އެއްވެސް ޙާލަތެއްގައި ސޯމާލިއާގެ ސަރަޙައްދުގައި އިސްރާއީލުގެ އެއްވެސް ޙަރަކާތެއް ބަލައިނުގަނެވޭނެ ކަމަށާއި، މެދުއިރުމަތީގެ ހަމަނުޖެހުންތަކުގެ ތެރެއަށް ސޯމާލިއާ ވެއްދުމަށް ކުރާ އެއްވެސް މަސައްކަތެއް ކާމިޔާބު ނުވާނެ ކަމަށް އެ ޤައުމުގެ ރައީސް ޙަސަން ޝައިޚް މަޙްމޫދު ވިދާޅުވެއްޖެއެވެ.
ރައީސް މަޙްމޫދު ފާހަގަކުރެއްވި ގޮތުގައި އިސްރާއީލުން މަސައްކަތް ކުރަމުންދަނީ ޚަލީޖުގެ ޤައުމުތަކާއި އީރާނާ ގާތްވުމުގެ ބޭނުމުގައި، ސޯމާލީލޭންޑްގެ ސްޓްރެޓީޖިކް ބަނދަރު ސިޓީއެއް ކަމަށްވާ ބަރްބަރާގައި ކަނޑުގެ އަސްކަރީ މަރުކަޒެއް ޤާއިމުކޮށް، އެ ސިޓީގެ އެއާޕޯޓް ބޭނުންކުރުމަށެވެ. ނަމަވެސް، މިފަދަ ޙަރަކާތްތަކުން ޤައުމަށް ކުރިމަތިވާ ގޮންޖެހުންތަކާ ދެކޮޅަށް ތެދުވެ އެކަންކަމުން އަރައިގަންނާނެ ކަމަށް އެމަނިކުފާނު ވިދާޅުވިއެވެ.
އިސްރާއީލަކީ ބައިނަލްއަޤްވާމީ ޤާނޫނުތަކަށް ނުކިޔަމަންތެރިވާ ބާރެއްގެ ގޮތުގައި ސިފަކުރައްވަމުން، މި ރޭވުންތަކަކީ 'ގްރޭޓަރ އިސްރާއީލް' މަޝްރޫޢާ ގުޅިފައިވާ ކަންކަން ކަމަށް ރައީސް ވިދާޅުވިއެވެ. އަދި ދުނިޔޭގެ އެހެން އެއްވެސް ޤައުމަކުން ބަލައިގެންފައި ނުވާ ސޯމާލީލޭންޑްގެ މިނިވަންކަން އިސްރާއީލުން ބަލައިގަތް މައްސަލައަށް ފާޑުވިދާޅުވަމުން، އެ ސަރަޙައްދުގެ ރައްޔިތުންވެސް އިސްރާއީލުގެ މި ޢަމަލުތަކާ މުޅިން ދެކޮޅު ކަމަށް އެމަނިކުފާނު ފާހަގަކުރެއްވިއެވެ.
ޓެރަރިޒަމާ ދެކޮޅަށް ކުރާ މަސައްކަތުގައި ސޯމާލިއާގެ އެންމެ ވަރުގަދަ ބައިވެރިއަކީ އެމެރިކާކަން ފާހަގަކުރައްވައި، ބޮޑެތި ސިޓީތަކުގައި އަލްޝަބާބުގެ ބާރެއް ނެތް ކަމަށާއި އެ ޖަމާޢަތަށް ޤައުމުގެ ކޮންޓްރޯލް ނުނެގޭނެ ކަމަށް ރައީސް މަޙްމޫދު ވިދާޅުވެއްޖެއެވެ. އަދި އަވަށްޓެރި އިތިއޯޕިއާއާއެކު ރަނގަޅު ގުޅުމެއް އޮތް ކަމަށާއި، އިޤްތިޞާދީ ބޭނުންތަކަށް ސޯމާލިއާގެ ބަނދަރުތައް އެއްބަސްވުމެއްގެ ދަށުން ބޭނުންކުރުމުގެ ފުރުޞަތު ދިނުމަށް މޮގަދިޝޫގެ އެއްވެސް އިޢުތިރާޟެއް ނެތް ކަމަށްވެސް އެމަނިކުފާނު ހާމަކުރެއްވިއެވެ.
މީގެއިތުރުން، ޔަމަނުގެ ޙޫޘީން ބާބުލް މަންދަބު ކަނޑުއޮޅީގެ ދަތުރުފަތުރަށް ހުރަސްއަޅައި ސަރަޙައްދީ ހަމަޖެހުން ނަގާލަމުންދާ ކަމަށް ރައީސް މަޙްމޫދު ތުހުމަތު ކުރެއްވިއެވެ. މި ދަނޑިވަޅުގައި ޙޫޘީން ސަޢޫދީ ޢަރަބިއްޔާއަށް ދޭ ޙަމަލާތައް ވަރުގަދަކޮށްފައިވާތީ، ސަޢޫދީގެ ވަލީއަޙުދު މުޙައްމަދު ބިން ސަލްމާން ވަނީ ޤައުމުގެ ސަލާމަތަށް ދުލެއް ނުދެއްވާނެ ކަމަށާއި ހަނގުރާމަވެރިން އިޚްތިޔާރުކުރީ މުޅި ސަރަޙައްދަށް ނުރައްކާވާ ފަދަ މަގެއް ކަމަށް ވިދާޅުވެފައެވެ.
