ރާއްޖޭގެ ރަށްރަށުގައި ހުރި ކުޅިވަރު ވަސީލަތްތައް މަރާމާތުކުރުމަށް ހުރި ގޮންޖެހުންތަކަށް ހައްލު ހޯދައިދިނުމުގައި، ރަށްރަށުގައި އަލަށް ގާއިމުކުރާ ފިޓްނަސް އެންޑް ރެކްރިއޭޝަން ސެންޓަރުތަކުގެ ދައުރު ބޮޑުވާނެ ކަމަށް ސްޕޯޓްސް މިނިސްޓަރ އަބްދުﷲ ރާފިއު ވިދާޅުވެއްޖެއެވެ.
ސަލްޓަން ޕާކުގައި އޮތް "އަހާ ފޯރަމް"ގައި އާންމުންގެ ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ، ކުޅިވަރު ވަސީލަތްތައް ހަލާކުވެ ބޭނުންނުކުރެވޭ ހާލަތަށް ދަނީ މީގެކުރިން ބެލެހެއްޓުމުގެ އޮނިގަނޑު ރޭވިފައި އޮތް ގޮތުން ކަމަށެވެ. ބައެއް ވަސީލަތްތައް ކައުންސިލްތަކުގެ ދަށުގައި އަދި އަނެއްބައި މިނިސްޓްރީގެ ދަށުގައި ހުރުމުގެ ސަބަބުން، އެކަން ދަންދެމެހެއްޓެނިވި ގޮތެއްގައި ބަލަހައްޓާނެ ނިޒާމެއް ގާއިމުވެފައެއް ނެތެވެ.
މި މައްސަލައަށް ހައްލު ހޯދުމުގެ ގޮތުން ރަށްރަށުގައި ގާއިމުކުރާ ފިޓްނަސް އެންޑް ރެކްރިއޭޝަން ސެންޓަރުތަކުގައި މިނިސްޓްރީގެ މުއައްޒަފުން ތިބޭނެއެވެ. އޭގެ ތެރޭގައި އިދާރީ މުއައްޒަފުންނާއި، ޕްރޮގްރާމްތައް ހިންގާ ފަރާތްތަކުގެ އިތުރުން މަރާމާތުގެ މަސައްކަތްތައް އަވަހަށް ކުރުމަށް ޚާއްޞަ މުއައްޒަފުން ހިމެނޭނެއެވެ. އަދި އެ ސެންޓަރުތަކަށް ވަސީލަތްތައް މަރާމާތުކުރުމަށް ޚާއްޞަ ބަޖެޓެއް ދިނުމަށްވެސް ވަނީ ނިންމައިފައެވެ.
މީގެއިތުރުން، ސަރުކާރުގެ އެހެން މިނިސްޓްރީތަކެކޭ އެއްފަދައިން ރަށްރަށުގައި ހުރި ވަސީލަތްތައް އެއް ނިޒާމަކުން ދެމެހެއްޓެނިވި ގޮތެއްގައި ބެލެހެއްޓުމަށްޓަކައި، ކައުންސިލްތަކާއި އަމިއްލަ ފަރުދުންގެ ދަށުގައި ހުރި ކުޅިވަރު ވަސީލަތްތައް މިނިސްޓްރީގެ ދަށަށް ބަދަލުކުރުމަށް 2024 ވަނަ އަހަރު ސާކިއުލާއެއް ފޮނުވާފައިވާނެ ކަމަށްވެސް މިނިސްޓަރ ފާހަގަކުރެއްވިއެވެ.
