ދުބާއީން ފުރައިގެން އިޒްރޭލަށް ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމަށް ތުހުމަތުކުރެވޭ މައްސަލައާ ގުޅުން ހުރެދާނެ ކަމަށް ބެލެވިގެން ޔޫއޭއީގައި ދެ ދިވެއްސަކު ހައްޔަރުކޮށްފިއެވެ.
ރިޕޯޓުތައް ބުނާގޮތުން، މި ހާދިސާގައި ޕައިލެޓަށް ހަމަލާދިނުމުގެ ތުހުމަތުކުރެވޭ އުމާންގެ ކޯ-ޕައިލެޓް ހައްމާމް އަލް ހަމާނީއާ އެއް އިމާރާތެއްގައި ދިރިއުޅޭ މި ދެ ދިވެހިންނަކީވެސް ފްލައިދުބާއީގައި ކޯ-ޕައިލެޓުންގެ ގޮތުގައި މަސައްކަތްކުރާ އަދި އިޒްރޭލަށް ދަތުރުކޮށް އުޅޭ ބައެކެވެ. ނަމަވެސް މި ހާދިސާއާ މި ދެ ދިވެހިންނާ ގުޅެނީ ކޮން ގޮތަކުން ކަމެއް އަދި ރަސްމީ އިދާރާތަކުން ހާމަކޮށްފައެއް ނުވެއެވެ.
ޔޫއޭއީގެ ރަސްމީ އިދާރާތަކުން ބުނެފައިވާގޮތުގައި، 182 ދަތުރުވެރިންނާއެކު ދަތުރުކުރި މި ބޯޓުގެ ކޯ-ޕައިލެޓް ކެޕްޓަނަށް ހަމަލާދީފައިވަނީ ކޮކްޕިޓްގައި އަންނަ އިމަޖެންސީ ކޯރާޑިންއެއް ބޭނުންކޮށްގެން ބޯޓުގެ ކޮންޓްރޯލް އަތުލުމުގެ ނިޔަތުގައެވެ. މި ހަމަލާގައި ޕައިލެޓަށް ޒަހަމްތަކެއް ލިބުނު ނަމަވެސް، ކެޕްޓަން ކޮކްޕިޓްގެ ދޮރު ހުޅުވުމާއެކު ކްރޫއިންނާއި ފަސިންޖަރުން ވަނީ ކޯ-ޕައިލެޓް ހިފަހައްޓައި، ސައުދީ އަރަބިއްޔާގެ ތަބޫކް އެއާޕޯޓަށް ބޯޓު ކާމިޔާބުކަމާއެކު ޖައްސާފައެވެ.
އުމާންގެ ރައްޔިތެއް ކަމަށްވާ، އުމުރުން 29 އަހަރުގެ ހައްމާމް އަލް ހަމާނީއަކީ ހައްދުފަހަނައެޅި ފިކުރުތަކަށް ތާއީދުކުރާ މީހަކަށްވާތީ އުމާންގެ އިދާރާތަކުން ކުރިން އޭނާއަށް ޕައިލެޓްކަން ދިނުން މަނާކޮށްފައިވާ ފަރާތެކެވެ. އެހެންކަމުން، ފްލައިދުބާއީން އޭނާ ވަޒީފާއަށް ނެގި ގޮތުގެ ތަހުގީގެއް ފަށާފައިވާއިރު، މިކަމުގެ ފަހަތުގައިވާ އަސްލު މަގުސަދާއި އެހެން އެއްވެސް ޖަމާއަތަކާ ގުޅުން އޮތްތޯ ބެލުމަށް ސަރަހައްދީ ސެކިއުރިޓީ އިދާރާތަކާ ގުޅިގެން ފުޅާދާއިރާއެއްގައި ދަނީ ތަހުގީގު ހިންގަމުންނެވެ.
