މަސްތުވާތަކެތީގެ މައްސަލައެއްގައި ބ. ކަމަދޫއިން މީހަކު ހައްޔަރުކޮށްފިއެވެ.
ފުލުހުން މަޢުލޫމާތު ދިން ގޮތުގައި، މި މައްސަލައާ ގުޅިގެން ހައްޔަރުކޮށްފައިވަނީ ކަމަދޫ ހުވަނދުމާގެ، ޔޫސުފް ޞިދުޤީ (36އ) އެވެ. މަސްތުވާތަކެތި ގެންގުޅެ، ބޭނުންކޮށް، އަދި އެ ތަކެތީގެ ވިޔަފާރިކުރާކަމުގެ ތުހުމަތުގައި އޭނާ ހައްޔަރުކޮށްފައިވަނީ އެ ރަށުގައި ފުލުހުން ހިންގި ޚާއްޞަ އޮޕަރޭޝަނެއްގައެވެ.
ސެޕްޓެމްބަރު 29 ވަނަ ދުވަހު ކަމަދޫ މަގުމަތިން އޭނާ ހުއްޓުވި ވަގުތު، އޭނާ ލައިގެން ހުރި ޖީންސުގެ ޖީބުގައި އޮތް އެއްޗެއް ނަގައި އެއްލައިލާފައިވެއެވެ. ފުލުހުން އެ ތަކެތި ނަގައި ބަލައިފާސްކުރިއިރު، މަސްތުވާތަކެތިކަމަށް ޝައްކުކުރެވޭ އެއްޗެއް ހުރި ހަތަރު ކަރުދާސްކޮޅު ފެނިފައިވެއެވެ. މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 10 ދުވަހަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.
ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.
