އެމެރިކާގެ އަލަބާމާގެ މޮބައިލްގައި ބޭއްވި އެއްވުމެއްގައި ވާހަކަދައްކަވަމުން، އެމެރިކާގެ ރައީސް ޑޮނަލްޑް ޓްރަމްޕް ވަނީ އީރާނާ އެކު ކުރާ ހަނގުރާމަ ވަރަށް އަވަހަށް ނިމިދާނެ ކަމަށް ވިދާޅުވެފައެވެ. ޓްރަމްޕް ވިދާޅުވި ގޮތުގައި މި ހަނގުރާމަ ގާތްގަނޑަކަށް އިންތިޚާބަށްފަހު ވަގުތުން ނިމުމަކަށް އަންނާނެއެވެ.
އީރާނުގެ މަސްރަހާ ގުޅޭގޮތުން ވާހަކަދައްކަވަމުން ޓްރަމްޕް ވަނީ ތެހެރާނުން ވޮޝިންޓަނާ މަޝްވަރާ ކުރާނީ ކާކާ ކަމާމެދު ސުވާލު އުފައްދަވާފައެވެ. އޭނާ ވިދާޅުވީ، "އަހަންނަކަށް ނޭނގެ މުއާމަލާތް ކުރަންވީ ކާކާ ކަމެއްވެސް. މުއާމަލާތް ކުރާނެ މީހަކު ނެތް. އެއްވެސް މީހަކު ރައީސްކަން ކުރާކަށް ބޭނުމެއް ނުވޭ. އަހަރެން މި ބުނަނީ، އަހަރެން އީރާނުން ވާހަކަ ދައްކަންވީ ކާކާތަ؟ ... ޓަކި ޖެހިޔަސް، ގޭގައެއް މީހަކު ނެތް،" ކަމަށެވެ. އަދި ހަމައެއާއެކު، އީރާނަށް ދުވަހަކުވެސް ނިއުކްލިއާ ހަތިޔާރެއް ލިބިގެން ނުވާނެ ކަމަށާއި އެފަދަ ހަތިޔާރެއް ނުބެހެއްޓޭނެ ކަމަށްވެސް އޭނާ ފާހަގަކުރެއްވިއެވެ.
އީރާނުގެ އަސްކަރީ އަދި އިގްތިސާދީ ހާލަތަށް އަލިއަޅުއްވާލައްވަމުން ޓްރަމްޕް ވިދާޅުވީ، އެ ގައުމުގެ ކަނޑުގެ ސިފައިންނާއި، ވައިގެ ސިފައިންގެ އިތުރުން ރާޑަރާއި އެންޓި-އެއާކްރާފްޓް ދިފާއީ ނިޒާމެއް ނެތް ކަމަށެވެ. އަދި އީރާނުގެ އިގްތިސާދު މުޅިން އަޑިއަޅާލައި، އިންފްލޭޝަން ގާތްގަނޑަކަށް 310 އިންސައްތައިގައި ހުރި ކަމަށްވެސް އޭނާ ވިދާޅުވިއެވެ. މީގެއިތުރުން، "މިއީ އެތައް އަހަރެއް ވަންދެން އެހެން ރައީސުން ކުރަންޖެހިފައި އޮތް ކަމެއް.. ހަޑި މަސައްކަތް އަބަދުވެސް ކުރަން މި ޖެހެނީ އަހަރެމެންނަށް،" ކަމަށް ޓްރަމްޕް ވިދާޅުވިއެވެ.
ހަނގުރާމަ ނިމުމަކަށް އައުމާއެކު ދުނިޔޭގެ ބާޒާރުގައި ތެލުގެ އަގުތައް ވަރަށް ބޮޑަށް ދަށަށް ވެއްޓިގެންދާނެ ކަމަށް ޓްރަމްޕް ވިދާޅުވިއެވެ. އަދި އިތުރު ތަފްސީލެއް ނުދެއްވައި އޭނާ ވިދާޅުވީ، އެމެރިކާގެ ސްޓްރެޓީޖިކް ޕެޓްރޯލިއަމް ރިޒާވް އަލުން އެއްވެސް އަގަކާ ނުލައި ފުރާލުމުގެ މަސައްކަތް ވަރަށް އަވަހަށް ފައްޓަވާނެ ކަމަށެވެ.
