އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ހުއްޓުވުމަށްޓަކައި އެމެރިކާ އާއި އީރާނާ ދެމެދު މެދުވެރިއެއްގެ ދައުރު އަދާކުރަން ރަޝިއާ ތައްޔާރަށް އޮތް ކަމަށާއި، ތެހެރާނާ އެކު އޮތް ގުޅުން ދުވަހަކުވެސް ޤުރުބާން ނުކުރާނެ ކަމަށް ރަޝިއާގެ ސެކިއުރިޓީ ކައުންސިލްގެ ޑެޕިއުޓީ ޗެއާމަން ޑިމިޓްރީ މެޑްވެޑޭވް ވިދާޅުވެއްޖެއެވެ.
އީރާނާއި ރަޝިއާއާ ދެމެދު އޮތް ގުޅުން ވަރަށް ބޮޑަށް ބަދަހިވެފައިވާ ކަމަށާއި، ވޭތުވެދިޔަ އަހަރު ދެ ޤައުމުގެ ވިޔަފާރި 20 އިންސައްތަ އިތުރުވެފައިވާ ކަމަށް މެޑްވެޑޭވް ފާހަގަކުރެއްވިއެވެ. އަދި ދެ ޤައުމަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން މާލީ މުޢާމަލާތްތަކަށް ބަދަލު ގޮތްތަކެއް ހޯދަމުންދާއިރު، އެސްސީއޯގެ މެންބަރު ޤައުމުތަކުގެ މެދުގައި ހިނގާ ވިޔަފާރީގެ ގާތްގަނޑަކަށް 90 އިންސައްތަ މުޢާމަލާތްތައް މިހާރުވެސް ކުރަނީ އެ ޤައުމުތަކުގެ އަމިއްލަ ފައިސާއިން ކަމަށް އޭނާ ވިދާޅުވިއެވެ.
އީރާނުގެ ރަޝްތު ސިޓީ އާއި އަޒަރުބައިޖާނުގެ ބޯޑަރުގައިވާ އަސްތާރާއާ ދެމެދު އަޅާ ރަޝްތު-އަސްތާރާ ރޭލްވޭގެ ސަބަބުން ބޮޑެތި ބަދަލުތަކެއް އަންނާނެ ކަމަށް މެޑްވެޑޭވް ވިދާޅުވިއެވެ. ރަޝިއާ އާއި އީރާނުން ޚަރަދުކުރާ މި މަޝްރޫޢަކީ އަޒަރުބައިޖާނާއި އީރާން މަގުން ޔޫރަޕާއި ރަޝިއާ އަދި ގަލްފުގެ ޤައުމުތަކާއި އިންޑިއާއާ ގުޅުވައިދޭ 'އިންޓަނޭޝަނަލް ނޯތު-ސައުތު ޓްރާންސްޕޯޓް ކޮރިޑޯ' ގެ މުހިންމު ބައެކެވެ.
މީގެ އިތުރުން، ބުޝެހްރު ފެސިލިޓީގެ އިތުރުން އީރާނުގައި އައު ނިއުކްލިއާ ޕަވަރ ޕްލާންޓެއް އެޅުމަށް ރަޝިއާއިން ރާވަމުންދާ ކަމަށާއި، ބައިނަލްއަޤްވާމީ ވިޔަފާރީގެ މުހިންމު މަގެއް ކަމަށްވާ ހޮރްމުޒް ކަނޑުއޮޅީގެ ސަލާމަތާއި ރައްކާތެރިކަން ކަށަވަރުކުރުމުގައި އީރާނުން މުހިންމު ދައުރެއް އަދާކުރާކަން މެޑްވެޑޭވް ފާހަގަކުރެއްވިއެވެ.
