ށ. މަރޮށީ ޞިއްޙީ މަރުކަޒުގައި އަލަށް ޤާއިމުކުރި ލެބޯޓަރީގެ ޚިދުމަތް ރަސްމީކޮށް ފަށައި، އެ މަރުކަޒުން ދެމުންގެންދާ ޞިއްޙީ ޚިދުމަތްތައް 24 ގަޑިއިރަށް ބަދަލުކޮށްފިއެވެ.
މަރޮށީގައި ލެބޯޓަރީގެ ޚިދުމަތް ރަސްމީކޮށް ފައްޓަވައިދެއްވީ މިކަމަށްޓަކައި އެރަށުގައި ބޭއްވި ޚާއްޞަ ރަސްމިއްޔާތެއްގައި ޞިއްޙަތާއި ޢާއިލާއާއި އިޖްތިމާޢީ އެހީއާ ބެހޭ ވަޒީރު ޤީލާ ޢަލީއެވެ. މި ރަސްމިއްޔާތުގައި ވަޒީރުގެ އިތުރުން ޞިއްޙީ ވުޒާރާގެ އިސްވެރިންނާއި، މަރޮށީ ކައުންސިލްގެ މެންބަރުންނާއި، އެރަށު ޞިއްޙީ މަރުކަޒުގެ ވެރިންނާއި މުވައްޒަފުން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަދައްކަވަމުން ވަޒީރު ޤީލާ ޢަލީ ވިދާޅުވީ، އައު ލެބޯޓަރީއާއެކު މަރޮށީގެ ޞިއްޙީ ޚިދުމަތް 24 ގަޑިއިރަށް ބަދަލުވެގެން ދިޔުމަކީ އެރަށުގެ ރައްޔިތުންނަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ. އަދި މި ޚިދުމަތް ފެށުމާއެކު އާންމު ޓެސްޓުތައް ހެދުމަށްޓަކައި ރަށުން ބޭރަށް ދަތުރުކުރަން ޖެހުމުގެ ތަކުލީފަށް ދާއިމީ ހައްލެއް ލިބިގެންދާނެ ކަމަށްވެސް ވަޒީރު ފާހަގަކުރެއްވިއެވެ.
މަރޮށީގައި މީގެ ކުރިން ޞިއްޙީ ޚިދުމަތް ދެމުން އައީ ދުވާލަކު 16 ގަޑިއިރުއެވެ. ނަމަވެސް، ލެބޯޓަރީގެ ޚިދުމަތް ޤާއިމުކުރުމާއެކު މިހާރު ވަނީ ޚިދުމަތް މެދުކެނޑުމެއްނެތި 24 ގަޑިއިރު ލިބޭނެ އިންތިޒާމު ހަމަޖައްސާފައެވެ.
މީގެކުރިން ލެބޯޓަރީގެ ޚިދުމަތް ނެތުމުގެ ސަބަބުން މަރޮށީގެ ރައްޔިތުންނަށް ޖެހެނީ ޓެސްޓުތައް ހެދުމަށް އަތޮޅުގެ އެހެން ރަށްރަށަށް ދަތުރުކުރާށެވެ. ނަމަވެސް، ރަށުގައި ތިބެގެން ލޭ އެޅުމުގެ ޚިދުމަތާއި އަދި އާންމު ޓެސްޓްތައް ހެދޭނެ މަގު ފަހިވުމަކީ ރައްޔިތުންގެ ޖީބަށް ބޮޑު ލުޔެއް ލިބި، ވަގުތާއި ހޭދަ ސަލާމަތްވެގެންދާނެ ކަމެކެވެ.
ޞިއްޙަތާއި ޢާއިލާއާއި އިޖްތިމާޢީ އެހީއާ ބެހޭ ވުޒާރާއިން ވިދާޅުވި ގޮތުގައި، މި ލެބޯޓަރީގެ ސަބަބުން ހަކުރު ބައްޔާއި، ހިތުގެ ބަލިތަކާއި، ލޭމައްޗަށް ދިއުމުގެ އިތުރުން ކިޑްނީގެ މައްސަލަތައް ފަދަ ގައިންގަޔަށް ނާރާ ބޮޑެތި ބަލިތައް ދުރާލައި ދެނެގަތުމަށް ފަސޭހަވެގެންދާނެއެވެ. އަދި މީގެ އިތުރުން މަދިރީގެ ޒަރިއްޔާއިން ފެތުރޭ ޑެންގޫ ފަދަ ބަލިތަކުގެ ޓެސްޓުތަކާއި، މާބަނޑު މީހުން ޤަވާއިދުން ހަދަންޖެހޭ ޓެސްޓުތައްވެސް މިހާރު ރަށުގައި ތިބެގެން ހެދޭނެ ކަމަށް އެ ވުޒާރާއިން މަޢުލޫމާތު ދެއެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި ލެބޯޓަރީގެ ޚިދުމަތް ޤާއިމުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. އެގޮތުން މިހާތަނަށް ލެބޯޓަރީގެ ޚިދުމަތް ޤާއިމުވެފައި ނުވާ 76 ރަށުގައި އެ ޚިދުމަތް ފެށުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން، މަރޮށީގައި މި ހުޅުވުނު ލެބޯޓަރީއަކީ އެ ސިޔާސަތުގެ ދަށުން ޚިދުމަތް ދޭން ފެށި 19 ވަނަ ލެބޯޓަރީއެވެ.
