ޤައުމަށް ބޭނުންވާ ދާއިރާތަކަށް، ދަސްވެނީންނަށް ލިބިފައިވާ ޢިލްމާއި ހުނަރުގެ އަލީގައި އީޖާދީ ވިސްނުންތައް ހޯއްދަވައިދެއްވުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް އެދިވަޑައިގެންފިއެވެ. އެމަނިކުފާނު މިފަދައިން އެދިވަޑައިގެންފައިވަނީ ރޭ ބޭއްވި ވިލާ ކޮލެޖުގެ ސްޓޫޑެންޓް އެޗީވްމަންޓް އެވޯޑްސް 2026 ޙަފުލާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. މި ޙަފުލާގައި، ޤާސިމް އިބްރާހިމް އެވޯޑް ފޮރ އެކްސެލެންސް ހާޞިލުކުރި ޕޯސްޓް ގްރެޖްއޭޓް ޕްރޮގްރާމްގެ ދަސްވެނީންނަށް އެވޯޑު ހަވާލުކޮށްދެއްވީވެސް ރައީސުލްޖުމްހޫރިއްޔާގެ ނައިބެވެ.
މި ޙަފުލާގައި އެވޯޑު ހާޞިލުކުރި އެންމެހާ ދަސްވެނީންނަށާއި ޢާއިލާތަކަށް ތަހުނިޔާ ދަންނަވަމުން، ޤައުމާއި މުޖުތަމަޢަށް ދިމާވެފައިވާ މައްސަލަތައް ޙައްލުކުރުމުގައި ދަސްވެނީންގެ ސިކުނޑިތަކުން އީޖާދީ ވިސްނުން އިސްކުރަންޖެހިފައިވާކަމަށް ނައިބު ރައީސް ވިދާޅުވިއެވެ. އަދި މާދަމާ މަސައްކަތު މާހައުލަށް ނުކުމެ ކުރާ މަސައްކަތްތަކަކީ ޒިންމާދާރު، އަދި ސްޕީޑު އަވަސް އީޖާދީ ވިސްނުންތައް ގެނެސްދޭނެ މަސައްކަތްތަކަކަށް ހެދުމަށް އެމަނިކުފާނު ބާރުއެޅުއްވިއެވެ. މިފަދަ މަސައްކަތްތަކުގެ ސަބަބުން ރައްޔިތުންނާއި މުއައްސަސާތަކާ ދެމެދު އޮންނަ އިތުބާރު އިތުރަށް ބަދަހިވެގެންދާނެކަންވެސް ފާހަގަކުރެއްވިއެވެ.
ރާއްޖެ ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި ފެނުމަކީ ރައްޔިތުންގެ ބޮޑު އުންމީދެއް ކަމަށާއި، މި އުންމީދު ޙަޤީޤަތަކަށް ހެދުމަށްޓަކައި 2040 ވަނަ އަހަރުގެ ނިޔަލަށް ދިވެހިރާއްޖެ ތަރައްޤީވެފައިވާ ޤައުމަކަށް ހެއްދެވުމުގެ ދުރުރާސްތާ ތަޞައްވުރެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑައަޅުއްވާފައިވާކަން އެމަނިކުފާނު ފާހަގަކުރެއްވިއެވެ. އަދި މި ތަޞައްވުރު ޙާޞިލުކުރުމުގައި ޒުވާނުން އިސްނަގައިގެން، ދަސްވެނީންގެ އީޖާދީ ވިސްނުމާއެކު އަމިއްލައަށް ބައިވެރިވާނެކަމަށް އުންމީދުކުރައްވާ ކަމަށް ވިދާޅުވިއެވެ.
