އިސްރާއީލުން ޣައްޒާއަށް ދެމުންގެންދާ ޙަމަލާތަކާ ގުޅިގެން އެ ސަރަޙައްދަށް ލިބިފައިވާ ބޮޑެތި ގެއްލުންތަކާއި ސުންނާފަތިވުން ދައްކުވައިދޭ ސެޓެލައިޓް ފޮޓޯތަކެއް އެމެރިކާގެ މަޝްހޫރު ފިލްމީ ބަތަލާ އެންޖެލީނާ ޖޯލީ ސޯޝަލް މީޑިއާގައި ހިއްސާކޮށްފިއެވެ.
ހަނގުރާމައިގެ ކުރިއާއި ފަހުގެ ޙާލަތު އަންގައިދޭ މި ފޮޓޯތައް އިންސްޓަގްރާމްގައި ހިއްސާކުރަމުން ޖޯލީ ބުނީ ގޫގުލް އާތު މެދުވެރިކޮށް ޣައްޒާއަށް ލިބިފައިވާ ބޮޑެތި ގެއްލުންތައް ވަރަށް ސާފުކޮށް މިހާރު ބަލައިލެވޭނެ ކަމަށެވެ.
ޣައްޒާގެ މުޅި އަވަށްތައް ސުންނާފަތިވެފައިވާ ކަމަށާއި، ޢާންމު ރައްޔިތުން ދިރިތިބުމަށް ބޭނުންވާ އަސާސީ ޢުމްރާނީ ވަސީލަތްތަކަށް ބޮޑެތި ގެއްލުންތައް ދީ ހަލާކުކޮށްލާފައިވާ ކަމަށް އެންޖެލީނާ ޖޯލީ ހާމަކޮށްފިއެވެ.
ޣައްޒާގެ ގާތްގަނޑަކަށް 1.98 މިލިއަން މީހުން އިންސާނީ އެހީތެރިކަމަށް ބޭނުންވެފައިވާއިރު، އެހީގެ ސާމާނާއި ހިޔާވަހިކަމުގެ ތަކެތި ފޯރުކޮށްދިނުމުގައި ގިނަ ހުރަސްތަކަކާއި ލަސްތަކެއް ކުރިމަތިވަމުންދާކަން އޭނާ ފާހަގަކުރިއެވެ.
ކުރިއަށް އޮތް ފިނި މޫސުމުގެ ކުރިން މީހުންނަށް ރައްކާތެރި ހިޔާވަހިކަން ފޯރުކޮށްދިނުމުގެ މުހިންމުކަން ފާހަގަކުރަމުން، ޢާންމުންނަށް އެކަށީގެންވާ މިންވަރަށް އިންސާނީ އެހީ ފޯރުކޮށްދިނުމަށާއި ހޮސްޕިޓަލްތަކަށް ބޭނުންވާ ޞިއްޙީ ސާމާނު އަވަހަށް ފޯރުކޮށްދިނުމަށް ޖޯލީ ވަނީ ގޮވާލާފައެވެ.
