ބެލިސްޓިކް މިސައިލާއި ޑްރޯން ބޭނުންކޮށްގެން ސަޢޫދީ ޢަރަބިއްޔާގެ މުހިންމު ތެޔޮ މަރުކަޒަކަށް ޙަމަލާދީފައިވާ ކަމަށް ޔަމަނުގެ ޙޫޘީން ހާމަކޮށްފިއެވެ. މިކަން އެ ޖަމާޢަތުން ހާމަކޮށްފައިވަނީ އަރާމްކޯ ރިފައިނަރީގައި އަލިފާން ރޯވެފައިވާ ދަނޑިވަޅެއްގައެވެ. ނަމަވެސް މި ޙާދިސާއާ ގުޅޭގޮތުން ސަޢޫދީން އަދި ރަސްމީ ބަޔާނެއް ނެރެފައެއް ނުވެއެވެ.
ޙޫޘީންގެ ތަރުޖަމާނު ޔަޙްޔާ ސަރީ ވިދާޅުވީ، މި ޙަމަލާއަކީ ވޭތުވެދިޔަ 24 ގަޑިއިރުގެ ތެރޭގައި ސަންޢާ ހިމެނޭހެން އެ ޖަމާޢަތުގެ ކޮންޓްރޯލް އޮންނަ ސަރަޙައްދުތަކަށް ސަޢޫދީން ދިން 60 އެއްހާ ވައިގެ ޙަމަލާތަކުގެ ބަދަލުހިފުމެއްގެ ގޮތުން ދިން ޙަމަލާތަކެއް ކަމަށެވެ.
