ސަރުކާރު ކުންފުނިތައް މެދުވެރިކޮށް ތަރައްޤީކުރާ 10 ރިސޯޓުގެ މަޝްރޫޢަކީ ދިވެހި ފަތުރުވެރިކަމުގެ ސިނާޢަތަށް ބޮޑު ބަދަލެއް އަންނާނެ ކަމެއް ކަމަށް ރާއްޖެއަށް ފަތުރުވެރިކަން ތަޢާރަފުކުރެއްވި އެއް ބާނީ އަދި ކްރައުން ގްރޫޕުގެ ޗެއާމަން ޙުސައިން އަފީފް ވިދާޅުވެއްޖެއެވެ.
ޤައުމީ ފަތުރުވެރިކަމުގެ ދުވަހާ ގުޅިގެން ބޭއްވި ޚާއްޞަ ޖަލްސާގައި ވާހަކަދައްކަވަމުން އަފީފް ވިދާޅުވީ، އާންމު ރައްޔިތުންނަށް ހިއްސާވެވޭ ގޮތަށް ތަރައްޤީކުރާ މި ރިސޯޓުތަކުގެ ސަބަބުން ގިނަ ބަޔަކަށް ފަތުރުވެރިކަމުގެ ސީދާ މަންފާ ލިބިގެންދާނެ ކަމަށެވެ. އަދި މިއީ އެބޭފުޅާ ވަރަށް ބޮޑަށް އުންމީދުކުރައްވާ ކަމެއްކަން ފާހަގަކުރައްވައި، މި މަޝްރޫޢު ކާމިޔާބުކަމާއެކު ކުރިއަށްގެންދިއުމަށް ސަރުކާރަށް އެދިވަޑައިގެންނެވިއެވެ.
ރާއްޖޭގައި ފަތުރުވެރިކަން ފެށުނުތާ 54 އަހަރު ވެފައިވާއިރު، ސިނާޢަތުން ލިބޭ އާމްދަނީ ސީދާ ރައްޔިތުންނަށް ފޯރުކޮށްދިނުމަށް ސަރުކާރުން ގެންގުޅޭ މި ސިޔާސަތަކީ އިޤްތިޞާދީ އޮނިގަނޑަށް ކުރިއެރުން ގެނެސްދޭނެ ސިޔާސަތެއް ކަމަށްވެސް އަފީފް ފާހަގަކުރެއްވިއެވެ.
ކުރިއަށްއޮތް ތިން އަހަރުގެ ތެރޭގައި ސަރުކާރު ކުންފުނިތައް މެދުވެރިކޮށް މަދުވެގެން 10 ރިސޯޓު ތަރައްޤީކުރުމަށް ކެބިނެޓުން ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރެއްވީ މިއަހަރުގެ ރިޔާސީ ބަޔާނުގައެވެ. ރައީސް ވިދާޅުވި ގޮތުގައި، 2030 ވަނަ އަހަރުން ފެށިގެން މި ރިސޯޓުތަކުން ލިބޭ ފައިދާ ބޭރު ފައިސާއިން ކޮންމެ ރައްޔިތެއްގެ އެކައުންޓަށް ޖަމާކޮށްދެވޭނެއެވެ. އެގޮތުން ކޮންމެ ރައްޔިތަކަށް އަހަރަކު މަދުވެގެން 400 ޑޮލަރު އެއީ 5 މީހުންގެ އާއިލާއަކަށް ބަލާކަމަށް ވަންޔާ އަހަރަކު 2,000 ޑޮލަރު ލިބޭނެއެވެ.
މި މަޝްރޫޢު ކުރިއަށްގެންދިއުމަށްޓަކައި ސަރުކާރު ހިއްސާވާ ކުންފުނިތަކަށް ފަތުރުވެރިކަމުގެ ވިޔަފާރި ކުރެވޭނެ ގޮތަށް ޓޫރިޒަމް ގާނޫނަށް ސަރުކާރުން ހުށަހެޅި އިސްލާހު، ފާއިތުވި ޑިސެމްބަރު މަހު ރައްޔިތުންގެ މަޖިލީހުން ވަނީ ފާސްކޮށްފައެވެ. އާއެކު، ދައުލަތުގެ އާންމު މަންފާއަށްޓަކައި ސަރުކާރު ކުންފުނިތަކަށް ފަސޭހައިން ފަޅުތަކާއި ރަށްތައް ދޫކުރެވޭނެ މަގު ވަނީ ފަހިވެފައެވެ.
