވަކުގެ ރައްޔިތުންނަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ. އަދި މި އިމާރާތުގެ ސަބަބުން މަރުކަޒުގެ އިދާރީ ހިންގުން އިތުރަށް ހަރުދަނާވެގެންދާނެ ކަމަށާއި، މިހާރު ދެމުން އަންނަ ޕަބްލިކް ހެލްތުގެ ޚިދުމަތްތައްވެސް މި އައު އިމާރާތަށް ބަދަލުކުރެވޭނެ ކަމަށް ވަޒީރު ފާހަގަކުރެއްވިއެވެ. މީގެއިތުރުން، ބަލިތަކުން ރައްކާތެރިވެ ތިބުމުގެ ރަނގަޅު އާދަތައް އަށަގަންނަވަން ޖެހޭކަން ފާހަގަކުރައްވައި، ސަރުކާރުގެ އަމާޒަކީ ފީވަކަކީ އާންމު ޞިއްޙަތުގެ ނަމޫނާ ރަށަކަށް ހެއްދެވުން ކަމުގައިވެސް ވަޒީރު ވިދާޅުވިއެވެ.
ފީވަކު ޞިއްޙީ މަރުކަޒުގައި މީގެ ކުރިން ޚިދުމަތް ދެމުން އައީ ދުވާލަކު 16 ގަޑިއިރުއެވެ. ނަމަވެސް، އަލަށް ހުޅުވުނު އެކްސްޓެންޝަން އިމާރާތާއެކު މިހާރު އެ މަރުކަޒުން މެދުކެނޑުމެއްނެތި 24 ގަޑިއިރު ޚިދުމަތް ލިބިގެންދާނެއެވެ. މި އައު އިމާރާތަށް އިދާރީ ޚިދުމަތްތަކާއި ޕަބްލިކް ހެލްތު ޔުނިޓުގެ އިތުރުން އެހެނިހެން ގިނަ ޚިދުމަތްތަކެއް ވަނީ ބަދަލުކޮށްފައެވެ.
އައު އިމާރާތް ހުޅުއްވައިދެއްވުމަށްފަހު، ވަޒީރު ވަނީ އެ އިމާރާތުގެ އެކި ބައިތައް ބައްލަވާލައްވައި، ފީވަކު ޞިއްޙީ މަރުކަޒުގެ މުވައްޒަފުންނާއި އިސްވެރިންނާ ބައްދަލުކުރައްވައި ޚިދުމަތްތައް އިތުރަށް ރަނގަޅުކުރުމާ ގުޅޭގޮތުން މަޝްވަރާކުރައްވާފައެވެ.
