މާލޭގެ އަމީނީ މަގު މަރާމާތު ކުރުމުގެ މަޝްރޫޢުގެ ދަށުން، ފުޑް ކޯޓާ ދިމާ ސަރަހައްދުގެ މަސައްކަތް ނިންމައި އެ ސަރަހައްދު ރޭ އަލުން އާންމުންނަށް ހުޅުވާލައިފިއެވެ.
ސެގްމެންޓްތަކަކަށް ބަހާލައިގެން އެމްޓީސީސީން ކުރިއަށްގެންދިޔަ މި މަޝްރޫޢުގެ ފުރަތަމަ ސެގްމަންޓަކީ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމަޔަށް އޮތް ސަރަހައްދެވެ. އަދި ދެވަނަ ސެގްމަންޓަކީ ދިވެހިރާއްޖޭގެ އަޑު ކުރިމަތީގައި އޮންނަ ހަތަރުއަނގޮޅި ކަންމަތީގައި ތާރުއެޅުމުގެ މަސައްކަތެވެ. އަމީނީ މަގު މަރާމާތު ކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ ޖޫން މަހުގެ 15 ވަނަ ދުވަހުއެވެ.
ކުރީގެ ސަރުކާރުން 84.4 މިލިއަން ރުފިޔާ ޚަރަދުކޮށްގެން ހެދި 1.79 ކިލޯމީޓަރުގެ އަމީނީ މަގު ބޭނުންކުރަން ފެށިތާ މާގިނަ ދުވަސްތަކެއް ނުވެ، މަގުގައި ބޮޑެތި އަޑިގުޑަންތައް ހެދި ތާރުގަނޑު އުފުލެން ފެށިއެވެ. ޚާއްޞަކޮށް މަގުގެ ހުޅަނގު ފަރާތުގެ ހާލަތު އިންތިހާއަށް ގޯސްވެ، ދުއްވާ މީހުންނަށް ބޮޑެތި ތަކުލީފުތަކެއް ކުރިމަތިވުމާ ގުޅިގެން ސަރުކާރުން މި މަގު އަލުން ހަދަން ފެށީ މިދިޔަ މަހުގެ 3 ވަނަ ދުވަހުއެވެ.
ފަންނީ މާހިރުން ފާހަގަކުރާ ގޮތުގައި ކުރިން ހެދި މަގު އެހާ އަވަހަށް ހަލާކުވާން މެދުވެރިވި މައިގަނޑު ސަބަބަކީ، ތާރު އެޅުމަށްފަހު އެކަށީގެންވާ ވަރަށް ހިކުމުގެ ފުރުސަތު ނުދީ، މަގު ހުޅުވާލައި ބަރު އުޅަނދުތައް ދުއްވުމުގެ ސަބަބުންނެވެ.
