ށ. އަތޮޅު ޅައިމަގު ޞިއްޙީ މަރުކަޒުގައި އަލަށް ޤާއިމުކުރި ލެބޯޓަރީގެ ޚިދުމަތް ރަސްމީކޮށް ފަށައިފިއެވެ.
މި ޚިދުމަތް ރަސްމީކޮށް ފައްޓަވައިދެއްވީ އެކަމަށްޓަކައި ޅައިމަގުގައި ބޭއްވި ޚާއްޞަ ރަސްމިއްޔާތެއްގައި ޞިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވަޒީރު ޤީލާ ޢަލީއެވެ. މި ރަސްމިއްޔާތުގައި ޞިއްޙީ ވުޒާރާގެ އިސްވެރިންނާއި، ޅައިމަގު ކައުންސިލްގެ މެންބަރުންގެ އިތުރުން އެ ރަށު ޞިއްޙީ މަރުކަޒުގެ އިސް މުވައްޒަފުން ބައިވެރިވެވަޑައިގެންނެވިއެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ރިޔާސީ ވަޢުދުފުޅެކެވެ. އެގޮތުން، މިހާތަނަށް މި ޚިދުމަތް ލިބެން ނެތް 76 ރަށެއްގައި ލެބޯޓަރީ ޤާއިމުކުރުމުގެ މަސައްކަތް ސަރުކާރުން ބާރު ސްޕީޑުގައި ކުރިއަށްގެންދާއިރު، ޅައިމަގުގައި މި ހުޅުވުނު ލެބޯޓަރީއަކީ މި ސަރުކާރުން އަތޮޅުތަކުގައި ޚިދުމަތް ދޭން ފެށި 20 ވަނަ ލެބޯޓަރީއެވެ. ޅައިމަގުގެ އިތުރުންވެސް އެ ސަރަޙައްދުގެ އެހެން ރަށްރަށުގައި މިފަދަ އަސާސީ ޞިއްޙީ ޚިދުމަތްތައް ފުޅާކުރުމަށް ސަރުކާރުން ދަނީ ޚާއްޞަ އިސްކަމެއް ދެމުންނެވެ.
ޅައިމަގުގެ ޞިއްޙީ ޚިދުމަތް އިތުރަށް ފުޅާކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު އެރަށަށް ކުރެއްވި ދަތުރުފުޅުގައި ވަނީ ވިދާޅުވެފައެވެ. އެގޮތުން ޞިއްޙީ މަރުކަޒުގެ އައު ޢިމާރާތުގެ މަސައްކަތް ނިމުމުން، ޚިދުމަތް 16 ގަޑިއިރަށް ބަދަލުކުރައްވާނެ ކަމަށާއި، އަދި އައު ޢިމާރާތް ތަރައްޤީ ކުރަނީ 4 އެނދާއި ލެބޯޓަރީ އަދި ޒަމާނީ އެހެނިހެން ވަސީލަތްތައް ހިމަނައިގެންކަން ރައީސް ވަނީ ފާހަގަކުރައްވާފައެވެ.
މީގެކުރިން ޅައިމަގު ރައްޔިތުންނަށް އާދައިގެ ލޭގެ ޓެސްޓެއް ހަދާލުމަށްވެސް ޖެހެނީ ކަނޑު ހުރަސްކޮށް، އަތޮޅުގެ އެހެން ރަށަކަށް ދަތުރުކުރާށެވެ. މިކަމުގެ ސަބަބުން ރައްޔިތުން އުފުލަންޖެހުނު ތަކުލީފުތަކަށް މިހާރު މިވަނީ ނިމުމެއް އައިސްފައެވެ. އަލަށް ފެށުނު މި ޚިދުމަތާއެކު، އަމިއްލަ ރަށުގައި ތިބެގެން އަސާސީ ޓެސްޓުތައް ހެދުމުގެ ފުރުޞަތު ފަހިވެގެން ގޮސްފައިވެއެވެ.
