މިއަދުގެ ހުކުރު ޚުޠުބާގައި އަލިއަޅުވާލާފައިވަނީ މާތް الله ހަނދުމަކުރުމުގެ މުހިންމުކަމާއި، އޭގެ ސަބަބުން އިންސާނާގެ ނަފުސަށާއި ދިރިއުޅުމަށް ލިބިގެންދާ މަތިވެރި ނަފާގެ މައްޗަށެވެ. ދިރިއުޅުމުގައި ދިމާވާ އެކި ގޮންޖެހުންތަކާއި، ދަތިތަކާއި، ހާސްކަމުން ނަފުސަށް ހަމަޖެހުމާއި އުފާވެރިކަން ހޯދުމަށް އޮތް އެންމެ ފަސޭހަ އަދި އެންމެ ކުރު މަގަކީ ގިނަގިނައިން މާތް الله ހަނދުމަކޮށް ޛިކުރުކުރުމެވެ. ޛިކުރުކުރުމުގެ ސަބަބުން ހަށިގަނޑަށް ދިރުމާއި ބާރު ލިބި، މޫނުމަތީގެ އުޖާލާކަން އިތުރުވެ، މާތް اللهގެ ޙަޟްރަތަށް ކުއްތަންވުމުގެ މަގުފަހިވެގެންދެއެވެ.
ޛިކުރުކުރުމުގެ ތެރޭގައި މާތް اللهގެ މަތިވެރި އުފެއްދުންތަކާމެދު ފުންކޮށް ވިސްނައި ފިކުރުކުރުމާއި، އެކަލާނގެއަށް ޙަމްދާއި ޘަނާގެ ކަލިމަތައް ދުލުން ކިޔައިއުޅުމާއި، ދުޢާކުރުމާއި، ކީރިތި ރަސޫލާ ﷺގެ މައްޗަށް ޞަލަވާތްކިޔެވުން ހިމެނެއެވެ. އަދި ހިނގާފައިއުޅޭއިރު، ސަވާރީއެއްގައި ދަތުރުކުރާއިރު، އޮށޯވެ އޮންނައިރު އަދި މަސައްކަތުގެ މާޙައުލުގައިވެސް އަބަދުވެސް ދުލުން މާތް الله ހަނދުމަކުރުން މަތީ ދެމިތިބުމަށް އިރުޝާދު ދެއްވާފައިވެއެވެ.
ޛިކުރުކުރުމުގެ މުހިންމުކަން ބަޔާންކުރައްވައި ކީރިތި ޤުރްއާނުގެ ސޫރަތުއްރަޢުދުގެ 28 ވަނަ އާޔަތް ގެންނަވާފައިވެއެވެ.
﴿ الَّذِينَ ءَامَنُوا وَتَطْمَئِنُّ قُلُوبُهُم بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوبُ ﴾
މާނައީ:"އެއުރެންނީ އީމާންވި މީހުންނެވެ. އަދި الله ހަނދުމަކުރުމުން، އެއުރެންގެ ހިތްތައް ހަމަޖެހޭ މީހުންނެވެ. ދަންނާށެވެ! ހިތްތައް ހަމަޖެހެނީ، الله ހަނދުމަކުރުމުންނެވެ."
މީގެ އިތުރުން ޛިކުރުކުރާ މީހާއާއި ޛިކުރުނުކުރާ މީހާގެ މިޘާލު ބަޔާންކުރައްވައި ރަސޫލާ ﷺ ޙަދީޘްކުރައްވަވާފައިވެއެވެ.
« مَثَلُ الَّذِي يَذْكُرُ رَبَّهُ وَالَّذِي لَا يَذْكُرُ، مَثَلُ الْحَيِّ وَالْمَيِّتِ » (މާނައީ: "އެމީހެއްގެ ވެރިރަސްކަލާނގެ ހަނދުމަކުރާ މީހާއާއި، އެކަލާނގެ ހަނދުމަނުކުރާ މީހާގެ މިޘާލަކީ ދިރިހުރި މީހަކާއި މަރުވެފައިވާ މީހެއްގެ މިޘާލެވެ."). އަދި ސަޙާބީއަކަށް އިރުޝާދު ދެއްވަމުން « لَا يَزَالُ لِسَانُكَ رَطْبًا مِنْ ذِكْرِ اللَّهِ » މާނައީ: " މާތް الله ހަނދުމަކުރުމުގެ މަތީގައި ތިބާގެ ދޫ އަބަދުވެސް ތެތްކަން ބާއްވާށެވެ!") މިފަދައިން ޙަދީޘްކުރެއްވަވާފައިވެއެވެ.
ޚުޠުބާ ނިންމާލަމުން ނަޞޭޙަތްތެރިވެފައިވަނީ، ފަރުޟު ނަމާދުތަކުގެ ފަހުގައި ކުރާ ޛިކުރުތަކާއި ހެނދުނާއި ހަވީރުގެ ދުޢާތަކަށް ވަގުތު ހުސްކޮށް، އަބަދުވެސް ދުލުން މާތް الله ހަނދުމަކުރުމުގައި ދެމިތިބުމަށެވެ. އަދި އިސްލާމީ އުންމަތަށާއި، ފަލަސްޠީނުގެ މުސްލިމުންނަށް ނަޞްރާއި މަދަދު ދެއްވުމަށާއި، ރާއްޖޭގެ އިޤްތިޞާދަށާއި ރައްޔިތުންނަށް ބަރަކާތްލެއްވުން އެދި ދުޢާކުރެވުނެވެ.
