ރާއްޖޭގެ މީހުން ދިރިއުޅޭ ކޮންމެ ރަށެއްގައި ފުލުހުން ޤާއިމުވެ ތިބެގެން ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދިނުމުގެ ސިޔާސަތުގެ ދަށުން، އދ. ކުނބުރުދޫގައި އަލަށް އިމާރާތްކުރި ފުލުހުންގެ މަރުކަޒު ރަސްމީކޮށް ހުޅުވައި ޚިދުމަތްދޭން ފަށައިފިއެވެ. ރޯޑް ޑިވެލޮޕްމަންޓް ކޯޕަރޭޝަން އާ ހަވާލުކޮށްގެން ކުރިއަށް ގެންދިޔަ މި މަޝްރޫޢުގެ މަސައްކަތް ނިންމައި މި މަރުކަޒު ހުޅުއްވައިދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާނާއި ކޮމިޝަނަރ އޮފް ޕޮލިސް އަޙްމަދު މުޙައްމަދެވެ.
މި ރަސްމިއްޔާތުގައި ވާހަކަފުޅުދައްކަވަމުން ވަޒީރު ޢަލީ އިޙްސާން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު 63 ރަށެއްގައި ފުލުހުން ފިޒިކަލީ ޤާއިމުވެ ތިބެގެން ޚިދުމަތް ދެމުން ނުދާ ކަމަށެވެ. ނަމަވެސް މިހާރު އެ ހުރިހާ ރަށެއްގައިވެސް ފުލުހުން ޤާއިމުވެ ތިބެގެން ޚިދުމަތް ދެމުންދާކަން ވަޒީރު ފާހަގަކުރެއްވިއެވެ. އަދި އޭރު އަމިއްލަ މަރުކަޒުތައް ހުރީ އެންމެ 17 ރަށުގައި ކަމަށާއި، ގިނަ ރަށްރަށުގައި ޚިދުމަތް ދެމުންދިޔައީ ކައުންސިލް އިދާރާތަކާއި އަމިއްލަ ތަންތަން ކުއްޔަށް ހިފައިގެން ކަމަށްވެސް އެމަނިކުފާނު ވިދާޅުވިއެވެ.
ރަށްރަށުގައި ފުލުހުންގެ ޚިދުމަތަށް ޚާއްޞަކޮށް 154 މަރުކަޒު އެޅުމަށް ފަށާފައިވާ ބޮޑު މަޝްރޫޢުގެ މައްޗަށް އަލިއަޅުވައިލައްވަމުން ވަޒީރު ވިދާޅުވީ، ކުނބުރުދޫ ފަދަ އާބާދީ ކުދި އަދި ކުށް މަދު ރަށްރަށުގައިވެސް މަރުކަޒުތައް ޤާއިމުކުރުމުގެ މައިގަނޑު މަޤުޞަދަކީ ކުށުގެ ވެށި އުފެދުމުގެ ކުރިން މުޖުތަމަޢާ ގުޅިގެން އަމާން ވެއްޓެއް ދެމެހެއްޓުން ކަމަށެވެ. އަދި ޤައުމީ ފެންވަރުގައި ޚާއްޞަ އިސްކަމެއްދީގެން ހައްލުކުރަންޖެހޭ މައިގަނޑު ކަންތައްތަކުގެ ތެރޭގައި މަސްތުވާތަކެތީގެ މާޙައުލު ނައްޓައިލުމާއި، ގޭންގު ކުށްތައް ހުއްޓުވުމާއި، ޤަވާއިދާ ޚިދާފަށް އުޅޭ ބިދޭސީންގެ މައްސަލަ ހައްލުކުރުމުގެ އިތުރުން ކުޑަކުދިން ކުށުގެ ވެށިން ރައްކާތެރިކުރުން ހިމެނޭ ކަމަށް ވިދާޅުވިއެވެ.
މި ރަސްމިއްޔާތުގައި ރައްޔިތުންގެ މަޖިލީހުގެ ދާއިރާގެ މެންބަރާއި، ކުނބުރުދޫ ކައުންސިލާއި ރައްޔިތުންގެ އިތުރުން އާރްޑީސީގެ އިސްވެރިންނާއި ފުލުހުންގެ އިސް އޮފިސަރުން ބައިވެރިވެވަޑައިގެންފައިވެއެވެ.
