ހަށިގަނޑު ތެރޭގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރަން އުޅުނު ނޭޕާލްގެ ދެ މީހަކު ފުލުހުން ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ ނޭޕާލަށް ނިސްބަތްވާ 47 އަހަރުގެ ނިއްކަ ތަމަންގް އާއި 40 އަހަރުގެ އީތްރާނީ ގަލެއެވެ.
މޯލްޑިވްސް ކަސްޓަމްސް ސާވިސްއިން މި ދެ މީހުން ޝައްކުކުރެވިގެން ފުލުހުންނާ ހަވާލުކުރުމުން، ޑްރަގް އެންފޯސްމަންޓުން އެ މީހުން ހައްޔަރުކުރީ މި މަހުގެ 25 ވަނަ ދުވަހުއެވެ. އެ މީހުންގެ ހަށިގަނޑު ބަލައިފާސްކުރުމުގެ ތެރެއިން މަސްތުވާތަކެތި ހުރި 142 ބުލެޓް ފެނިފައިވާއިރު، އޭގެ ވަގުތީ ބަރުދަނުގައި 1.5 ކިލޯއަށްވުރެ ގިނަ ހުއްޓެވެ.
މި މައްސަލައާ ގުޅިގެން ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ 30 ދުވަހުގެ ބަންދުގެ މުއްދަތެއް ދީފައެވެ. ފުލުހުން ދަނީ މި މައްސަލަ އިތުރަށް ތަހުގީގުކުރަމުންނެވެ.
