މަސްތުވާތަކެތީގެ މައްސަލައެއްގައި ހުޅުމާލެ ފޭސް 1 އިން 22 އަހަރުގެ ޒުވާނަކު ފުލުހުންގެ ބެލުމުގެ ދަށަށް ގެންގޮސްފިއެވެ.
މި މައްސަލައާ ގުޅިގެން މި އޮކްޓޫބަރު މަހުގެ 3 ވަނަ ދުވަހު ހައްޔަރުކޮށްފައިވަނީ ޏ. ފުވައްމުލައް، ދޫޑިގަން، ރެއަރ، މުޙައްމަދު ޖައުޝް ޝުޖާޢުއެވެ.
ފުލުހުން ހުޅުމާލެ ފޭސް 1 ގެ ރަށުތެރެ ޕެޓްރޯލްކުރަމުންދިޔައިރު، ފުލުހުން ފެނުމުން އޭނާގެ ޢަމަލުތައް ހުރިގޮތުން ތުހުމަތުކުރެވިގެން ހުއްޓުވައި ބަލައިފާސްކުރިއިރު، މަސްތުވާތަކެތި ކަމަށް ބެލެވޭ އެއްޗެއްހުރި ސެލޯފިންކޮޅުތަކެއް ވަނީ ފެނިފައެވެ. ފުލުހުން މަޢުލޫމާތު ދޭ ގޮތުގައި މި ތަކެތީގެ ވަގުތީ ބަރުދަނަކީ 57 ގްރާމެވެ.
މި މައްސަލައާ ގުޅިގެން މުޙައްމަދު ޖައުޝް ޝުޖާޢުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އޭނާގެ ބަންދަށް ވަނީ 15 ދުވަހުގެ މުއްދަތެއް ދީފައެވެ.
މި މައްސަލަ ފުލުހުން ދަނީ އިތުރަށް ތަޙުޤީޤުކުރަމުންނެވެ.
