ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ޖަލްސާތައް އަންނަ ހޯމަ ދުވަހު ފެށުމަށް ހަމަޖެހިފައިވާއިރު، ފުރަތަމަ ޖަލްސާއަށް މުހިންމު ތިން ކަމެއް ވަނީ އެޖެންޑާކޮށްފައެވެ.
އެގޮތުން، ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ބޭފުޅަކު އައްޔަންކުރުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލައާއި، އޯއައިސީގެ އެންޓި ކޮރަޕްޝަން މުއާހަދާގައި ރާއްޖެއިން ބައިވެވުމަށް މަޖިލީހުގެ ރުހުން ހޯދުމުގެ މައްސަލަ ދިރާސާކުރުމަށް ކަމާގުޅޭ ދާއިމީ ކޮމިޓީތަކަށް ފޮނުވުން ހިމެނެއެވެ. މީގެ އިތުރުން، ސަރުކާރުގެ ފަރާތުން ފުވައްމުލަކު މެދު ދާއިރާގެ މެންބަރު އަލީ ފަޒާދު ހުށަހަޅުއްވާފައިވާ "ކުށް ކޮށްގެން ހޯދާ މުދަލާގުޅޭ ބިލް" ގެ އިބްތިދާއީ ބަހުސް ކުރިއަށް ގެންދިއުމަށްވެސް ވަނީ އެޖެންޑާކޮށްފައެވެ.
މަޖިލީހުގެ ދެވަނަ ދައުރުގެ މަސައްކަތްތައް ނިންމުމަށްފަހު ޗުއްޓީއަށް ދިޔައީ އޮގަސްޓް 26 ވަނަ ދުވަހު ކަމަށާއި، މިދިޔަ ދެ ދައުރުގައި ޖުމްލަ 24 ބިލެއްގެ މަސައްކަތް ނިންމާފައިވާއިރު، މަސައްކަތް ގިނަވުމުގެ ސަބަބުން ފުރަތަމަ ދައުރާއި ދެވަނަ ދައުރުގެ މުއްދަތުވެސް ވަނީ އިތުރުކޮށްފައެވެ.
