ބ. ކިހާދޫގައި ހުންނަ އެމްއެންޑީއެފް ސަރވިސް ކޯރގެ ސްކޫލް އޮފް އިންޖިނިއަރިންގ އެންޑް ލޮޖިސްޓިކްސްގައި މިއަދު ބޭއްވި މި ރަސްމިއްޔާތު ޝަރަފުވެރިކޮށްދެއްވީ ދިފާޢީ އަދި ވަޠަނީ ޚިދުމަތާބެހޭ ވަޒީރު އޮނަރަބަލް ޙަސަން ރަޝީދެވެ. މި ރަސްމިއްޔާތުގައި ވަޒީރު ވަނީ ދަސްވެނިވި ދަރިވަރުންނާ މުޚާޠަބުކުރައްވައި ވާހަކަދައްކަވައި، ދަރިވަރުންނަށް ސަނަދު ހަވާލުކޮށްދެއްވާފައެވެ.
މިއަހަރުގެ ޖޫން 3 އިން ފެށިގެން އޮކްޓޫބަރު 3އަށް ކުރިއަށްގެންދިޔަ މި 16 ހަފުތާގެ ތަމްރީނު ޕްރޮގްރާމުގައި ތަފާތު 6 ކޯހެއް ހިންގާފައިވެއެވެ. މި ކޯސްތަކުގައި ބައިވެރިވި 75 ބައިވެރިންގެ ތެރެއިން 16 އަތޮޅެއްގެ 45 ރަށަކަށް ނިސްބަތްވާ 73 ދަރިވަރުން ވަނީ ކާމިޔާބުކަމާއެކު ދަސްވެނިވެފައެވެ. އޭގެ ތެރޭގައި ހިމެނެނީ 13 އަންހެން ދަރިވަރުންނާއި 60 ފިރިހެން ދަރިވަރުންނެވެ. އަދި މީގެ ތެރެއިން 66 ދަރިވަރުން ވަނީ މޯލްޑިވްސް ކޮލިފިކޭޝަން އޮތޯރިޓީ ޤަބޫލުކުރާ ލެވެލް 3 ގެ ސެޓުފިކެޓު ހާސިލުކޮށްފައެވެ.
މި ޕްރޮގްރާމުގައި ހިންގާފައިވާ ސެޓުފިކެޓު ލެވެލް 3 ގެ ކޯސްތަކުގެ ތެރޭގައި އޮޓޯ މޯބައިލް އިންޖިނިއަރިންގ، މެރިން އިންޖިނިއަރިންގ، އިލެކްޓްރީޝަން، ރެފްރިޖެރޭޝަން އެންޑް އެއަރކޮންޑީޝަނިންގ، ވެލްޑިންގ އެންޑް މެޓަލް ފެބްރިކޭޝަން، އަދި އޮފީސް މެނޭޖުމަންޓް ހިމެނެއެވެ. ޢަމަލީ މައިދާނަށް ފަރިތަކުރުމަށްޓަކައި ކްލާސްރޫމް ލެކްޗަރތަކުގެ އިތުރުން ޕްރެކްޓިކަލް ކްލާސްތަކާއި އިންޑަސްޓްރީ ޕްލޭސްމަންޓްތައްވެސް މި ޕްރޮގްރާމުގެ ތެރެއިން ކުރިއަށްގެންގޮސްފައިވެއެވެ.
މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ޙިލްމީގެ އިތުރުން ދިފާޢީ ވުޒާރާގެ އިސްވެރިންނާއި، އެމްއެންޑީއެފްގެ ޖެނެރަލް އޮފިސަރުން އަދި ދަރިވަރުންގެ ޢާއިލާތަކުން ބައިވެރިވެވަޑައިގެންނެވިއެވެ.
